Дар доираи як чорабинӣ, ки 25 июн бахшида ба Рӯзи Ваҳдати миллӣ дар Душанбе доир гардид, озмуни Муассисаи давлатии рӯзномаи “Ҷавонони Тоҷикистон”  таҳти унвони “Тоҷикистон баҳри ман аз деҳи ман сар мешавад” ҷамъбаст гардид.

Озмун бахшида ба эълон гардидани солҳои 2019-2021 ҳамчун “Солҳои рушди деҳот, сайёҳӣ ва ҳунарҳои мардумӣ” таҳти сарпарастии Кумитаи кор бо ҷавонон ва варзиши назди Ҳукумати Ҷумҳурии Тоҷикистон гузаронида шуда, дар он журналистони касбӣ, адибону публитсистон ва ҳамаи онҳое, ки ба эҷод алоқаманданд, сарфи назар аз синну солашон иштирок намуданд.

Пас аз эълон гардидани “Солҳои рушди деҳот, сайёҳӣ ва ҳунарҳои мардумӣ” аз ҷониби Президенти кишвар муҳтарам Эмомалӣ Раҳмон дар Паёми охиринашон ба Маҷлиси Олӣ  рӯзномаи “Ҷавонони Тоҷикистон” аввалин шуда, бо дастгирӣ аз ин иқдоми оқилонаи Пешвои миллат ва тарғиби он озмуни ҷумҳуриявиро таҳти унвони “Тоҷикистон баҳри ман аз деҳи ман сар мешавад” эълон намуд. 

Озмун бо мақсади муаррифии ҷавонони созандаву ободкор, ки дар зери сиёсати ҷавонпарваронаву созандаи Президенти кишвар муҳтарам Эмомалӣ Раҳмон дар дурдасттарин деҳаҳои ҷумҳурӣ баҳри ободонии маҳалли зисти хеш саҳми арзандаи худро гузоштаанд, гузаронида шуда, дар он корҳои созандагии ҷавонони бонангу номус ва бунёдкори мамлакат ҳамчун намунаи ибрат барои дигар ҷавонон тарғиб гардид.

Ба унвони озмун, ки аз 25-уми январ то 1-уми майи соли ҷорӣ идома ёфт, беш аз бист мақола аз тамоми минтақаҳои ҷумҳурӣ ворид гардида, беҳтарини онҳо пас аз мутолиа аз ҷониби ҳайати ҳакамон дар рӯзнома ва сомонаи рӯзномаи “Ҷавонони Тоҷикистон” (www.javonon.tj) нашр гардиданд. 



Пас аз анҷоми озмун ҳайати ҳакамон ғолибонро муайян намуда, ҳамин тавр Ҳафизуллоҳ Тоҳирӣ, донишҷӯи курси чоруми факултети Журналистикаи ДМТ ҷойи якум, Шаҳло Эшонова, корманди рӯзномаи “Ҷавонони Тоҷикистон” ҷойи дуюм ва Шариф Маҳмадӣ, омӯзгор аз ноҳияи Панҷ сазовори ҷойи сеюм гардида, дар фазои тантанавӣ бо ифтихорномаи рӯзнома ва туҳфаҳои хотиравӣ қадрдонӣ гардиданд.
Пас аз қадрдонӣ ғолибони озмун андешаҳои худро вобаста ба баргузории озмун иброз намуда, таъкид карданд, ки баргузории чунин озмунҳо омили муаррифии корҳои созандаи ҷавонони бунёдкор мебошад.

Шаҳло Эшонова, ғолиби озмун иброз дошт: “Баргузории чунин озмунҳо аз манфиат холӣ набуда, барои дар сатҳи зарурӣ муаррифӣ намудани ҳунару маҳорати ҷавонони фаъоли кишвар мусоидат менамояд. Чун имрӯз дар тамоми соҳаҳои хоҷагии халқи мамлакат саҳми ҷавонон ҳамчун машъалафрӯзи роҳи фардои миллат бориз ва назаррас аст. Ва месазад, ки аз музаффарият, дастовард, кору аъмоли ибратомӯзи онҳо ҳадс заду ситоиш намуд, то намунаи ибрат барои ояндагон бошанд”. 

“Аз замоне, ки ба эҷод сару кор дорам, ҳамеша талош мекардам, то баҳри Ватани маҳбубам шеъри самимие иншо намуда бошам. Хушбахтона, озмуни ташкилнамудаи рӯзномаи “Ҷавонони Тоҷикистон” боис гардиду аз унвони он, ки “Тоҷикистон баҳри ман аз деҳи ман сар мешавад” ном дорад, илҳом гирифта, шеъре бар васфи ин ватани биҳиштосо эҷод намудам ва он аз ҷониби масъулини озмун дастгирӣ ёфта, қадрдонӣ гардид. Аз ин иқдом бениҳоят хушҳолам”, - гуфт ғолиби дигари озмун Шариф Маҳмадӣ.

Ҳафизуллоҳ Тоҳирӣ, ғолиби мақоми аввали озмун мегӯяд, чунин иқдомҳо ҳар нафарро, бахусус, навқаламонро такон дода, он барои қалам рӯйи варақ давондан, як навъ раҳнамоӣ мекунад. Ӯ гуфт: “Маҳз озмуни мазкур ва омилҳои болоӣ сабаб шуданд, ки мо барои муаррифии яке аз деҳаҳои дурдаст ва зебову дорои ҳама шороитҳои муосир-деҳаи “Чорсада-2”-и ноҳияи Данғара ба он ҷо рафта, аз буду боши деҳа ва сокинонаш матлаберо дар қолаби чанд жанр омода кардем. Ва фикр мекунем, ки амалӣ намудани чунин иқдомҳо, яъне гузаронидани ин гуна озмунҳо аз ҳар ҷиҳат хуб ва фоидаовар ҳастанд”.