1 май, ҳамчун рӯзи оғози моҳвораи ҷавонон раиси шаҳри Бӯстон Раъно Ҳошимзода, бо ҷавонон-ғолибони озмунҳо ва олимпиадаҳои байналмилалӣ, варзишгарони беҳтарин ва дигар қишри ҷавонон мулоқот баргузор намуд.

Нахуст роҳбари шаҳр оид ба дастгирии давлатии ҷавонон ибрози назар намуда, қайд кард, ки дар замони соҳибистиқлолии кишвари маҳбуб бо ибтикор ва дастгирии бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъалаи дастгирии давлатии ҷавонон таваҷҷуҳи хоса зоҳир гардида, раванди ҷалби бештари онҳо ба мақомҳои роҳбарикунанда ва фаъолият дар ниҳодҳои давлативу ҷамъиятӣ таваҷҷуҳи бештар зоҳир гардида истодааст.

Зикр карда шуд, ки бо дастури раиси вилояти Суғд муҳтарам Раҷаббой Аҳмадзода 1 май ҳамчун оғози рӯзи моҳвораи ҷавонон баргузории мулоқоти роҳбарияти мақомоти иҷроияи ҳокимияти давлатии шаҳру ноҳияҳо сурат гирифта, баҳри бори дигар бархурдор намудани ҷавонон аз ғамхории давлату Ҳукумат иқдомҳои судманд рӯи кор гирифта шуда истодааст.

Дар интиҳо Раъно Ҳошимзода ба масъулини мақомоти иҷроияи ҳокимияти давлатии шаҳр ва дигар сохторҳо ҷиҳати вусъати дастгирии ҳамешагии ҷавонон ва мусоидат ба роҳандозии ташаббусҳои созандаи онҳо дастуру супоришҳои мушаххас дод.