27–уми август дар “Кохи Афсарон”и пойтахти кишвар аз ҷониби Раёсати кор бо ҷавонон ва варзиши шаҳри Душанбе Фестивали дӯстии ҷавонону варзишгарони шаҳри Душанбе, таҳти унвони “Зебоӣ, доноӣ ва тавоноӣ аз варзиш аст!” баргузор гардид.

Фестивали мазкур бо дастгирии Мақомоти иҷроияи ҳокимияти давлатии шаҳри Душанбе баргузор шуда, он бо мақсади иҷрои дастуру супоришҳои раиси шаҳри Душанбе муҳтарам Рустами Эмомалӣ, ки дар Иҷлосияи дуюми маҷлиси вакилони халқи шаҳри Душанбе, даъвати шашум баён намуда буданд, оғоз шуд.

Дар фестивал Муинӣ Мавсума Муинзода, муовини раиси шаҳри Душанбе, Латофат Назирӣ, муовини вазири маориф ва илми кишвар, Назарзода Ризо Шодӣ, муовини раиси Кумитаи кор бо ҷавонон ва варзиши кишвар, Шоҳзод Раҳимзода, сардори Раёсати кор бо ҷавонон ва варзиши шаҳри Душанбе, инчунин устодону донишҷӯён ва варзишгарони кишвар иштироку суханронӣ намуданд.

Қабл аз оғози фестивали мазкур тамоми дастовардҳои соҳаи варзиши пойтахт аз ҳисоби тамрингарони муассисаҳои варзишӣ, донишгоҳу донишкадаҳо, коллеҷу омӯзишгоҳҳо ва муассисаҳои таҳсилоти миёнаи умумуӣ ба иштирокчиён намоиш дода шуд.



Таъкид гардид, ки мақсад аз ташкил ва баргузор намудани Фестивали дӯстии ҷавонону варзишгарони шаҳри Душанбе самаранок истифода намудани иншоотҳои соҳаи варзиш, махсусан майдончаҳои варзишӣ ва бозии кӯдакона, пешбурди корҳои фаҳмондадиҳӣ бо сокинон ва наврасону ҷавонон ҷиҳати тозаву озода ва дар ҳолати коршоям нигоҳ доштани майдончаҳои мазкур, ташкили мусобиқаҳои дӯстонаи варзишӣ байни ҷавонони маҳал, хонандагону донишҷӯён, афсарону сарбозон ҷиҳати таҳкими тарзи ҳаёти солим, ҷалби ҷавонон ба варзиш, пешгирии бемориҳои сироятӣ, хосатан пешгирии наврасону ҷавонон аз амалҳои номатуби иҷтимоӣ ва тарбия намудани онҳо дар рӯҳияи ватандӯстию хештаншиносӣ ва ҳушёрию зиракӣ мебошад.

Лозим ба зикр аст, ки фестивали мазкур аз чор қисмат иборат буда, қисмати аввали онро маросими ифтитоҳӣ дар бар гирифта, қисмати дуюму сеюми он аз рӯи намуди варзиши футболи хурд байни ҷавонписарон, волейбол байни ҷавондухтарон, шоҳмот ва гӯштини миллӣ дар ду марҳила баргузор мегардад. Марҳилаи якум аз 27 август то 2 сентябри соли ҷорӣ ва марҳилаи дуюм бошад, аз 3 то 13 сентябри соли равон сурат мегирад.

Дар ҷамъбасти маросими ифтитоҳии фестивал номаи сипоси ҷавонону варзишгарони шаҳри Душанбе ба Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба муносибати ифтитоҳи Қасри теннис ва Маҷмааи варзишии обии шаҳри Душанбе, инчунин изҳори сипосу миннатдории ҷавонону варзишгарони шаҳри Душанбе ба раиси шаҳри Душанбе муҳтарам Рустами Эмомалӣ барои дастгирии ҳамешагии ҷавонону варзишгарон қироат   гардид.