ҶАВОНОН
Шанбе 18 Август 2018 04:01
4705
Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз 26 то 28 июл соли 2018 дар доираи барномаи “Ҳифзи иҷтимоии ҷавонон барои солҳои 2016-2018” семинари омӯзишии ҷумҳуриявӣ дар мавзӯи “Омода намудани кадрҳои хизмати давлатӣ аз ҳисоби ҷавондухтарони лаёқатманди ҷумҳурӣ” доир гардид. Дар семинари мазкур 33 нафар хизматчиёни ҷавон аз тамоми мақомоту идораҳои гуногуни ҷумҳурӣ ҷамъ омаданд. Дар семинар собиқадорони соҳаи хизмати давлатӣ, коршиносони соҳа, масъулони вазорату идораҳои марбута ва занони сиёсатмадоре, ки дар вазифаҳои гуногуни роҳбарикунанда фаъолият доранд, дарс гуфтанд.

Дар рӯзи якуми дарс раиси шурои собиқадорони Ҳизби халқии демократии Тоҷикистон, собиқ муовини сарвазири кишвар Руқия Қурбонова иштирок намуд. Ӯ ба дарсгирандагони ҷавон чунин гуфт: “Имрӯзҳо ман роҳбари як шӯрои бонуфуз - Шӯрои собиқадорони ҲХДТ-ро ба уҳда дорам. Ин боварии Сарвари давлат нисбат ба занон аст, моро дар чунин вазифаҳо мемонанд”.

Низорамоҳ Зарипова, собиқ раиси Кумитаи занон ва оилаи назди Ҳукумати Ҷумҳурии Тоҷикистон, яке аз арбобони собиқадори шинохтаи давлативу сиёсии кишвар, ки дар синни 94-солагӣ қарор дорад, дар семинар ширкат намуда, аз ҳаёту фаъолияти хеш дар замони шӯравӣ ва баъди пошхӯрии он - замони истиқлолият нақл кард: “Ман хеле хурд будам, ки аз падар ятим мондам ва тарбияро аз модарам гирифтам. Тули ҳаёту фаъолиятам бa чунин мукофотҳо қадрдони шудам: 2 ордени Ленин, 2 ордени меҳнати парчами сурх, 3 ордени “Нишони фахрӣ”, 4 медали СССР, Грамотаи Фахрии Президиуми Совети Олӣ, 3 медали ВДНХ, медали Комитети занон, 2 медали Комитети “Якдилӣ”, ордени “Лаос”, медали ҶБВ (1941-1945), барои фаолияти пурсамар унвони коргари хизматнишондодаи маданияти СССР.

Сайрам Бақозода, муовини аввали директори Агентии миллии итилооти “Ховар” дар рафти дарс таъкид намуд, ки шумо - ҷавондухтарони болаёқати кишвар, захираи кадрии ба шумор рафта, минбаъд дар минтақаҳое, ки зиндагӣ мекунед, ҳамчун хизматчии давлатӣ фаъолият намуда, сазовори ҳама бовариҳое, ки имрӯз Асосгузори сулҳу ваҳдати милли - Пешвои миллат муҳтарам Эмомалӣ Раҳмон ба мо - занон равона кардааст, гардед: “Набояд кори хона ба кори давлатии мо халал расонад. Агар мо хоҳем, ки дар ҷодаи интихобкардаамон муваффақ бошем, бояд вақти хешро дуруст тақсим карда тавонем. Дар ин ҳангом, мо хизматчии асили давлат шуда метавонем. Зимнан имрӯзҳо дар низоъҳое, ки дар баъзе кишварҳои дунё рафта истодааст, ҷабри зиёдро занону духтарон мебинанд, ин барои мо бояд дарс шавад,”-гуфт ӯ.

Муовини Ҳизби халқии демократӣ Раъно Бобоҷониён зимни суҳбат бо иштирокчиёни семинар иброз дошт, ки барои сиёсатмадор шудан, бояд ҳама вақт воқеаятро дар ҷои аввал гузорем. Дунёи сиёсати арсаи ҷаҳонӣ имрӯз дунёи мардона аст.

Шоми 26 июн, баъди ҷамъбасти рӯзи аввали семинар, бо ташаббуси волонтёрони Кумитаи кор бо ҷавонон ва варзиш дар ҳамбастагӣ бо иштирокчиёни семинар ва иштироки бевоситаи раиси кумитаи Аҳтам Абдулозода чорабинии фарҳангӣ доир гардид.

