19 ноябр дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи Парчами Ҷумҳурии Тоҷикистон таҳти унвони “Парчам-рамзи давлатдории миллӣ” Конференсияи ҷумҳуриявӣ баргузор шуд.

Чорабинии мазкур бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Иттифоқи ҷавонони Тоҷикистон баргузор карда шуд.

Дар чорабинӣ Зулфиқор Гулаҳмадзода, раиси Кумитаи кор бо ҷавонон ва варзиш, Абдусаломзода Мунаввар Алиакбар, вакили Маҷлиси намояндагони Маҷлиси Олии Ҷумҳурии Тоҷикистон, Ҷамолиддин Шарифзода, директори Маркази илмӣ - таҳқиқотии Пешвои миллат дар назди Донишгоҳи миллӣ, Мавзуна Чориева, ҷоизадори Бозиҳои олимпӣ, муовинони раиси Кумита ва кормандони бахшҳои Кумита иштирок намуданд.

Нахуст Зулфиқор Гулаҳмадзода, раиси Кумита ҳозиринро бо Рӯзи Парчами Ҷумҳурии Тоҷикистон табрик гуфта, таъкид намуд, ки Парчам нишоне аз соҳибистиқлолии кишвар ва ифтихоре барои ҳар сокини мамлакат мебошад.

Дар идома дигар иштирокдорони конфронс доир ба аҳамияти Рӯзи Парчами давлатӣ суханҳои судманд иброз намуданд.

Гуфта шуд, ки эҳтиром ба Парчами давлатӣ чун дигар рамзҳои муқаддаси миллӣ вазифаи ҷонии ҳар як шаҳрванди кишвар аст.

Дар фарҷоми чорабинӣ як қатор иштирокчиён бо сипоснома ва туҳфаҳои хотиравии Кумитаи кор бо ҷавонон ва варзиши назди Ҳукумати Ҷумҳурии Тоҷикистон қадрдонӣ шуданд.

Гулафшон КАРИМОВА, “ҶТ”