"Ҳар он кас, ки Шоҳномахонӣ кунад, Агар зан бувад паҳлавонӣ кунад". Зери ин унвон дар ноҳияи Ванҷ байни ҷавонону хонандагони синни аз 10 то 17 сола озмуни "Шоҳномахонӣ" доир гардид.

Дар он Саодатқадам Давлаталиев ва Масрур Ғайратов, мудирони бахшҳои рушди иҷтимоӣ ва робита бо ҷомеаи дастгоҳи раиси ноҳия, кор бо ҷавонон ва варзиш, Козим Ғайратов, директори Маркази эҷодии кӯдакону наврасон, Пайшанбе Шоев, сармуҳаррири рӯзномаи "Ватан" иштирок намуданд.

Ба гуфтаи М. Ғайратов, ташкилотчии маҳфил, мақсад аз баргузории чорабинӣ дарёфти истеъдодҳои нав буда, дар ин замина дар рӯҳияи ватандӯстӣ, бузургдошти арзишҳои аҷдодӣ, тарбия намудани ҷавонон, эҳтиром нисбати шоҳасари безволи Абулқосими Фирдавсӣ - "Шоҳнома" мебошад.

Бояд зикр намуд, ки чорабинӣ ба ифтихори ҷашни Наврӯзи байналмилалӣ  гузаронида шуда, дар он 30 нафар толибилм беҳтарин натиҷаву маҳоратро нишон доданд.

Дар фарҷом ба хонандагони фаъол аз ҷониби бахш ифтихорнома тақдим гашт.