Таҳти ҳамин унвон бо ташаббуси Кумитаи кор бо ҷавонон ва варзиш бо дастгирии Федератсия футболи Тоҷикистон бахшида ба Рӯзи пойтахт имрӯз, 20 апрел дар толори Кумитаи миллии олимпӣ ҳамоиши ҷумҳуриявии ятимони кулл доир гашт.

Дар ҳамоиш масуълини Кумитаи кор бо ҷавонон ва варзиш ва ятимони кулли шаҳри Душанбе иштирок намуданд.

Аҳтам Абдуллозода дар вохӯрӣ бо ятимон аз дастгирӣ ва ғамхориҳои пайвастаи Пешвои миллат, муҳтарам Эмомалӣ Раҳмон ёдовар шуда қайд намуд, ки Роҳбари давлат гуфта буданд, ки “Ман ҳеҷ вақт ягон ятими куллро дар нимароҳ намемонам, меомӯзонам, тарбия мекунам ва ба ҳаёти мустақилона гусел менамоям”:

- Ин суханон бениҳоят арзиши баланд доранд, зеро гуфтаҳои мазкур як таҳаввулоти ҷиддиро дар сиёсати давлатии иҷтимоии ҷумҳурӣ ба бор овард. Чунки шумораи зиёди ятимони кулл, ки имрӯз дар кишвар ҳаёт ба сар мебаранд, маҳз бо ғамхориҳои Пешвои муаззами миллат аз тамоми имтиёзҳо ва дастгириҳое, ки нисбати насли наврас бояд бошанд, бархӯрдоранд,”- гуфт А. Абдуллозода.

Раиси кумита аз ятимони кулл даъват ба амал овард, ки онҳо бояд дар баробари ғамхорӣ ва дастгириҳои пайвастаи Сарвари давлат дониш андӯзанду босавод бошанд ва дар ҳимояи манфиатҳои давлатӣ омодаву устувор бошанд.

Дар рафти ҳамоиш чанд нафар аз ятимони кулл доир ба ғамхориҳои падаронаи Пешвои миллат изҳори андеша намуданда иброз дошанд, ки маҳз ин дастгириҳост, ки мо ба ҳама хоставу ҳадафҳоямон мерасему аз ягон ҷиҳат камбудӣ надорем ва боре ҳам худро танҳо ҳис накардаем.

Дар фарҷоми вохӯрӣ раиси кумита ба ятимони кулл туҳфаҳои хотиравӣ тақдим намуд.

Баъди қисмати расмии чорабинӣ дар саҳни бинои Кумитаи миллии олимпӣ баҳри тамошои ятимони кулл барномаи фарҳангӣ бо иштироки сарояндагони шинохта баргузор гардид. Ҳамчунин ятимони кулл аз Осорхонаи "Шарафи олимпӣ"-и Кумитаи миллии олимпӣ дидан намуданд.

Бояд ёдовар шуд, ки ҳамоиши мазкур ба хотири арҷгузорӣ ба дастгириҳои доимии Пешвои миллат ба ятимони кулл дар тамоми қаламрави ҷумҳурӣ гузаронида шуд.