Дар Донишгоҳи техникии Тоҷикистон ба номи М. Осимӣ ҷаласаи навбатии Шӯрои олимон баргузор гардид. Дар он раёсати донишгоҳ, намояндагони Кумитаи ҷавонон, варзиш ва сайёҳӣ, аъзои шӯро, устодон ва мудирони шуъбаю бахшҳо иштирок намуданд.

Ҳайдар Одиназода, ректори донишгоҳ доир ба натиҷаҳои назарраси Донишгоҳи техникӣ дар соли ҷорӣ баромад намуда, иброз дошт, ки ДТТ дар озмуни 10-гонаи беҳтарин макотиби олии Тоҷикистон аз рӯи наминатсияи «Илм дар амал» беҳтарин дониста шуд.

Ҳабибулло Амирбекзода, муовини раиси Кумитаи ҷавонон, варзиш ва сайёҳӣ дар баромади хеш аз ҳамкории судманди ДТТ бо Кумитаи ҷавонон, варзиш ва сайёҳӣ ба роҳбарияти ин муассиса изҳори сипос намуд.

Баъдан ба ғолибони озмунҳои “Хобгоҳи беҳтарин”, “Ҳуҷраи беҳтарин” ва “Дастаи беҳтарини варзишии хобгоҳ”, ки дар доираи нақшаи чорабиниҳои якҷоияи Кумита ҷавонон, варзиш ва сайёҳӣ бо донишгоҳ баргузор гардида буданд, диплом ва тӯҳфаҳои хотиравӣ супорида шуд.

Дар охир аз ҷониби раёсати Донишгоҳи техникии Тоҷикистон ба номи М. Осимӣ Кумитаи ҷавонон, варзиш ва сайёҳӣ барои саҳми арзанда дар татбиқи сиёсати давлатии ҷавонон, тарбияи ватандӯстӣ ва тарғиби тарзи ҳаёти солим бо “Сипоснома” қадрдонӣ шуд.