Имрӯз, 20 октябр, дар Кумитаи ҷавонон, варзиш ва сайёҳӣ, даври ниҳоии озмуни ҷумҳуриявии “Донишҷӯи сол-2016” оғоз гардид.



Ҳабибулло Амирбекзода, муовини раиси Кумитаи ҷавонон, варзиш ва сайёҳӣ донишҷӯёнро бо тартиби баргузории озмун шинос намуда, иброз дошт: “Ҳукумати ҷумҳурӣ бо мақсади ҳалли масоили ҷавонон ва насли наврас аз оғози истиқлолият то имрӯз ҳамаи чорабиниҳои заруриро амалӣ карда истодааст. Зеро ҷавонони солим ва соҳибкасбу ихтисосманд давомдиҳандаи кору фаъолияти насли калонсол, нерӯи созанда ва иқтидори воқеии пешрафти ҷомеа ва ояндаи миллат ва давлат мебошанд. Дастгириву ҳавасмандсозӣ ва ғамхорӣ дар ҳаққи насли ояндасози миллат дар меҳвари асосии сиёсати созандаи Пешвои миллат, муҳтарам Эмомалӣ Раҳмон қарор дошта, ҷавобан ба ин ҷавонон низ бо илму дониш, азму иродаи қавӣ дар рушду инкишофи ҷомеа Тоҷикистон ҳиссагузор ҳастанд”.

Ҳадаф аз озмуни мазкур дастгирӣ ва ҳавасмандгардонии ҷавонони донишҷӯ, муайян намудани донишҷӯи беҳтарин дар самти илмомӯзӣ, фарҳангдӯстӣ, хештаншиносӣ, меҳанпарастӣ ва иштироки фаъолонаи онҳо дар ҳаёти сиёсӣ ва ҷамъиятӣ, ғанӣ гардонидани сатҳи ҷаҳонбинӣ ва маърифатнокии донишҷӯён ва таҳким бахшидани тарбияи маънавию ахлоқии ҷавонон мебошад.

Дилноза Аҳмадзода, сардори Раёсати кор бо ҷавонони Кумитаи ҷавонон, варзиш ва сайёҳӣ зикр кард, ки донишҷӯйи сол бо тартиби зерин муайян мегардад:
- худмуаррифии иштирокчӣ (бо истифодаи усулҳои наву замонавӣ - слайд презентатсияҳо);
- саволу ҷавоб вобаста ба мавзуъҳои ихтисосӣ, дастовардҳои даврони соҳибистиқлолӣ;
- навиштани кори хаттӣ (бо забони давлатӣ) вобаста ба мавзӯи сиёсати давлатии ҷавонон.

Аз рӯйи тартибот имрӯз донишҷӯён дар мавзӯи “Ҷавонон - пайрави Пешвои миллат ва муҳофизи дастовардҳои Истиқлолияти давлатӣ” иншои озод навиштанд. Озмун фардо идома меёбад.

Хотиррасон мекунем, ки даври аввали озмун дар муассисаҳои таҳсилоти олии кишвар доир шуда, ғолибон дар даври ниҳоӣ иштирок доранд.