Бо ташаббуси Кумитаи кор бо ҷавонон ва варзиши назди Ҳукумати кишвар таҳти сарпарастии Президенти Федератсияи футболи Тоҷикистон муҳтарам Рустами Эмомалӣ, 14 ноябр, дар шаҳри Душанбе конференсияи ҷумҳуриявии илмӣ – назариявӣ дар мавзӯи “Пешвои миллат – бунёдгузори сиёсати давлатии ҷавонон: иштироки ҷавонон дар ҳаёти ҷомеа ва нақши онҳо дар таҳкими муносибатҳои идорӣ” бахшида ба Рӯзи Президенти Ҷумҳурии Тоҷикистон ва ба истифода додани агрегати якуми иншооти азими аср НБО “Роғун” баргузор гардид.

Дар конференсия Аҳтам Абдуллозода, раиси Кумитаи кор бо ҷавонон ва варзиш, Юсуфӣ Хайринисо, муовини раиси Маҷлиси намояндагони Маҷлиси Олии Ҷумҳурии Тоҷикистон, Маъмурзода Адҳам, намояндаи Дастгоҳи иҷроияи Президенти ҷумҳурӣ, Фарҳод Раҳимӣ, Президенти Академияи илмҳо, Имомзода Маҳмадюсуф, ректори Донишгоҳи миллии Тоҷикистон, Раҳимзода Султон, муовини якуми вазири энергетика ва захираҳои оби ҷумҳурӣ ва олимону муҳаққиқони ҷавон иштироку суханронӣ намуданд.

Аҳтам Абдуллозода, раиси Кумитаи кор бо ҷавонон ва варзиши назди Ҳукумати кишвар, зимни ифтитоҳи конференсия аввалан кулли иштирокчиёнро бахшида ба Рӯзи Президент ва ба кор даромадани аввалин агрегати НБО “Роғун” муборакбод намуд.

Раиси Кумита дар идома доир ба сиёсати давлатии ҷавонон суханронӣ намуда, иброз дошт: “Иштироки ҷавонон дар раванди созандагӣ ва бунёди давлати навини тоҷикон бисёр муҳим ва аҳамиятнок ба ҳисоб меравад. Зимнан аз рӯзҳои аввали соҳибистиқлолӣ нақши ҷавонон дар ташаккули рукнҳои асосии давлатдорӣ, алалхусус истиқлолияти давлатӣ назаррас мебошад. Истиқлолияти давлатии Тоҷикистон барои ноил шудан ба дастовардҳои муҳим дар ҳаёти иқтисодию иҷтимоӣ, сиёсию фарҳангии ҷавонон нақши босазо гузошта, ба ташаккули сиёсати давлатии ҷавонон ва тадриҷан фароҳам овардани имкониятҳои васеи рушду такомули ҷавонон дар шароити мураккаби тағйирёбии сохторию ҷамъиятӣ мусоидат намуд, ки саҳми ҷавонон дар ин раванд хеле самарабахш арзёбӣ мегардад. Имрӯз ҷомеаи кишвар ба қудрат ва тавоноии ҷавонони тоҷик дар таҳавулоти иқтисодию иҷтимоӣ ва умури давлатдорӣ сахт эътимод дорад ва ин нуқта аз ҷониби Пешвои муаззами миллат дар мулоқот бо ҷавонони мамлакат зикр гардида буд”.

Таъкид гардид, ки сиёсати давлатии ҷавонон сиёсатест, ки татбиқи он аз сохторҳои гуногуни давлатию ҷамъиятӣ фаъолияти муштаракро талаб менамояд. Аз ҷониби дигар имрӯз ҷавонони даврони соҳибистиқлолии кишвар дар заминаи ҳидояту роҳнамоиҳои падаронаи Пешвои миллат бевосита худашон низ ҳаракат бар он доранд, ки дар пешрафт ва шукуфоии ватани азизамон дар тамоми соҳаҳои хоҷагии халқ хизмати содиқона намоянд.

