Ӯ зода ва хатмкардаи МТМУ №2 – и ноҳияи Ховалинг аст. Мактаби миёнаро бо баҳои хубу аъло хатм намуда, соли 2009 ба Донишгоҳи техникии Тоҷикистон ба номи академик М. С. Осимӣ ба факултаи энергетикӣ дохил шуд. Факултети мазкурро бо ихтисоси "Электротаъминкунии корхонахои саноатӣ" бо баҳои аъло хатм намуда, бо дипломи сурхи маълумоти олӣ бо ихтисоси "Муҳандис электрик" сарфароз гардид.

Сухан дар бораи пажӯҳишгари тоҷик, Беҳрӯз Табаров номзади илмҳои техникӣ, дотсенти факултаи энергетика ва менеҷменти Донишгоҳи давлатии шаҳри Комсомолски лаби Амури Федератсияи Русия меравад. Ин ҷавони тоҷик дар самти “Илмҳои техникӣ” соҳиби гранти президенти Федератсияи Русия байни олимони ҷавон гардидааст. Лоиҳаи пешниҳоднамудаи ӯ “Таҳия ва тадқиқоти дастгоҳи дугонаи реактори тиристорӣ якҷоя бо агрегати конденсаторӣ барои баланд бардоштани сифат ва сарфаи энергияи барқ дар интиқол, тақсим ва истифодаи қувваи барқ” мебошад. Лоиҳаи ӯ мушкилоти марбут ба пайваст кардани трансформаторҳои барқӣ ва равандҳои коммутатсионӣ дар зеристгоҳҳои трансформаторӣ ҳангоми кор дар режимҳои статсионарӣ ва динамикиро меомӯзад.
Мақсади асосии ӯ аз ин лоиҳа кам кардани талафоти иловагӣ, сарфаи қувваи барқ ва зиёд кардани самараи энергияи истгоҳҳои ёрирасони трансформаторӣ мебошад.

Ӯ муваффақияти худро дар он мебинад, ки баъди хатми донишгоҳ дар Тоҷикистон дар корхонаи "Тоҷикгидроэлектромонтаж" (ТГЭМ) ба ҳайси муҳандис - электрик фаъолият карда, аз нозукиҳои ин касб ба пуррагӣ хабардор гардид.

Баъди кор тасмим гирифт, ки дар риштаи аспирантура таҳсилро давом диҳад. Ӯ ба Донишгоҳи техникии давлатии Комсомолски лаби Амур дохил шуд ва рисолаи илмии номзадиашро пеш аз муҳлат ҳимоя кард.

“Ман аз хурдӣ кӯшиш мекардам, ки дар оянда номбардори миллат бошам. Аз ҳамин сабаб аз давраи мактабхонӣ дар тамоми корҳои ҷамъиятӣ фаъолона иштирок мекардам. Ба ҳамаи ин нигоҳ накарда, бо корҳои илмию тадқиқотӣ машғулам, то дар ин мулки бегона кишвари маҳбубамонро муаррифӣ намоям”, - гуфт Беҳрӯз.
Ӯ ифтихор аз он мекунад, ки Сарвари давлат муҳтарам Эмомалӣ Раҳмон барои ҷавонони даврони соҳибистиқлол тамоми шароитҳоро фароҳам овардааст ва онҳо метавонанд, чи дар дохили кишвар ва чи берун аз он фаъолияту таҳсили илм намоянд.

“Ман дар мулоқотҳои Президенти кишвар муҳтарам Эмомалӣ Раҳмон, ки бо сафарҳои корӣ ба Федератсия Русия ташриф меоранд, иштирок мекунам. Сарвари давлат дар ҳар сафари кории худ бо ҷавонони тоҷик суҳбати озод мегузаронад. Ва мо ҷавонони муқими Русияро падарвор насиҳат карда, доимо таъкид мекунанд, ки пайваста биомӯзем. Пас, моро зарур аст, ки номи кишварро дар арсаи байналмилалӣ баланд бардорем”, - илова намуд номбурда.

Ӯ дар баробари ғолиби гранти президенти Федератсияи Русия шуданаш давоми 5 соли фаъолияти худ ғолиби секаратаи стипендияи губернатори минтақаи Хабаровск байни олимони ҷавон, ғолиби озмуни "УМНИК-2020" ва дигар озмунҳои дохилидонишгоҳӣ аст.

- Ғолиб шудан дар ин гуна озмунҳо, аз он ҷумла дар озмуни гранти "УМНИК-2020" ва гранти президенти Федератсияи Русия мушкил буд. Чунки дар ин озмунҳо аз тамоми шаҳру минтақаҳои Русия олимони ҷавону аспирантон иштирок мекарданд. Ростӣ, натиҷаҳои озмунро Вазорати маориф ва илми Федератсияи Русия ва шӯрои гранти назди президенти Федератсия и Русия муайян мекарданд. Иштирокчиёни ин озмун 12 ҳазор олимону пажӯҳишгарони ҷавони тамоми шаҳру ноҳияҳои Русия буданд. Аз ин шумора 101 нафар бо лоиҳаи пешниҳодшудаи худ соҳиби ҷойҳои муайян шуданд. Хушбахтона, ман низ сазовори ин грант гардидам,- гуфт Беҳрӯз.

Ӯ вобаста ба ин лоиҳаи худ зиёда аз 50 корҳои илмию тадқиқотӣ, 6 мақолаи илмӣ дар маҷаллаҳои “SCOPUS ва Web of Since” ва 8 мақолаи илмӣ дар маҷаллаҳои олии аттестатсионии Федератсияи Русия ба нашр расондааст.

Беҳрӯз ба ҷавонони имрӯзаи кишвар чунин тавсия медиҳад, ки пеш аз ҳама муаррифгари фарҳанги бою ғанӣ ва бузурги мардуми шарифу куҳанбунёди тоҷик бошанд. Аз Истиқлолияти давлатӣ, тинҷиву оромӣ, сулҳу субот ва пешрафти кишвари азизамон шукргузорӣ намоянду бо баҳои хуб не, балки бо баҳои аъло таҳсил кунанд. Дар баробари ин, забонҳои хориҷиро аз худ намоянд. Дар оянда мутахассиси хуб шуда, дар пешрафти кишвари маҳбубамон саҳгузор бошанд.