ҶАВОНОН
Якшанбе 28 Ноябр 2021 08:13
8331

Табрикоти Абдулло Раҳмонзода, раиси Иттифоқи ҷавонони Тоҷикистон бахшида ба 30-солагии Иттифоқи ҷавонони Тоҷикистон


Дӯстони азиз!

Аъзои ҷавони Иттифоқи ҷавонони Тоҷикистон!

Пеш аз ҳама ҳар яки шумо ва дар симои шумо тамоми мардуми шарифи Тоҷикистонро ба ифтихори ҷашни бузурги миллӣ, 30-солагии Истиқлолияти давлатӣ ва 30-юмин солгарди таъсис-ёбии Иттифоқи ҷавонони Тоҷикистон сидқан табрик менамоям.

Воқеан, таҷрибаи солҳои охир дар ҷаҳони муосир нишон медиҳад, ки ба дастовардҳои сиёсиву иқтисодӣ ва инкишофи устувори ҷомеа танҳо кишварҳое муваффақ гардидаанд, ки ба масъалаи ҷавонон таваҷҷуҳи хосса зоҳир намуда, аз имкониятҳои фаровони ақлонӣ ва ҷисмонии онҳо самаранок истифода кардаанд.

Дар ҳамин радиф ҷавонон, ки аксарияти аҳолии кишварро ташкил медиҳанд, дар маркази таҳаввулоти хеле ҷиддӣ ва муҳим дар ҷомеа, бозсозии иқтисодӣ, истиқлолияти миллӣ ва эҳёи ҷомеаи шаҳрвандӣ қарор гирифтаанд.

Аз ин рӯ, нақши ҷавонон дар ташаккули муносибатҳои идорӣ ва рушди ҷомеаи шаҳрвандӣ, барои кишвари мо, хеле муҳим, арзишманд ва таҳкимбахш арзёбӣ мегардад. Воқеан, ҳам дар ташаккули муносиботи идорӣ ва ҳам дар созмондиҳии институтҳои демократӣ – шаҳрвандӣ ҷавонон ҳамчун иштирокчии фаъол ва ҳаракатдиҳанда баромад кардаанд.

Зеро Ҷумҳурии Тоҷикистон бо сиёсати хирадмандона ва дурандешонаи Пешвои муаззами миллат, муҳтарам Эмомалӣ Раҳмон ва иродаи мустаҳками халқи шарифи Тоҷикистон роҳи дурусти тараққиёти худ бунёди давлати соҳибихтиёр, демократӣ, хуқуқбунёд, дунявӣ ва ягонаро интихоб намудааст. Дар ин замина, ҷалб намудани неруи созандаи ҷавонон дар пешрафти давлати демократӣ ва ҷомеаи шаҳрвандӣ хеле муҳим ва ногузир мебошад.

Иттифоқи ҷавонони Тоҷикистон, ки аз таъсисёбии он 30 сол пур мешавад, аз мавқеъ ва ҳадафҳои иҷтимоии он аксарияти ҷавонони Тоҷикистон ҷонибдорӣ мекунанд, ворис ва давомдиҳандаи иқдоми неки наслҳои шарафманди ҷавонони Тоҷикистон буда, барнома ва ҳадафу мақсадҳои он дар тарбия ва ташаккули насли ҷавони кишвар дар рӯҳияи худшиносию худогоҳии миллӣ, ватандӯстӣ, таҳкими сулҳу субот, бунёди ҷомеаи демократӣ, ҳифзи арзишҳои миллӣ ва дастовардҳои даврони соҳибистиқлолии кишвар саҳми назаррас гузоштааст.
Давоми 30 соли фаъолияти худ Иттифоқи ҷавонони Тоҷикистон, ҳамчун ниҳоди ҷомеаи шаҳрвандӣ дар баробари ҳизбҳои сиёсӣ тавонист, аз ташаббуси пешбарии номзад ба мансаби Президенти Ҷумҳурии Тоҷикистон фаъолона ва бо дастгирии аксарияти ҷавонони кишвар истифода бурда, сиёсати пешгирифтаи Пешвои муаззами миллатро мунтазам дастгирӣ карда, аз ташаббусҳои созандаи давлату Ҳукумати кишвар ва таъмини нақши устувори ҷавонони тоҷик дар пешрафт ва шукуфоии Тоҷикистони азиз ҳамовозӣ намояд.

