Ҷавони тоҷик бояд ҳушманд бошад. Ҷавони тоҷик арзишҳои миллии худро шиносад ва арҷ гузорад. Ҷавони тоҷик аз таърихи худ огоҳ бошаду ояндаи дурахшонеро созад. Ҷавони тоҷик муҳимтар аз ҳама дорои дониши сиёсӣ бошад ва дар бархӯрдҳои ҷаҳони муосир мавқеи худро устувор нигоҳ дорад. Зеро ӯ ҷавони хушбахт аст. Зодаи даврони истиқлол аст. Танҳо шаҳди сулҳро чашидааст. Ӯ шоҳиди давраҳои пурошӯби таърихӣ нагаштааст. Ӯ бо корнамоиҳою ҷонфидоиҳои фарзандони барӯманди миллат ва тадбирҳои онҳо дар роҳи пойдор намудани сулҳу субот танҳо аз нигоштаҳои таърихӣ ошност. Пас бояд барои ҷавони тоҷик аз фаъолияти ватанпарастонаи онҳо гуфт. Фаҳмиши сиёсии онҳоро рушд дод. Онҳоро ба ҳаёти сиёсӣ омода намуд...

Вобаста ба ин аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ки дар самти сиёсати давлатии ҷавонон мақомоти босалоҳият шуморида мешавад, соли 2018 ташкилоти ҷамъиятии “Пайравони Пешвои миллат” таъсис дода шуд.

Ҳадаф аз таъсиси ин ташкилот омӯзиши мактаби мардонагӣ, сулҳофарӣ ва хирадмандии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар замири ҷавонони кишвар аст. Зеро барои ҳар ҷавон донистани тадбирҳо ва роҳу усулҳои сулҳофаронаи Пешвои муаззами миллат дар марҳилаҳои ҳассоси ба сари мардуми тоҷик омада муҳим ва зарурист.

Соли гузашта аз ҷониби Кумитаи кор бо ҷавонон ва варзиш барои дарёфти грантҳо дар самти ватанпарастии ҷавонон, ки бо қарори Ҳукумати Ҷумҳурии Тоҷикистон тасдиқ шудааст, эълон дода шуда буд. Бо пешниҳоди лоиҳаҳои мухталиф аз ҷониби ташкилотҳои ҷамъиятӣ, ки бевосита бо ҷавонон кор мекунанд, грантҳо мавриди омӯзиши комиссия ва дастгирии онҳо қарор гирифтанд. Ташкилоти ҷамъиятии “Пайравони Пешвои миллат” низ бо пешниҳоди як лоиҳаи хуб омӯзиши навбатии семоҳаи ҷавононро вобаста ба нозукиҳои сиёсӣ ташкил кард. Вобаста ба пешниҳоди ин лоиҳа дар зарфи се моҳ роҳбарони вазорату идораҳо, онҳое, ки дар зинаҳои идоракунии хизмати давлатӣ малакаю маҳорати хуб доранд, даъват шуда, дар як ҳафта ду маротиба, дар маҷмӯъ 48 соат бо ҷавонон машғулиятҳои таълимӣ гузарониданд. Гранти мазкур аз ҷониби Кумитаи кор бо ҷавонон ва варзиш ба ташкилоти ҷамъиятии “Пайравони Пешвои миллат” супорида шуда, дар доираи он барномаи маҳфили омӯзишии “Пайравони Пешвои миллат” тасдиқ карда шуд. Курси омӯзишии мазкур 6 майи соли 2021 ҷамъбаст гардида, беҳтаринҳо бо шаҳодатнома сарфароз гардонида шуданд.

Дар мавриди ҷалби ҷавонон дар ин курси омӯзишӣ Дилноза Аҳмадзода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон чунин зикр кард: “Тибқи талабот бояд 30 нафар бо омӯзиш фаро гирифта мешуданд, аммо бо назардошти зиёд будани дархостҳо аз ҷониби ҷавонон ва майлу рағбати онҳо дар ин самт мо 45 нафар ҷавонро дар ин курси омӯзишӣ дар соли 2021 фарогир будем. Гузаштан аз ин курс имконияти аз наздик ошно шудан бо фаъолияти мансабдорони давлатӣ ва омӯзиши соҳаҳои мухталиф аз нуқтаи назари мутахассисон ва масъулини соҳа ба ҳисоб меравад. Омӯзгорони курс дар ҳамкорӣ бо Кумитаи кор бо ҷавонон ва варзиш бо вазорату идораҳо дар ҳошияи барномаи тасдиқшудаи маҳфили омӯзишӣ мувофиқа шуда, барои дастгирӣ ба маҳфили мазкур ҷалб мегарданд. Баъд аз хатми курс шунавандагони фаъол бо шаҳодатнома мукофотонида мешаванд, ки ин барои фаъолияти минбаъдаи онҳо чун як дастоварди арзишманд ҳисобида мешавад”.

Ин гуна маҳфил соли сеюм аст, ки дар шаҳри Душанбе доир гардида, шунавандагон аз тамоми ҷумҳурӣ ҷалб карда мешаванд. Онҳо тариқи ихтиёрӣ бо пур кардани анкетаҳо ва мутобиқ ба талаботҳои он, ки аз ҷониби ташкилот таҳия шуда, се моҳ қабл аз оғози курс ба ҷавонон ирсол мешаванд, ҷалб мегарданд.
Оғози курс аз моҳи феврал буда, дар моҳи май, ки пурра ба моҳвораи ҷавонон бахшида мешавад, анҷом меёбад.

