Имрӯз масъулини комиссариати ҳарбӣ ва мақомоти иҷроияи ҳокимияти давлатии шаҳри Норак нақшаи тирамоҳии даъват ба сафи Артиши миллиро 100% иҷро намуданд. Тавре АМИТ “Ховар” иттилоъ медиҳад, ҷавонони ватандӯсту хештаншиноси ин шаҳр ба таври ихтиёрӣ ба хизмати ҳарбӣ сафарбар гардидаанд.

Бино ба иттилои манбаъ, ба ин муносибат дар толори муассисаи таълимии рақами 28-и шаҳри Норак бо иштироки раиси шаҳр Маликшо Неъматзода, намояндагони мақомоти ҳифзи ҳуқуқ, падару модарон ва даъватшавандагон маросими тантанавӣ оид ба даъвати тирамоҳии ҷавонписарон ба сафи Қувваҳои Мусаллаҳи Ҷумҳурии Тоҷикистон доир гардид.

Тибқи иттилои масъулини шаҳри Норак, аз шумораи умумии сафарбаршудагон 30 нафар курси ронандагӣ ва 18 нафар курсҳои барқчӣ ва харротро хатм намуда, соҳиби шаҳодатномаҳои касбӣ гардидаанд.