Бахшида ба Рӯзи Конститутсия ва “Ҳафтаи хобгоҳ” дар хобгоҳҳои №1 ва 2 – и донишҷӯёни Донишгоҳи давлатии Хоруғ ба номи Моёншо Назаршоев (ДДХ) чорабиниҳои маърифатӣ, фарҳангӣ ва варзишӣ доир мегарданд.

Тавре мудири Шуъбаи кор бо ҷавонони донишгоҳ Дидоршоҳ Насриддинов иттилоъ дод, ба чорабиниҳо зиёда аз 600 нафар муҳассилину ҷавонон ҷалб гардида, онҳо то рӯзи шанбеи ҳафтаи ҷорӣ идома меёбанд.

Ҳоло бозиҳои шавқовар аз қабили давидан бо ракеткаи теннис, ба нишон расондани тӯб, пуфакбозӣ ва ғайра миёни дастаҳои “Хирад” - у “Далер” баргузор шуданд.

Аз рӯи натиҷаҳои умумӣ “Далер” бо бартариҳои зиёд бар дастаи рақиб пирӯз шуда, ҷои аввалро ишғол намуд.

Дар шоҳмотбозӣ бошад 14 бозингар бо ҳам рақобат карданд. Аз миёни онҳо Бахдавлат Бахдавлатов, донишҷӯи курси 4 – и факултети биологияи ДДХ ҷойи якум ва Иқболшоҳ Лутфуллоев, донишҷӯи курси 2 – и факултети забонҳои хориҷии донишгоҳ зинаи дуюмро соҳиб гаштанд.

Ғолибон бо мукофоту ифтихорномаҳои шуъба қадрдонӣ карда мешаванд.