Ҳамчун ниҳоди ҷомеаи шаҳрвандӣ — Иттифоқи ҷавонони Тоҷикистон ҳадафи худро, иштирок дар тарбияи насли наврас, мусоидат ба пешрафту тараққиёти сиёсӣ, иқтисодӣ ва иҷтимоии кишвар, пешгирии зиддиятҳо ва ихтилофоти сиёсии дохилӣ, бедории ҳисси баланди худшиносии миллӣ ва номуси ватандории ҷавонон, таҳкими сулҳу ваҳдати миллӣ, бунёди ҷомеаи демократӣ, ҳифзи истиқлолияти Тоҷикистон ва муаррифии он дар ҷаҳони мутамаддин, муқаррар намудааст.

Айни замон роҳбарияти ИҶТ кӯшиш ба харҷ дода истодааст, ки обрӯ ва нуфузи ин созмонро ҳамчун ниҳоди инъикоскунандаи иродаи ҷавонони кишвар барои марҳилаҳои минбаъда боло барад.

Дар ин росто маълум менамоем, ки бори аввал дар Дастгоҳи марказӣ, вилоятӣ ва шаҳрии Иттифоқ кормандон бо штати корӣ таъмин шуда, фаъолиятро оғоз намуданд.

Айни ҳол Иттифоқ дар тамоми шаҳру ноҳияҳои кишвар намояндагии худро расман ба қайд гирифта, дорои 937 ташкилоти ибтидоӣ ва 70445 аъзои расмӣ мебошад.

Яке аз дастовардҳои бузурги даврони соҳибистиқлолӣ ташаккул ёфтани сиёсати давлатии ҷавонон бо амалӣ гардидани мақсадҳои Иттифоқи ҷавонони Тоҷикистон ва тадриҷан фароҳам овардани имкониятҳои васеи рушди такомули ҷавонон дар шароити мураккаби тағйирёбии сохториву ҷамъиятӣ арзёбӣ мегардад.

Шароитҳои фароҳамоварда-шуда бошад, баҳри рушду инкишофи имкониятҳои зеҳнӣ, ҳамчун як шахси комил бо донишҳои замонавӣ мусаллаҳ гардидани насли наврасу ҷавони кишвар мусоидат намуд, ки ин дар навбати худ дар замири онҳо қобилиятҳои нави инсониро кашф ва боварию эътимодашонро ҷиҳати анҷоми корҳои созандагӣ ба маротиб боло бурд.

Мусаллам аст, ки имрӯз бо такя ба қувва ва неруи ҷавонон мо ҳадафҳои бунёдкоронаи имрӯзаю ояндаи худро баҳри татбиқи босамари сиёсати давлатии ҷавонон ба нақша мегирем ва ҷиҳати ноил гардидан ба он тамоми қувва ва тавони худро сафарбар намуда истодаем.

Ҳукумати мамлакат бо мақсади дастгирӣ ва ҳавасмандгардонии ҷавонони лаёқатманду соҳибмаъ-рифат ва ватандӯсту хештаншинос дар даврони соҳибистиқлолии кишвар аз тамоми имкониятҳо истифода намуда истодааст.

