Дар шаҳри Душанбе озмуни шаҳрии “Омӯзгори муосир” баргузор мегардад.

Дар ин хусус гурӯҳи фейсбукии Сарраёсати маорифи шаҳри Душанбе хабар дод.

Гуфта мешавад, ки озмуни мазкур бо мақсади дарёфт ва паҳн кардани таҷрибаи пешқадами педагогӣ миёни омӯзгорони фанни технологияи иттилоотӣ дар самти барномасозӣ гузаронида мешавад. Масъули баргузории он Муассисаи давлатии “Маркази таҳлилӣ-иттилоотии назди Сарраёсати маорифи шаҳри Душанбе” мебошад.

Дар он омӯзгорони муассисаҳои таҳсилоти миёнаи умумӣ (литсей ва гимназияҳо)-и шаҳри Душанбе иштирок карда метавонанд.

Ғолибони озмун дар арафаи Рӯзи ҷавонони Тоҷикистон бо тӯҳфаҳои арзишманд қадрдонӣ карда мешаванд.

Ёдовар бояд шуд, ки дар асоси Қарори дахлдори Раиси шаҳри Душанбе, муҳтарам Рустами Эмомалӣ аз 20 то 26 майи соли равон бахшида ба Рӯзи ҷавонони Тоҷикистон дар шаҳри Душанбе “Ҳафтаи илм, технология, инноватсия ва ихтироъкории наврасону ҷавонони шаҳри Душанбе” зери унвони “Душанбе – шаҳри ҳушманд” баргузор карда мешавад. Аз ҷумла дар доираи он озмуни мазкур гузаронида мешавад.

Барои иштирок дар озмуни номбурда довталабонро зарур аст, ки ҳуҷҷатҳои худро ба Муассисаи давлатии “Маркази таҳлилӣ-иттилоотии назди Сарраёсати маорифи шаҳри Душанбе” супоранд. Инчунин, метавонанд тариқи сомонаи www.ictweek.tj сабти ном намоянд. Қабули ҳуҷҷатҳо то 14 май идома меёбад.

Гулафшон КАРИМОВА, “ҶТ”