“Аз соли аввали оғози ин курс то ин дам мо ягон маротиба натавонистем бо теъдоди муқарраршуда шунаванда қабул намоем. Зеро миқдори хоҳишмандон зиёданд. Агар дар соли 2018 теъдоди шунавандагон 35 нафар бошад, дар соли 2019 40 ва соли 2021 45 нафарро ташкил дод. Албатта инҳо шунавандагони соли 2020 ба ҳисоб мераванд. Зеро дар ин сол фаъолияти маҳфил бар асари пандемия мавқуф гузошта шуда, бо назардошти ҳолати беҳдоштӣ имсол 6 май дар толори Кумитаи миллии олимпӣ ҷамъбаст гардид. Барои соли 2021 боз эълони навбатӣ шудааст ва барои шунавандагони имсол низ курси омӯзишӣ ташкил карда мешавад”, - иброз дошт, Дилноза Аҳмадзода.

Ҳамчунин гуфта шуд, ки барои беҳтару хубтар ошноӣ пайдо кардан бо мактаби давлатдории Пешвои муаззами миллат сафари шиносоии шунавандагони курси имсола ба ноҳияи Данғара ташкил карда шуд. Онҳо аз осорхона, аз мактабе, ки Пешвои миллат таълим гирифтаанд, боздид карданд. Ҳамчунин онҳо дар тамоми чорабиниҳое, ки хусусияти сиёсиву фарҳангӣ доранд, баҳри боз ҳам ташаккул ёфтан ҷалб гардиданд. Баъди хатми курс низ онҳо аз фаъолияти кумита фориғ будан намехоҳанд. Аз ин рӯ, худро ба ҳайси волонтёр ба қайд гирифта,барои пешрафти ҷомеа саҳм гузошта истодаанд.

Додихудо Шарипов яке аз шунавандагони курси омӯзишии маҳфили “Пайравони Пешвои миллат” дар соли ҷорӣ мебошад. Ӯ донишҷӯи Донишгоҳи миллӣ буда, дар риштаи сиёсат ва идораи давлатӣ таҳсил мекунад. Аз ташкили чунин маҳфил ва курси омӯзишӣ сипосманд буда, гузаштан аз чунин курсҳоро имкони аз худ кардани донишҳои сиёсӣ мешуморад.

“Вақте як вазир, роҳбари як идора, раиси як кумита, директори як корхона ба ҷавонон доир ба фаъолияти содиқонаю софдилонаи Пешвои миллат, ки худ борҳо шоҳид гаштааст нақл мекунад, дар вуҷуди мо, ҷавонон ҳисси худогоҳии миллӣ, хештаншиносӣ, дӯст доштани ватанро боз ҳам зиёд мегардонад. Бо дарс гуфтани онҳо ман дарк кардам, ки рисолати созандагии мо, ҷавонон аз куҷо маншаъ мегирад”, - таассуроти худро чунин иброз дошт, Додихудо Шарипов.

Барои Аниса Ёрасенова низ гузаштан аз ин курси омӯзишӣ боиси сарбаландию сипосмандист. Ӯ дар баробари таҳсил ва фаъолият омӯхтани чунин курсҳоро муҳим арзёбӣ намуда, аз бардошти худ чунин гуфт: “Дар ин се моҳе, ки шунавандаи ин курси омӯзишӣ будам, бори дигар дарк кардам, ки воқеан нақши Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи таъмини сулҳу осоиштагӣ ва бунёди давлати демократӣ басо бориз аст. Ҳар як суханашон, ки аз ҷоннисориҳои ин фарзанди фарзонаи миллат ёдоварӣ менамуданд, барои ман муҳаббати содиқона доштан ба ватани маҳбубамон дарси сазоворе буд”. Ҳамчунин ӯ ташкили чунин курсҳоро имкони хуби пайдо намудани дӯстони зиёде аз ҳар гӯшаю канори кишвар меҳисобад.

Дар баробари донишҷӯёни донишгоҳу донишкадаҳои олии шаҳри Душанбе дар курси мазкур шунавандагон аз дигар манотиқи кишвар низ ҷалб гардида буданд. Яке аз онҳо Манучеҳр Латипов, хатмкунандаи Донишгоҳи давлатии Кӯлоб ба номи Абӯабдуллоҳ Рӯдакӣ буда, ба ҳайси мухбир дар ҳафтаномаи иҷтимоию сиёсии “Кулябская правда” фаъ-олият мекунад. Бо пайгирӣ намудани саҳифаҳои иҷтимоӣ аз баргузории курси омӯзишии маҳфили “Пайравони Пешвои миллат” воқиф шуда, гузаштан аз ин курси омӯзиширо барои худ заруру саривақтӣ меҳисобад.

“Курси мазкур тавонист, дар зарфи се моҳ зинаҳои роҳбарикунанда ва донишҳои сиёсиро ба мо омӯзонида, дар вуҷуди мо ҳувияти миллӣ ва худшиносиро бедор созад”, - зикр кард ӯ.

Воқеан, ба роҳ мондани чунин курсҳои омӯзишӣ пеш аз ҳама ба дучанд намудани ҳисси муҳаббат ба Ватан дар замири ҷавонони кишвар барои эмин буданашон аз таҳдидҳои замони муосир ва омилҳои номатлуби иҷтимоӣ боис мегардад.

Аз ин рӯ, Кумитаи кор бо ҷавонон ва варзиши назди Ҳукумати Ҷумҳурии Тоҷикистон вобаста ба хоҳиши зиёди шунавандагон нақша дорад, ки дар ҳамкорӣ бо мақомотҳои маҳаллӣ, шӯрои олимони Тоҷикистон ва дигар сохторҳое, ки бевосита метавонанд чунин курсҳои омӯзишии сиёсиро ташкил намоянд, дар сатҳи маҳал низ онҳоро ба роҳ монад.