Миҷгона Шарипова яке аз варзишгарони муваффақ ва мураббии комёб дар риштаи гимнастикаи бадеӣ ба ҳисоб меравад. Пас аз баромаду ба даст овардани дастовардҳои намоён дар риштаи мазкур, шуруъ аз соли 2014 ба ҳайси сармураббии дастаи гимнастикаи бадеӣ интихоб шуда, кору фаъолият дорад. Дар зимн бо ӯ доир ба фаъ-олияти варзишӣ, пардохтан ба фаъолияти мураббигӣ ва дастовардҳои имрӯзи гимнастчиёни кишвар суҳбат намудем.

- Шумо аз чорсолагӣ ба гимнастикаи бадеӣ машғул гардидаед. Равонаи ин ҷода шудан майли худатон буд ва ё чизи дигар?

- Падарам варзишгар буд. Ӯ дар шаҳри Ҳисор ба гимнастика шуғл меварзиду ба ману хоҳарам ҳар гуна ҷузъиётҳои гимнастикаро нишон медод. Ҳамин тавр, ба гимнастика шавқ пайдо кардам. Ҳамзамон, аз тариқи оинаи нилгун мусобиқаҳои варзиширо бо завқ тамошо мекардам. Ин ҳама аз назари падарам пинҳон намонд ва ӯ маро ба гимнастикаи бадеии шаҳри Москваи Федератсияи Русия бурд. Баъд аз тамринҳои ҷолиби гимнастикӣ майлу хоҳиш ва шавқу завқам боз ҳам ба ин ришта бештар шуд.

- Аз ин навъи варзиш ба чӣ дастовардҳои назаррас ноил гардидаед?

- Бор аввал дар мусобиқаи варзишие, ки соли 2007 зери унвони “Ҷоми Русия” баргузор гардида буд, аз ин навъи варзиш баромад кардам ва соҳиби медали тилло шудам. Соли 2011 бошад, чун намояндаи Тоҷикистон дар мусобиқаи байналмилалӣ дар шаҳри Новосибирск иштирок намуда, соҳиби ҷойи панҷум гаштам. Инчунин, соли 2012 дар мусобиқаи байналмилалӣ дар шаҳри Черноголовкаи Русия ширкат варзида, соҳиби медали биринҷӣ гаштам.

- Баъд аз солҳои тӯлонӣ ба Тоҷикистон баргаштед. Чаро?

- Бо сабабҳои оилавӣ соли 2009 ба кишвари азизамон омадем. Дар Русия бо гузашти вақт дарк мекардам, ки Ватан бароям азизу муқаддас аст. Баъди омадан дигар ба он ҷо барои зистану фаъолият кардан, баргаштан нахостам. Ҳамеша меҳри зодгоҳ дар дилам буду мехостам дар ватан бошам ва муаррифгару парчамбардораш.

Имрӯз дар Тоҷикистон кулли имкониятҳо барои рушди варзиш мавҷуд мебошад. Хурсандиовар аст, ки баробари дигар навъҳои варзиш гимнастикаи бадеӣ низ дар кишвар ба натиҷаҳои шоёну назаррас шарафёб гардидааст.

- Чанд сол аст, ки ҳамчун сармураббӣ пайи фаъолият мебошед. Кор дар ин самт чӣ гуна аст?

- Пеши худ ҳадаф гузошта будам, ки ҳамчун сармураббӣ худро бисанҷаму маҳорату малакаи варзишии омӯхтаи худамро ба шогирдон омӯзонам. Хушбахтона, ин мақсадам амалӣ гардид. Соли 2021 Донишкадаи тарбияи ҷисмонии Тоҷикистон ба номи С. Раҳимовро бо ихтисоси сармураббӣ - омӯзгор хатм намудам. Аз ин пештар чун дорои таҷрибаву дониши зарурӣ дар ин ришта будам, шуруъ аз соли 2014 дар Муассисаи давлатии “Мактаби махсуси варзишии захираҳои олимпӣ – 1” оид ба гимнастикаи бадеӣ ба ҳайси сармураббӣ кору фаъолият мекунам.

Сармураббигӣ масъулияти баланд дорад. Зеро агар варзишгар дар мусобиқаҳо танҳо назди худ масъулият эҳсос кунад, сармураббӣ ҳам назди худ ва ҳам назди дастааш масъулият дорад.

- Дастаи гимнастикаи бадеии кишвар то имрӯз ба чӣ дастовардҳо ноил гардидааст?

- Гимнастикаи бадеӣ солҳои охир натиҷаҳои назаррас дорад. Албатта, барои пешрафти фаъолияти Муассисаи давлатии “Мактаби махсуси варзишии захираҳои олимпӣ – 1” оид ба гимнастикаи бадеӣ Ҳукумати Ҷумҳурии Тоҷикистон ва идораҳои марбута пайваста дастгирӣ менамоянд. Инчунин, саҳми директори муассиса Шин Виолетта Илинична барои дар мусобиқаҳои байналмилалӣ баромад намудани гимнастикҳо назаррас аст.

Дастовардҳо хеле зиёданд. Аз ҷумла, дар мусобиқаи байналмилалӣ таҳти унвони “Ғунча”, ки дар шаҳри Тошкенти Ҷумҳурии Узбекистон 23 апрели соли 2023 баргузор гардида буд, дастаи сармураббӣ Шин Виолетта соҳиби ду медали тилло ва се медали нуқра гаштанд. Соли 2022 бошад, дастаи мо 24-25 август дар мусобиқаи байналмилалӣ оид ба гимнастикаи бадеӣ “East Cup Olympic Stars” (“Ҷоми Шарқ-ситораҳои олимпӣ) дар Узбекистон иштирок варзида, як медали тилло, панҷ медали нуқра ва чор медали биринҷӣ ба даст овард.

Дастоварди аз ҳама бузургу назарраси гимнастчиёни мо ин дар мусобиқаи кушоди байналмилалӣ дар шаҳри Тошканти Ҷумҳурии Узбекистон буд. Ин мусобиқа 5-6 марти соли 2022 зери унвони “Ситорачаҳои булӯрин” доир шуда, дар он мо соҳиби 14 медали тилло гаштем, ки ифтихорафзост.

- Имрӯз баъзан мушоҳида мешавад, ки дар қабули духтарон ба варзиши гимнастикаи бадеӣ мушкилот ҷой дорад.

- Дар мо падару модар пӯшидани либосҳои махсуси гимнастикаи бадеиро намеписанданд. Аз ин рӯ, дар синну соли болотар духтарон камтар ба мушоҳида мерасанд. Ҳоло хушбахтона, баъд аз муваффақиятҳои беназири гимнастдухтарон, майлу рағбати волидон ва дигар духтарон ба ин намуди варзиш зиёд шуда истодааст.

Мо ба ояндаи дурахшони ин намуди варзиш некбин ҳастем.

Фараҳноз САФАРОВА,
“ҶТ”