Дар ҷомеаи имрӯза мавқеи ҷавонон дар пешбурди соҳаҳои мухталифи кишвар хеле муҳим аст, чунки ин қишри ҷомеа дорои афкори тозаю нав ва нерӯи созанда мебошад. Ба ҳамин хотир аст, ки ҳамасола Кумитаи ҷавонон ва варзиш барои ин қишри ҷомеа озмуну маҳфилҳои гуногун барои сайқал додани донишашон роҳандозӣ мекунад. Озмуни ҷумҳуриявии "Донишҷӯи сол" низ ҳамасола аз тарафи Кумитаи кор бо ҷавонон ва варзиш баргузор карда мешавад. Озмун 20-уми декабр ифтитоҳ ёфта, даври аввалаш дар ҳамин рӯз сурат гирифт.

Дар даври аввали озмун 20 нафар донишҷӯён аз донишгоҳу донишкадаҳои мамлакат иштирок карда, дар мавзӯи "Тоҷикистон ватани азизи ман" иншо навиштанд.

Дар даври дуюми озмун ҳар як донишҷӯ презентатсияи инфиродӣ намоиш дода, баъдан натиҷаи озмун, яъне “Донишҷӯи сол” муайян карда шуд.

Донишҷӯёне, ки иштирокчии озмун буданд, рафти онро хеле шаффоф ва одилона арзёбӣ намуданд.

Нилуфар Бердиева, донишҷўи курси 3-и факултаи филологияи рус ва журналистикаи Донишгоҳи славянии Россия ва Тоҷикистон, ихтисоси рӯзноманигори байналмилалӣ, яке аз иштирокчиёни фаъол ба назар мерасид ва кӯшиш мекард ба ҳамаи суолҳои ҳакамон ба пуррагӣ ҷавоб пешниҳод намояд. Нилуфар озмуни мазкурро барои сайқал додани дониш ва талошҳои илмӣ саривақтӣ хонд. “Барои ба чунин озмунҳо омадан донишҷӯ ҳатман бо тайёрии хуб меояд. Ва ин озмунҳо сабабгор мешаванд, ки мо бори дигар китобҳои лозимиро варақгардон намоем ва барои худ боз як иттилоъ ё маълумоти дигар бигирем. Дар озмун ҳакамон ба донишҷӯён суолҳои зиёд медоданд ва аз мо ҷавоби мукаммалро интизор буданд. Фикр мекунам ҳакамон ба ҳама посухҳои донишҷӯён баҳои сазовор доданд”.

Сорбон Сахиев, ки донишҷўи курси 4-и факултети филологияи хориҷии Донишгоҳи давлатии Кўлоб ба номи А. Рўдакӣ мебошад, аз дӯстӣ пайдо кардан бо дигар донишҷӯён хушбахт буд. Сорбон гарчанде бо тайёрӣ ба озмун омада бошад ҳам, вале баъди шиносоӣ бо ҳамсолонаш чунин эҳсос мекунад, ки ӯ аллакай ғолиб аст. Яъне барои худ дӯстони нав ва хубро пайдо кард. Сорбон, изҳор дошт, ки “ин озмун ҷавононро боз ҳам муттаҳид ва муносибати байни моро қавитар мекунад. Имрӯз мо аз ҳар минтақаи Тоҷикистон ба ин даргоҳ бо мақсади ғолиб омадан дар озмун омадем, аммо баъди вохӯрӣ ҳама ин мақсадро фаромӯш карда, ба ягдигар барор ва сазовор гардидан ба ҷойи намоёнро орзу мекунем”.

Ба гуфтаи масъулон, ки озмун нисбат ба солҳои қаблӣ хубтару беҳтар ба роҳ монда шуда, донишҷӯён низ фаъол, зирак ва ба худ боварии комил доранд. Ҳамин боварӣ ба худ онҳоро имрӯз водор кардааст, ки аз ноҳияҳои дурдаст дар озмуни “Донишҷӯи сол” иштирок варзанд.

