ҶАВОНОН
Чоршанбе 17 Август 2022 05:37
3372
Кумитаи кор бо ҷавонон ва варзиши назди Ҳукумати ҷумҳурӣ дар доираи дастуру супоришҳои Пешвои миллат, муҳтарам Эмомалӣ Раҳмон баҳри ташаккули идрок, зеҳн, малака ва савияи дониши наврасону ҷавонон иқдомҳои наҷибро ҳамасола роҳандозӣ менамояд.

Имрӯз, 25 август, бо ташаббуси Кумитаи кор бо ҷавонон ва варзиш дар КВД Маркази ҷумҳуриявии фарҳангии ҷавонон “Ориёно” бо ҷалби ҷавонону наврасон аз чор ноҳияи шаҳри Душанбе курсҳои бозомӯзӣ ба тариқи роёгон оғоз шуд. Ин курсҳои омӯзишӣ се моҳ идома меёбанд, ки дар доираи онҳо ба ҷавонон забонҳои русию англисӣ, барномасозии компютери, маърифати оиладорӣ, қаннодӣ ва зебоипарастӣ омӯзонида мешаванд.

Раиси Кумитаи кор бо ҷавонон ва варзиш Аҳтам Абдуллозода зимни ифтитоҳи курсҳои омӯзишӣ ба ҷавонон таъкид намуд, ки вақти худро босамар гузаронида, курсҳоро хуб аз худ намоянд: “Ин барои шумо бисёр як фурсати хуб аст. Ҳар фард дар айёми ҷавонӣ зеҳну хотираи қавӣ дорад, ки метавонад дар муддати кӯтоҳ дилхоҳ барнома ва ё забонро аз худ намояд”.

Ба гуфтаи директори КВД Маркази ҷавонони шаҳри Душанбе Самандар Абдуллозода ҳамасола аз ҷониби Кумитаи кор бо ҷавонон ва варзиш баҳри татбиқи босамари сиёсати давлатии ҷавонон дар тамоми манотиқи кишвар барои наврасону ҷавонон чунин курсҳои кӯтоҳмуддати омӯзишӣ ба хотири аз худ намудани забонҳои хориҷӣ, кор бо барномаҳои компютерӣ ва технологияҳои муосир, барои ҷавондухтарон роҳандозӣ намудани курсҳои кӯтоҳмуддати пазандагӣ, дӯзандагӣ, адрасу атласбофӣ, қолинбофӣ ва дар маҷмуъ ҳунарҳои мардумӣ ва ҳунарҳое, ки метавонанд бевосита дар рушду малакаи ҷисмонию зеҳнии ҷавонон мусоидат намоянд, ба роҳ монда мешавад: “Ин курсҳо аз ҷониби Кумита дар доираи Барномаи миллии рушди иҷтимоии ҷавонон ва даҳ самти афзалиятноке, ки барои татбиқи сиёсати давлатии ҷавонон пешбинӣ гардидааст, роҳандозӣ мегарданд. Иқдоми мазкур метавонад, дар мустаҳкамкунии ҳаёти иқтисодию иҷтимоии наврасону ҷавонон саҳми беназир гузорад”.

Тавре мавсуф дар идомаи суҳбат изҳор дошт, айни замон донистани забонҳои хориҷӣ бисёр муфид ва даркорист. Чунки раванди ҷаҳонишавӣ тақозо менамояд, ки барои муаррифӣ намудани арзишҳои муқаддаси давлату миллатамон бояд ҳар як ҷавон ва умуман сокинони кишвар забонҳои хориҷиро донанд.

Баъд аз ифтитоҳи курсҳои кӯтоҳмуддати омӯзишӣ дар толори КВД Маркази ҷумҳуриявии фарҳангии ҷавонон “Ориёно” суҳбати раиси Кумита Аҳтам Абдуллозода бо ҷавонони фаъол ва донишҷӯёни донишгоҳҳои пойтахт доир гардид. Аҳтам Абдуллозода зимни суҳбат дар баробари дигар мавзӯҳои ба ҳаёти ҷавонон марбут ба татбиқ ва риояи Қонуни Ҷумҳурии Тоҷиикистон “Дар бораи танзими анъана ва ҷашну маросимҳо дар Ҷумҳурии Тоҷикистон” махсус ишора намуд: “Ҳадаф аз қабули Қонуни мазкур рушди босуботи ҷомеа, танзими анъана ва ҷашну маросимҳто, ҳифзи фарҳанги миллӣ ва эҳтиром ба суннатҳои мардумӣ гузоштан аст. Инчунин, он барои баланд бардоштани сатҳи иҷтимоию иқтисодӣ ва тарбияи маънавии шаҳрвандони кишвар равона карда шудааст”.

Раиси Кумитаи кор бо ҷавонон ва варзиши мамлакат ҳамчунин афзуд, ки “Ин қонун аз ҷумлаи қонунҳоест, ки барои беҳтар шудани шароити худи шаҳрвандон пешбинӣ гаштааст. То имрӯз дар миёни сокинон як силсила расму одатҳои мардумию хурофотӣ амал мекарданд, ки хароҷоти миёншикан ва ташвишҳои зиёдатиро бар души соҳибмаърака бор мекарданд. Масалан, маросимҳои хостгорию ноншиканон, фотиҳатӯю сандуқбарон, сарупобинону ордбезон, чойгаштаки духтарону базми дӯстони домод, ақди кикоҳи давлатию динӣ, оши наҳор аз ду тараф, маҳфил дар тарабхона, рӯбинон, домодталбон, шаҳтоз ва дигар маросимҳои зиёдатӣ гузаронида мешуданд, ки хароҷоти калонро талаб мекарданд. Вақти он расидааст, ки ҳамаи мо дар якҷоягӣ ба ин гуна маъракаю маросимҳои зараровар хотима диҳему фарзандонамонро ба омӯзиши илму дониш ва касбҳои ба замони муосир ҷавобгӯ ҷалб намоем”.

Хуршед МАВЛОН, “ҶТ”












Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Август 2022 c.