Аз ҷумла: маблуғгузории фаъолияти соҳаи сиёсати давлатии ҷавонон тавассути барномаҳои соҳавӣ, дар тақвими санаҳои таърихӣ ворид гардидани рӯзи 23 май - Рӯзи ҷавонони Тоҷикистон, таъсис ёфтани Ҷоизаи ба номи И. Сомонӣ барои олимони ҷавоне, ки дар соҳаи илму техника, ки корҳои намоён анҷом додаанд, таъсис ёфтани стипендияҳои президентӣ барои хонандагону донишҷӯёни муассисаҳои таҳсилоти умумӣ, ибтидоӣ ва миёнаи касбӣ ва тадриҷан зиёд намудани маблағи стипендия ва шумораи онҳо, таъсис ёфтани стипендияи байналмилалии “Дурахшандагон” барои донишҷӯёни тоҷике, ки дар хориҷи кишвар ба таҳсил фаро гирифта шудаанд, таъсиси квотаҳои президентӣ, ҷудо намудани грантҳои Ҳукумати Ҷумҳурии Тоҷикистон барои иттиҳодияҳои ҷамъиятӣ дар соҳаи тарбияи ватанпарастии ҷавонон, таъсисёбӣ ва баргузории ҷаласаи нахустини Шӯрои миллии кор бо ҷавонон дар назди Президенти Ҷумҳурии Тоҷикистон, ҷавоникунонии сиёсати кадрӣ ва дар зинаҳои роҳбарикунанда таъин гардидани шумораи зиёди ҷавонони лаёқатманд, азнавсозӣ ва ободу зебо гардонидани боғҳои фарҳангӣ, бунёду мавриди баҳрабардорӣ қарор додани марказҳои ҷавонон дар шаҳру ноҳияҳои ҷумҳурӣ, инчунин сохтмони мактабу донишгоҳҳо ва китобхонаҳои сатҳи байналмилалӣ, толорҳои варзишӣ, мавзеву гулгаштҳои фароғатӣ, бунёди майдончаҳои варзишии муҷаҳҳаз бо талаботи замони муосир ва эълон гардидани соли 2017 “Соли ҷавонон” аз тадбирҳои муҳим ва дастовардҳои назаррас дар татбиқи сиёсати давлатии ҷавонон маҳсуб меёбанд.

Ҳамаи ин дастовардҳо бо шарофати Истиқлолияти давлатӣ муяссар гардидааст. Зеро Истиқлолияти давлатӣ арзишмандтарин дастоварди миллӣ маҳсуб мешавад, ки кишвари моро ҳамчун давлати соҳибихтиёри миллӣ ва пуштибону ҳимоятгари ҷавонон ба ҷаҳониён муаррифӣ кардааст.

Дар ин радиф, аз номи кулли ҷавонони кишвар пешниҳод гардидан ва ҳамасола таҷлил намудани рӯзи 16 ноябр – Рӯзи Президенти Ҷумҳурии Тоҷикистон аз ташаббусҳои наҷиби Иттифоқи ҷавонони Тоҷикистон дар ҳамбастагӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон маҳсуб меёбад.

Иштироки фаъолонаи ҷавонон дар маъракаҳои муҳими сиёсӣ, аз ҷумла интихобот бозгӯи садоқатмандии онҳо баҳри рушди оянда ва босуботи Тоҷикистон мебошад.

Албатта, нақши Иттифоқи ҷавонони Тоҷикистон ҳамчун неруи муттаҳидкунандаи ҷавонони кишвар дар барқарории сулҳу субот, таҳкими дӯстиву рафоқат, тарғиби солимиву тавонмандӣ, рушди илму техника ва дигар бахшҳои ҳаёти ҷомеа хеле назаррас маҳсуб меёбад. Бесабаб нест, ки зимни суханронии ҳикматбори хеш ба фаъолияти ин ниҳоди ҷамъиятӣ дар вохӯрӣ бо намояндагони ҷавонони мамлакат 21 майи соли 2005 Пешвои ҷавонпарвари миллат муҳтарам Эмомалӣ Раҳмон бамаврид таъкид намуданд, ки “Ташкилоти нисбатан бонуфузи ҷавонон Иттифоқи ҷавонони Тоҷикистон буда, имкониятҳои иттифоқи мазкур барои ба ватандӯстиву ватанпарастӣ, худшиносиву худогоҳӣ ва корҳои созандагиву бунёдкорӣ ҳидоят намудани ҷавонон ниҳоят зиёд аст”.

