Толеънома -номае, ки дар он чигунагии толеъ навишта мешавад. Онро китоби таъбири толеъ ҳам мегӯянд. Муаллифи он гӯё аз тақдиру толеи мо бохабар аст ва онро пешакӣ ба мо гуфтан мехоҳад. Аммо масъала бовар доштани ҷомеа ба толеъномаҳо аст. Имрӯзҳо мо бо нафароне вомехӯрем, ки онҳо пурра ба толеъномаҳо бовар доранд. Бархе дигар мегӯянд, нафари мусалмон набояд ба пешгӯии толеъномаҳо бовар дошта бошанд. Доир ба ин мавзуъ аз мусоҳибон пурсидем:

Муҳаммади Истам, сокини пойтахт:
- Не, бовар надорам. Толеъномаҳо, ки дар ҳафтаномаҳо чоп мешавад, газофе беш нестанд ва агар онро дигар нашр накунанду ҷояшро бо матолиби арзишманд пур кунанд, хуб мешуд. Ин албатта, назари шахсии банда аст. Чунки толеънома як навъи фолбинист! Ҳар мусалмони огаҳ бояд донад, ки дар дини маҳбуби ислом фолбинӣ ҷоиз нест ва ҳар ки назди фолкушо равад, бар худ гуноҳ харидааст. Чаро гуноҳ? Бадон ки:
  
Асрори азалро на ту дониву на ман,
В-ин ҳарфи муаммо на ту хониву на ман...

Мирзошоҳ Ватаншоҳ,рӯзноманигор:
  - Ба ҳар гуна толеъномаву пешгӯии сатҳӣ боварӣ надорам. Вале ба пешгӯиҳо ва толеъномаҳое, ки ба ситорашиносӣ (астрология) - ҳаракати Офтобу Маҳтобу Сайёраҳо    ва мавқеияти онҳо нисбат ба Замини мо асос ёфта ва таҷрибаи ҳазорсолаи башарро инъикос менамояд, эътимоду боварӣ дорам.

Шаҳодат Давлатова, донишҷӯ:

- Ба толеъномаҳо бовар надорам, танҳо ба тақдир боварӣ дорам. Ин пешгӯиҳо ҳамааш сафсатае беш нест. Қаламе, ки қазову қадарро навишт, дигар қобиляти навиштан ва таҳриру аз нав навиштанро надорад. Китобе, ки дар он тақдир сабт шудааст, кайҳост, ки пӯшида шудааст.

Холиқназар Чуъмаев, журналист:
  - Не, ман ба талеъномаҳо бовар надорам. Вақте дар нашрияи «Ману Ту» кор мекардам, гоҳ- гоҳ онҳоро худам менавиштам. Вақте бо такя ба зиндагӣ    толеъномаро менависем, ҳатман ду се ҳолате мешавад, ки ба зиндагии баъзе аз ашхос дуруст меояд ва мегӯянд, “Ана, дидӣ, рост баромад?” Доир ба ин мавзуъ як ҳолати воқеиро мехоҳам зикр кунам: Духтарам пойафзоли зимистона харидан мехост. Гуфтам, каме сабр кун, маош ки шуд, пули пойафзолро ҳатман чудо мекунам. Ҳамин тавр ваъдаи ман ду – се ҳафта тӯл кашид. Дирӯз чанде аз нашрияҳоро ба хона овардам. Духтарам баъди варақ задани чанд саҳифаи нашрияи "Оила" бо овози баланд, хурсандона гуфт: “Дадаҷон, шодиёна диҳед, ин ҳафта маош мегирифтаед”. Гуфтам: “Аз куҷо фаҳмидӣ?” Ӯ саҳифаи кушодашудаи газетаи «Оила»-ро ба ман нишон дода гуфт: “Ана, дидед, дар толеъномаи "Оила" гуфта шудааст, ки ин ҳафта шумо ба хона пул меоред”. Барои он ки духтарам ноумед нашаваду «Оила»-ро дурӯғгӯ набарорад, маҷбур шудам, он бегоҳ барои пойафзоли зимистонааш пул ҷудо кунам.

Некбахти Саидзод, магистранти ДМТ:
- Толеънома ин муаян кардани хислатҳои инсон аз рӯи ситораҳо мебошад. Аксарият ба толеънома бовар доранд ва ҷустуҷӯ мекунанд, ки кай шумораи навбатиаш нашр мешавад, аммо ман тамоман ба толеънома бовар надорам, агар сарнавишти инсонҳо ба дасти ситораҳо бошанд ва гуруҳи ситорашиносон онро пешгӯӣ кунанд, чаро зиндагии хеш ва ё нафаре, ки ба мушкилӣ гирифтор мегардад, дигар хел намекунад ва ё пешгирӣ карда наметавонанд? Толеъномае, ки имрӯз нашр карда мешавад на аз ГОРОСКОП аст, на аз рӯи ситораҳо!Агар муқоиса кунем, нашри як моҳ то моҳи дигар ё ҳатто ҳафтае - ҳамааш як аст, ҳатто як-ду ҷумлаашро дигар мекунанд, ки ҳамон ҳам аз нашрҳои пешинаанд. Масалан, муаллифоне, ки масъули навиштани толеъномаанд, магар бо ягон ситорашинос ҳамкорӣ доранд? Аввал ин саволро ба худ диҳед, баъдан ҷавоб гардонед. Албатта, не! Шояд ситорашиносро ҳам надонанд. Аммо толеъномаро нашр мекунанд. Хуласи калом, ҳама сарнавиштро ман танҳо аз тақдири худовандӣ мебинам.

Алишер Зарифӣ, хабарнигори озодагон:
   - Аслан ба чунин чизҳое, ки толеи инсонҳоро пешгӯи мекунанд, он қадар таваҷҷӯҳ надорам. Ҳастанд инсонҳое, ки пешгӯии толеънома ба кору амалҳои    ҳамонрӯзаашон мутобиқат мекунаду ба он эътиқод ва боварӣ пайдо мекунанд. Ин ҳаққи онҳост ва ман намегӯям, ки кори дуруст ё хато кардаанд. Вале ман мехом зикр  кунам, ки танҳо Худованд қодир аст, ки тақдир ва толеи бандагонашро донад. Ҳастанд масъалаҳое, ки имрӯз бо назардошти рушди илму технологияи муосир,    пешгӯишаванда ҳасатанд ва ба онҳо мешавад эътимод кард, вале толеънома чандон қобили эътимод нест.