8 октябр тибқи нақша-чорабиниҳои Ташкилоти ҷамъиятии “Пайравони Пешвои миллат” дар толори маҷлисгоҳи Кумитаи кор бо ҷавонон ва варзиши назди Ҳукумати Ҷумҳурии Тоҷикистон дарси навбатӣ баргузор гардид, ки маҳфили омӯзишии мазкур ба таҳкими ҷаҳонбинии ҷавонон, боло бурдани маърифати динӣ, ватандӯстӣ ва масъулияти шаҳрвандии онҳо бахшида шудааст.

Дар дарси мазкур Гулаҳмадзода Зулфиқор Аҳмад, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Холиқзода Абдураҳим Ғаффор, директори Маркази исломшиносӣ дар назди Президенти Ҷумҳурии Тоҷикистон иштирок ва суханронӣ намуданд.

Зимни баргузории дарс масъалаҳои нақши ҷавонон дар рушди ҷомеаи муосир, аҳамияти маърифатнокӣ ва исломшиносии дуруст дар шароити ҷаҳони имрӯз, инчунин, масъулияти иҷтимоии насли ҷавон дар татбиқи сиёсати давлатии ҷавонон мавриди баррасӣ қарор гирифт.

Дар идома иштирокчиёни дарс барои баргузории чунин маҳфилҳо миннатдории хешро баён намуданд.

Дар фарҷом аз ҷониби раиси Кумита, ба Холиқзода Абдураҳим Ғаффор, директори Маркази исломшиносӣ дар назди Президенти Ҷумҳурии Тоҷикистон туҳфаи махсус бо рамзи маҳфил тақдим карда шуд.

Ёдовар мешавем, ки маҳфили омӯзишии “Пайравони Пешвои миллат” аз моҳи сентябр бо иштироки зиёда аз 200 нафар шунаванда оғоз гардида, дар доираи барномаи он баргузории дарсҳои сиёсӣ бо иштироки роҳбарони як қатор вазорату идораҳо ва ташкилоту муассисаҳо дар назар дошта шудааст.

“ҶТ”