Аз натиҷагирии фаъолияти Иттифоқи ҷавонони Тоҷикистон хулоса намудан мумкин аст, ки бо дарназардошти тадбирҳои андешидашуда ва фароҳам овардани шароит баҳри устуворгардонии ин ниҳоди бисёр ҳам муҳим, ҳоло ҳам ҷиҳати пурра амалӣ намудани ҳадафу мақсадҳои Барномаи Иттифоқ моро мебояд тибқи талаботи қонунгузорӣ аз роҳу усулҳо ва ғояи нав фаъолиятро дар ин самт боз ҳам ҷоннок намоем.

Дар маҷмӯъ, имрӯз мо бо боварӣ гуфта метавонем, ки Иттифоқи ҷавонони Тоҷикистон дар партави сиёсати бунёдкоронаи Пешвои муаззами миллат бо иқдомҳои созанда ва барномаҳои воқеии худ ҷавонони кишварро ба хотири ободиву пешрафти Тоҷикистони азиз – Ватани маҳбуби ҳамаи мо чун ҳарвақта муттаҳиду сафарбар менамояд.
Мо ифтихорманд ва сарбаланд аз онем, ки ҷавонони саодатманди мо сазовори боварии боэътимоди Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон гардиданд.

Дар баробари ин, ҳоло дар назди ҷавонон масъалаҳое қарор доранд, ки дар замони ҷаҳонишавӣ дарку ҳалли онҳо аз ҷавонони мо дониши амиқ, ҷаҳонбинии замонавӣ ва муҳимтар аз ҳама, ҳисси баланди миллӣ, худогоҳиву худшиносӣ ва самимона дӯст доштани Ватанро талаб менамояд.

Танҳо ва танҳо бо қалб парастидани ҳар як зарра хоку гулу гиёҳи ин сарзамини муқаддас ва ҳисси беинтиҳову беназири ватандӯстӣ имкон медиҳад, ки бар зидди тамоми зуҳуроти номатлуби ҷомеаи ҷаҳонӣ истодагарӣ намоем, масъулияти бузурги таърихӣ ва қарзи пурифтихори фарзандии худро адо намуда, ҷомеаи худро ба пеш ба сӯйи ободиву пирӯзиҳои нав устуворона равона созем.

Ман бовар дорам, ки ҷавонони кишвар аз уҳдаи иҷрои ҳама вазифаҳои дар наздашон гузошташуда сарбаландона мебароянд ва минбаъд низ кӯшиш мекунанд, ки ба нафъи давлату ҷомеа боз ҳам содиқона хизмат намоянд. Зеро ҷавонон борҳо собит намудаанд, ки дар ҳақиқат пайравони асили Пешвои миллат буда, дар иҷрои ҳама кору масъулият, новобаста аз душвориҳои шароити ҷаҳонишавӣ ва таъсири дигар омилҳои беруна қодиру тавоноянд.

Ман ба ҷавонон итминони комил дорам ва ифтихор мекунам, ки имрӯз ҷавонони мо дар дигаргунсозиҳои ҷомеаи навин фаъолона иштирок карда, дар муаррифии давлати тоҷикон ва баланд бардоштани Парчами Тоҷикистон дар арсаи ҷаҳонӣ, ҳамчун идомадиҳандагони наслҳои гузашта, махсусан шумо, собиқадорони соҳаҳои мухталиф нақши шоиста мегузоранд.

Бори дигар ба ҳар яки шумо ҷашни 30-солагии Иттифоқи ҷавонони Тоҷикистонро, ки ба 30 - солагии Истиқлоли миллӣ рост омад, сидқан табрик намуда, ба ҳар яки шумо пеш аз ҳама саломатӣ, иқболи накӯ, тифоқӣ ва ба Тоҷикистони азизамон амну осоиштагӣ ва сулҳи пойдорро хоҳонам.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

Ноябр 2021 c.