Нозила Каримова, яке аз он иштирокчиёне ҳаст, ки аз шаҳри Хуҷанд барои санҷидани дониши худ ба пойтахт омада, иштирок намудан дар ин озмунро ифтихор медонад. Нозила, донишҷўи курси 3-юми факултаи иқтисод ва идораи Донишгоҳи давлатии ҳуқуқ, бизнес ва сиёсати Тоҷикистон мебошад. Ба гуфтаи Нозила чунин озмунҳо ба онҳо имконият медиҳанд, ки ҷаҳонбинии онҳо боз ҳам васеътар гардад. “Чунин озмунҳо имконият медиҳанд, ки ҳисси ватандӯстиву ватанпарварии ҷавонон бештар гардад. Ва мо ҷавонон бояд дар ҳама ҷанбаҳо бо масъулияти баланд фаъолият намуда, парчамбардори ин сарзамин ва кишвари муқаддасамон бошем”.

Ҳакамон фаъолияти донишҷӯёнро ҳаматарафа баҳогузорӣ намуда, дар давраи ҷамъбасти озмун шаш нафар донишҷӯ сазовори ҷойҳои аввал, дуюм ва сеюм гардида, ҳафт донишҷӯи дигар бо ҷойҳои ифтихорӣ қадрдонӣ гардиданд.

Ҷойи аввал - Фарзона Восиева– донишҷўи курси 2 факултети забонҳои Осиё ва Аврупои Донишгоҳи миллии Тоҷикистон

Ҷойи аввал - Нилуфар Бердиева – донишҷўи курси 3 факултети филологияи рус ва журналистикаи Донишгоҳи славянии Россия ва Тоҷикистон –

Ҷойи дуюм – Нозила Каримова– донишҷўи курси 3 факултети иқтисод ва идораи Донишгоҳи давлатии ҳуқуқ, бизнес ва сиёсати Тоҷикистон

Ҷойи дуюм – Сайёра Гияева – донишҷўи курси 4 факултети забонҳои шарқи Донишкадаи давлатии забонҳои Тоҷикистон ба номи С. Улуғзода

Ҷойи сеюм – Албина Куканбекова – донишҷўи курси 3 факултети иқтисод ва бизнеси Донишгоҳи давлатии молия ва иқтисоди Тоҷикистон

Ҷойи сеюм – Сорбон Сахиев – донишҷўи курси 4 факултети филологияи хориҷии Донишгоҳи давлатии Кўлоб ба номи А. Рўдакӣ

Донишҷўёни зерин бо ҷойҳои ифтихорӣ кадрдонӣ карда шуданд:

Ашраф Муминов – донишҷўи Донишгоҳи техникии Тоҷикистон ба номи М. Осимӣ

Омина Сидиқова – донишҷўи Донишгоҳи давлатии омўзгории Тоҷикистон ба номи С. Айнӣ,

Ҳайдаралӣ Ашўров – донишҷўи Донишгоҳи давлатии Хуҷанд ба номи академик Б. Ғафуров,

Аминҷон Назаров– донишҷўи Донишкадаи идоракунии давлатии назди Президенти Ҷумҳурии Тоҷикистон,

Лутфулло Умаров - донишҷўи Донишгоҳи давлатии Данғара,

Шаҳноза Темурзода– донишҷўи Донишгоҳи давлатии тиҷорати Тоҷикистон

Шаҳноза Раҳмонова– донишҷўи Донишгоҳи технологии Тоҷикистон

Талошҳои пайвастаи ҷавонони имрӯзаи мо ҷиҳати иштироки фаъолона дар рушду нумӯи кишвари азизамон бовар бар он месозад, ки ҷавонони мо бо ҳисси баланди худшиносиву худогоҳии миллӣ ва ифтихор аз давлату давлатдории миллӣ дар оянда низ тамоми нерӯи худро барои ҳифзи дастовардҳои истиқлолият, таҳкими давлатдорӣ, ваҳдати миллӣ, сулҳу субот, рушди минбаъдаи иқтисодиву иҷтимоии Ватани азизамон ва устувор гардонидани мавқеи он дар қатори кишварҳои мутараққӣ сафарбар менамоянд.

Маврид ба ёдоварист, ки озмуни "Донишҷӯи сол" ҳар сол бо мақсади дастгирӣ ва ҳавасмандгардонии ҷавонон - муҳассилини макотиби олӣ ва муайян намудани донишҷӯи беҳтарин дар самти илмомӯзӣ гузаронида мешавад. Ҳадаф аз он таҳким бахшидани тарбияи маънавию ахлоқии ҷавонон мебошад.