Илҳомҷон Оймуҳаммадзода, сардори Саридораи геологияи назди Ҳукумати Ҷумҳурии Тоҷикистон имрӯз зимни нишасти хабарии ниҳодаш баъзе камбудиҳои кор дар ниҳоди зери идораашро ба нарасидани кадрҳо ва ба таври бояд омода нагаштани мутахассисони баландихтисос дар кишвар рабт дод.

Ӯ гуфт, ки бо сабаби душворӣ ва хусусиятҳои вижаи худро доштани иҷрои корҳои геологӣ ҷавонон ба ин касб камтар таваҷҷӯҳ зоҳир мекунанд. Дар баробари ин номбурда қайд кард, ки дар кишвари мо институтҳои илмии омодасозии кадрҳои соҳаи геология аслан вуҷуд надорад.

- Бо вуҷуди он ки дар кишвари мо институтҳои илмии омодасозии кадрҳои соҳаи геология нест, аммо раҳбарияти Саридора кушиш ба харҷ медиҳад, то дар доираи ҳамкориҳои дуҷониба бо кишварҳои хориҷ мутахассисони хуби соҳаро аз ҳисоби ҷавонон омода ва ба истеҳсолот сафарбар намояд,-гуфт Илҳомҷон Оймуҳаммадзода.

Ба таъкиди масъулин айни ҳол шуморам мутахассисони ҷавони соҳа 180 нафарро ташкил медиҳад, ки 48 нафар зан ва 132 нафар мардҳо мебошанд.