Кирон Уилямсон ҳамагӣ 12-сола аст. Ӯ мисли дигар ҳамсолонаш як бачаи муқаррарӣ буда, бозии футболу велосипедронӣ аз шуғлҳои дӯстдоштааш маҳсуб меёбанд, дӯстони зиёд дорад, аммо аз ҳамсолонаш бо он фарқ мекунад, ки ба ҳунари рассомӣ шавқу рағбати зиёд ва қобилияти фавқуллода дорад. Кирон дар охирин намоиши мусаввараҳои худ 40 расмро ба фурӯш бароварда, маблағи 400 000 фунт стерлинг (500 400 $) ба даст овард.

Орзуҳо

Ӯ аллакай миллионерест, ки барои харидории мусаввараҳояш одамон навбат меистанду барои тамошои онҳо коллексионерҳо аз тамоми кишварҳои дунё меоянд. Кирон орзу дорад, ки ба Италия сафар намуда, барои худ якчанд гов бихарад ва марғзореро, ки ҳайвонот он ҷо мечаранд, рӯи қоғаз тасвир намояд.

Мусоҳибаи нахустин

Мусоҳибаи нахустини Кирон бо хабарнигорон дар соли 2009, замоне ки ӯ ҳамагӣ 7 сол дошт, сурат гирифт. Он замон аҳли оилаи онҳо дар деҳаи Норфолк, ки дар қисмати шарқии Британияи Кабир ҷойгир аст, дар кулбаи хурдакаки фақиронае зиндагӣ мекард. Ҳамагӣ баъди 2 сол, яъне соли 2011 волидони Кирон бо маблағи аз фурӯши мусаввараҳои ӯ бадастовардаашон дар мавзеи зебоманзараи соҳили кӯл хонаи барҳаво хариданд.

Овоза ва ҳақиқат

Овозаи истеъдоди фавқулодаи Кирон аз даҳон ба даҳон мегузашт ва одамони зиёд орзуи бо ин рассоми моҳир вохӯрдану ҳамсуҳбат шуданро дар дил мепарвариданд. Ҳатто бо вуҷуди он ки оилаи онҳо дар як деҳаи дурдасте ҷойгир аст, ҳаводорони ҳунари волои ӯ ҳамарӯза барои мулоқот бо ӯ ба он ҷо меоянд. Вақте кас ба мусавараҳои ин рассом менигарад, ҳаминро ба хубӣ пай мебарад, ки ҳунар ва маҳорати ӯ ҳамарӯза сайқал ёфтаву рушд мекунад. Дар ҳунари ӯ осори эҷоди Алфред Маннингс мушоҳида мешавад. Мавзӯи асарҳои ӯ асосан тасвири зебоиҳои табиат ва ҳаёти деҳотро дар бар гирифтааст. Нахустин расмашро ӯ дар синни 5-солагӣ дар яке аз ҷашнҳои оилавиашон рӯи қоғаз тасвир намуда буд. Баъди ин назари Кирон ба олами атроф тағйир ёфт.

Шефтаи табиати афсункор

Кирон вақти хеле зиёди худро дар оғӯши табиат мегузаронад. Ӯ дар саҳрои васеъ ва соҳили кӯл ҳатто то рӯз бедорхобӣ мекашад, то тулӯи хуршед ва нахустин шуоъҳои онро дар уфуқ бо чашмони худ бубинад. Аз волидон хоҳиш мекунад, ки ӯро ба тамошои ҷангал бубаранд. Писарак аз дидани ҳар як манзараи зебову нотакрор, ҳайвоноти нодиру ғайриодӣ ба ваҷд меояд. Айни ҳол волидони Кирон барои писари худ таълими хонагиро муносибтар меҳисобанд.

Андешаҳои волидон

“Албатта, мо дар хусуси ояндаи писарамон зиёд андеша мекунем, хосса дар мавриди таҳсили минбаъдаи ӯ, - мегӯяд модари Кирон. – Аммо писари мо чунон кӯдаки мустақил аст, ки гумон мекунем, барояш таълими хонагӣ кифоя аст”. Модари Кирон чунин меандешад, ки чунин шеваи таълим барои рушди минбаъдаи дониш ва истеъдоди фитрии ӯ муносибтар аст. Таълими хонагӣ писарбачаро аз ҷомеа дур ва мардумгурез намекунад, балки ӯ имконияти бештари дар доираи ҳамсолонаш буданро дорад.

“Баъзан мо аз суханони атрофиён нороҳат мешавем, - мегӯяд модари Кишен ба хабарнигорон. –Охир дар ҳақиқат ҳам оилаи моро ҳамин писарбачаи 12-сола таъмин мекунад”. Волидон барои фарзандон фазои озоду мустақилро муҳайё сохтаанд, барояшон реҷаи муайян ва қатъии рӯз мураттаб накардаанд, балки онҳо имкон доранд озодона ба ҳама гуна корҳои дӯстдоштаи худ машғул шаванд. Волидон ба Кирон гуфтаанд, ки мабодо рассомӣ ба дилаш занад, онро канор гузорад ва ҳарчи дилаш мехоҳад ҳамонро бикунад. “Агар хости Худованд бошад, мо боз ба ҳамон рӯзгори пешинаамон бармегардем”, - бо ризояту қаноатмандӣ изҳор медоранд онҳо. Воқеан, падари ӯ ба фурӯши асбобҳои мусиқӣ машғул асту модараш мутахассиси диетология.