Субҳи 27 июл семинарро Одиназода Шоҳона, сармуҳаррири маҷаллаи “Бонувон” ифтитоҳ намуда, иштирокчиёнро аз кору фаъолияти худ огоҳ намуд: - Имрӯзҳо кадрҳои роҳбарикунанда аз ҳисоби занони кишвар хуб ба назар мерасад. Ин ҳама бо дастгирии бевоситаи Пешвои миллат амалӣ гашта истодааст. Ба ҷавондухтарони мо шароити хуб фароҳам оварда шудааст. Ҳатто метавонанд дар макони худ имтиҳон супурда сазовори номи донишҷӯӣ шаванд,- иброз дошт Одиназода Ш.

Бибиосия Аюбӣ, муовини директори Агентии хизмати давлати дар мавзӯи “Занон дар хизмати агенти давлатӣ” ба ҷавондухтарон дарс дод. Ӯ зимни дарс ба ҷавондухтарон таъкид намуд, ки омилҳое, ки монеи ҷалби занон ба хизмати давлатӣ мешавад, ин надоштани таҳсилоти зарурӣ ва набудани ризоияти хонавода мебошад.

Муовини якуми раиси Кумитаи кор бо занон ва оилаи назди Ҳукумати ҷумҳурӣ Марҳабо Олимӣ доир ба ташакули заминаҳои қонунгузорӣ дар самти баробарии ҳуқуқии занон ва мардон, интихоб ва ҷобаҷогузории кадрҳои роҳбарикунанда аз ҳисоби занон маърӯза намуд.

Ба ҳамин тартиб ба иштирокчиён ҳама меҳмонони даъватшуда доир ба фаъолияти корӣ, таҷрибаи андӯхта дар самти хизматчии давлатӣ, дарс гуфтанд. Ҷавондухтарон аз ин семинар ба худ донишҳои ғании назариявӣ касб намуда,таассуроти нек бо худ гирифтанд. Аз ҷумла яке аз иштирокчиёни фаълои семинар муовини раиси шурои духтароин Клуби волонтёрони Кумитаи кор бо ҷавонон ва варзиш Фарида Алимардонова доир ба чорабинии мазкур чунин андеша дорад: “Боиси хушнудист, ки ман дар ин семинар иштирок намуда, соҳиби гувоҳнома гардидам. Ин шаҳодат аз он медиҳад, ки имрӯз ҷавонон, хосса ҷавондухтарон, зери назар ва ғамхории Ҳукумати кишвар буда, пайваста мавриди дасгирӣ қарор доранд. Ин гуна семинари омӯзишӣ ба мо - ҷавондӯхтарон имконият медиҳад, то дар оянда ҳамчун мутахассисони соҳаҳои гуногун кору фаъолият намуда, дар роҳи рушду инкишофи Ватан саҳми беандоза гузорем”.

Мартаба Мирмамадова, мутахассиси шуъбаи магистратураи Донишгоҳи давлатии Кӯлоб ба номи Абӯабдуллоҳ Рӯдакӣ тули ду рӯз иштирокчии дигари ин семинар буд: - Заноне, ки ба мо дарс гуфтанд, бонувони соҳиблутф, чеҳраҳои шинохта ва фахри миллати тоҷик ба ҳисоб мераванд. Дарси ин фарзандони фарзонаи миллатро гирифтан орзуи ҳар як ҷавондухтар аст. Ин семинар ба мо дар оянда муваффақ буданро омӯзонд. Ба бонувони равшанандеш, фарзона, қавиирода, ватандӯст, озодандеш, ки вақти қиммати худро дареғ надошта, барои омӯзондани мо омаданд, изҳори сипос менамоям, - мегӯяд Мартаба Мирмамадова.

Динора Ҷаборова, волонтёри Кумитаи кор бо ҷавонон ва варзиш чунин қайд намуд ки: “Ман ҳамчун як ҷавондухтар дар семинари мазкур иштирок намуда, ба худ дарси муҳими сиёсӣ оид ба хизматчии давлатӣ будан, тарзи оиладорӣ, одоби муошират, ҳимояи ҳуқуқи занону бонувонро омӯхтам. Дар муддати ду рӯзи баргузории семинар ба мо 8 нафар бонувони ботаҷрибаву рӯзгордида дарс гуфтанд. Дар суханони ҳамаи онҳо самимият ва дустдории ин сарзамини биҳиштосо ҳис карда мешуд. Дарси яке аз дигаре ҷолибтару диққатҷалбкунанда буд”.

Дар рӯзи ҷамъбасти семинар раиси Кумитаи кор бо ҷавонон ва варзиш суханронӣ намуда, дар охир тамоми иштирокчиёнро бо Гувоҳнома ва туҳфаҳои хотиравӣ қадрдонӣ намуд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Август 2018 c.