Дар шароити муосир барои ҳар шахс лозим аст, ки баробари аз худ кардани касбу кори гуногун ҳамчунин якчанд забони хориҷиро низ аз бар намояд. Зеро донистани забони хориҷӣ ба шахс имконият медиҳад, ки дар дилхоҳ самт ва дар дохилу хориҷи кишвар роҳи хешро дарёбад.

Солҳои ахир бо вуҷуди хубтару беҳтар гардидани шароити таълиму тарбия то ҳол баъзе наврасону ҷавонони мо ба забономӯзӣ таваҷҷуҳи кам зоҳир намуда, ҳеҷ кушиши аз худ кардани забонеро намекунанд. Ин чиз боис мегардад, ки онҳо вақте хориҷи кишвар ва пеш аз ҳама барои кору фаъолият мераванд, надонистани забони хориҷӣ, аз ҷумла забони русӣ ба мушкили рақами якашон табдил меёбад.

Ин ҷо мо барои он надонистани забони русиро мушкилии бисёре аз ҷавонон гуфтем, ки бештари онҳо ба кишвари Русия ба муҳоҷират мераванд ва дар сурати надонистани ин забон ба душвориҳои хеле зиёд рӯ ба рӯ мешаванд. Пас барои муоширати озод доштан, онҳо бояд забони русиро нағз аз худ кунанд.

Ҳангоми суҳбат бо ҷавононе, ки дар Федератсияи Русия кору фаъолият мекунанд, аёнамон гардид, ки ягона мушкилиашон надонистани забони русӣ аст. Онҳо иллати надонистани ин забонро дар он медонанд, ки ҳангоми таҳсил дар мактаби миёна омӯзгори забони русӣ надоштанд.

Ин гуфтаро Айниддин Давлатов, хатмкунандаи Донишгоҳи миллии Тоҷикистон низ тасдиқ карда, зимни суҳбат гуфт: “Аз сабабе ки дар мактаби миёнаамон мутахассис аз фанни забони русӣ набуд, то ҳол забони русиро хуб аз худ накардаам. Барои аз худ кардани забони русӣ баробари дар донишгоҳ таҳсил намудан, дар марказҳои забономӯзӣ ба омӯзиши забони русӣ машғул шудам. Гарчанде тӯли чанд муддатест, ки ба омӯзиши забони русӣ машғулам, вале ҳоло ҳам онро хуб аз бар накардаам. Ин сабабаш албатта набудани таҳкурсии ин забон аст, ки онро бояд аз мактаби миёна омӯхт”.

Мушкили мазкур то дараҷае реша давондааст, ки ҳатто муҳассилини муассисаҳои олӣ, ки боргоҳи асосии омода кардани кадрҳо бо забони русист, ин забонро намедонанд. Хоҷазода Тоҳир Абдулло, ректори Донишгоҳи славянии Русияву Тоҷикистон чанде пеш зимни як нишаст иброз намуда буд, ки “Донишҷӯёни мо забони русиро хуб намедонанд, ки ин хеле аламовар аст”.

Вақте донишҷӯёни донишгоҳе, ки раванди таълимашон бо забони русӣ асту забони мазкурро намедонанд, хеле бад аст.

Аз мушоҳидаҳо бармеояд, ки то ҳол дар баъзе аз мактабҳои миёна омӯзгори фанни забони русӣ намерасад. Амрохон Иброҳимов, ҷонишини директори МТМУ №16-и ноҳияи Шамсиддин Шоҳин доир ба ин масъала гуфт: “Солҳои зиёд аст, ки дар муассисаи мо нарасидани мутахассис аз фанни забони русӣ мушкили аввалиндараҷа ба ҳисоб меравад. Айни ҳол мо донишҷӯйи курси дуюмро, ки дар донишгоҳ ба таври фосилавӣ таҳсил дорад, ба кор ҷалб кардем, то ки насли наврасу ҷавони деҳа аз забономӯзӣ дур набошанд”.
Ба таъкиди Шакармард Булбулов, мудири кабинети методии шуъбаи маорифи ноҳияи Шамсиддини Шоҳин, дар ин ноҳия 60 муассисаи таълимӣ мавҷуд аст, ки дар 4 тои он норасоии кадрҳои баландихтисос дида мешавад. Ӯ гуфт: “Барои бартараф кардани ин мушкилот дар шуъбаи маориф аз соли 2020 курсҳои махсус барои омӯзиши забони русӣ ташкил карда шудааст, ки собиқадорони соҳа ба омӯзгорони ҷавон дарсҳои иловагӣ мегузаронанд. Инчунин ҳамасола барои боз ҳам ба пуррагӣ аз нозукиҳои забони русӣ бохабар шудани омӯзгорон ба шаҳри Душанбе ба семинарҳо равон карда мешаванд. Мо кӯшиш карда истодаем, ки насли наврас аз омӯзиши забонҳои хориҷӣ дур намонад”.

Чун аз суҳбатҳо аён гардид, ки дар баъзе мактабҳо омӯзгори фанни забонҳои хориҷӣ намерасад, Вазорати маориф ва илми кишварро зарур аст, ки муассисаҳои таълимиро бо мутахассисони забондон таъмин созанд, то насли наврасу ҷавон забонҳои хориҷиро аз бар намоянд.

Ҳамзамон ҷавононро лозим аст, ки бо истифода аз имкониятҳо забонҳои хориҷиро омӯзанду дар пешрафти меҳани хеш саҳми худро гузоранд.