Юсуфӣ Хайринисо, муовини Раиси Маҷлиси намояндагони Маҷлиси Олии Ҷумҳурии Тоҷикистон, дар баромади хеш атрофи ба саҳнаи сиёсат омадани Пешвои миллат суханронӣ намуда, нақши Президенти кишварро дар барқарор гардидани сулҳу ваҳдат калидӣ арзёбӣ намуд.

“Баъди пирӯзии истиқлол бархурди хунини гурӯҳҳои мухталиф дар ватани мо оғоз шуд. Дар он рӯзгори парешонию парокандагӣ ҷони миллат дар сари риштае ҳамоил буд. Камтарин таъсиру ангезаи дохилию хориҷӣ ин риштаро барои ҳамеша мегусаст ва номи миллати тоҷик аз нақшаи ҷуғрофӣ сутуда мешуд. Ҳамдиёрони баргаштабахти мо дар чорсӯи офоқ дар ғамободи ғурбат умр ба сар мебурданд. Ҳоли мардуми дохилӣ низ тараҳҳумхоҳ буд. Дар ҳамин марҳилаи шадидтарини ҳаёт ба ногаҳ офтоби наҷот бо номи Эмомалӣ Раҳмон тулуъ кард. Аз рӯзҳои нахустини роҳбарӣ Президенти кишвар тамоми кӯшишу заҳмати хешро барои поён бахшидани ҷанги шаҳрвандӣ, таҳкими сулҳ ва ваҳдати халқи тоҷик равона сохтан ва дар ин ҷода баъди чанде аз худ гузаштанҳову ҷонбозиҳо муваффақ гардидан”, - иброз дошт дар идома Юсуфӣ Хайринисо.

Иштирокчиёни дигари конференсия низ доир ба нақши ҷавонон дар идоракунии давлатӣ, ҷаҳду талоши шабонарӯзии Пешвои миллат баҳри расидан ба ормонҳои миллӣ ва ҷавобан ба ғамхориҳои Ҳукумату давлат талошу фаъолияти назаррас намудани ҷавонон ибрози назар намуда, аз ҷумла таъкид сохтанд, ки ба кор андохтани нахустин агрегати иншооти аср ва кохи нури Тоҷикистон НБО “Роғун” дар Рӯзи Президенти Ҷумҳурии Тоҷикистон нишона ва талоши навбатии Пешвои миллат ба сӯйи фардои дурахшон ва созандаи Тоҷикистони соҳибистиқлол мебошад. Аз он меболем, ки аз 21 ҳазор кормандони иншооти бузурги тақдирсоз аксарияти сохтмончиёни он ҷавонон мебошанд, ки саҳми арзишманди хешро дар таъмини ҳадафи стратегии кишвар, истиқлолияти комили энергетикӣ гузошта истодаанд. Ҷонисорӣ, садоқатмандӣ, хештаншиносӣ ва заҳматҳои шабонарӯзии Пешвои миллат бо бунёду мавриди истифода қарор додани ин иншооти азими аср бори дигар ба мо ҷавонон исбот менамояд, ки ба ғайр аз мову шумо дигар ягон кас хонаву дар, кӯчаву шаҳр ва ватани моро обод намекунад, ба ҷуз аз худи мо. Пас биёед, якдилу якмаром барои Тоҷикистони соҳибистиқлол, модар ва ватани маҳбубамон то охирин нафас содиқу ҷонфидо ва пайрави асили Пешвои муаззами миллат бошем.

Дар қисмати дуюми конференсия, ки дар он олимону муҳаққиқони ҷавон иштирок намуданд, доир ба ҳаёт ва осори Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон маърӯзаҳо намуданд.

Зимни маърӯзаҳо гуфта шуд, ки ҳар як дастоварди олимону муҳаққиқони ҷавон маҳз дар натиҷаи дастгириҳои пайвастаи Пешвои миллат ба даст омада, ҷавонон бояд дар тамоми соҳаҳо кӯшиш бар он намоянд, ки Тоҷикистони азиз боз ҳам рушду нумуъ ёбаду дар арсаи ҷаҳонӣ мавқеи он боз ҳам баланд гардад. Дар ин росто қарзи имониву инсонии ҳар як ҷавон ин саҳм гузоштан дар пешрафту тараққиёти кишвар мебошад.