Дар идомаи силсиламулоқотҳои Кумитаи кор бо ҷавонон ва варзиши назди Ҳукумати ҷумҳурӣ бахшида ба “Соли ҷавонон” дар қисмҳои ҳарбии шаҳри Душанбе, мулоқоти навбатӣ дар қисми ҳарбии 5453-и Қушунҳои дохилии Вазорати корҳои дохилаи мамлакат доир гардид.

Амир Иброҳимов, сармутахассиси Раёсати кор бо ҷавонони Кутимаи кор бо ҷавонон ва варзиш, зимни ифтитоҳи мулоқот доир ба ҷаҳду талоши ҷавонон ҷиҳати саҳм гузоштан дар пешрафти кишвар ва илмомӯзии онҳо суханронӣ намуда, бо қаноатмандӣ зикр намуд, ки имрӯз ҷавонони мо бо рӯҳияи хубу созанда дониш меандӯзанду дар баробари дигар қишрҳои ҷомеа фаъолии худро нишон дода истодаанд. Аз соҳаи варзиш сар карда, инчунин, дар самтҳои иқтисодиву иҷтимоӣ ва фарҳангию сиёсӣ фаъолияти назаррас доранд. Ин ҳама гувоҳи аз он аст, ки ҷавонони мо бо ҳисси баланди ватандӯстӣ баҳри ояндаи дурахшони ҷомеа кӯшиш намуда истодаанд. Бо боварӣ метавон гуфт, ки ояндаи кишвар бо ҷавонони созанда боз ҳам рушд хоҳад кард.

Дар ҷараёни мулоқот ҳамчунин доир ба масъалаҳои фарҳанги либоспӯшӣ, танзими анъана ва ҷашну маросимҳои миллӣ ва гаравидани баъзе аз ҷавонон ба гурӯҳҳои ифротӣ ибрози назар карда шуд.

Ёдовар мешавем, ки Кумитаи кор бо ҷавонон ва варзиши назди Ҳукумати кишвар дар доираи “Соли ҷавонон” ва иҷроиши босифати нақшачорабиниҳои муштарак барои ошноӣ пайдо намудан бо ҳаёти сарбозон силсилаи мулоқоту вохӯриҳоро вобаста ба баланд бардоштани ҳисси ватандӯстӣ, худшиносиву худогоҳӣ, нигаҳдошт ва ҳифзи марзу буми кишвар давоми моҳҳои июл, август ва сентябри соли ҷорӣ дар тамоми қисмҳои ҳарбии шаҳри Душанбе ба роҳ мондааст.

Беҳрӯз ХОЛМУРОДОВ, “ҶТ”