ҶАВОНОН
Чоршанбе 14 Апрел 2021 09:56
3419
Дар ҳошияи истиқболи ҷашни фархунда Истиқлол ва “Соли ҷавонон”

Ҷавонон нерӯи бузурге ҳастанд, ки қодиранд ояндаи бузургу дурахшонеро таъмин кунанд. Барои ин танҳо эътимод ба ин нерӯ, роҳнамоии дурусту воқеӣ, ҳавасмандгардонии наслҳои бузургтар зарур аст.

Хушбахтона, дар ҷомеаи имрӯзаи мо эътимоду боварӣ ба ҷавонон аз сатҳи олӣ сарчашма мегирад. Заковату хиради азалии Сарвари давлат, Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон, эътимодашон ба ҷавонон ин нерӯи бузурги ояндасозро руҳбаланд намудаву баҳри иҷрои корҳои бузургтаре раҳнамун гардидааст. Имрӯз ҳар яки мо – аз хурд то бузург, шоҳиди он ҳастем, ки дастгирии давлатии ҷавонон дар сатҳи олӣ қарор дорад. Фароҳам овардани шароити арзандаву имкониятҳои фаровон барои аз бар намудани тамоми илмҳои замонавӣ, таҳсил дар донишгоҳҳои машҳури ҷаҳон ва мувофиқ ба тахассусу маҳорати касбӣ таъин намудани ҷавонон ба вазифаҳои масъул гувоҳи он аст, ки Роҳбари давлат ба қобилияту нерӯи ҷавонони мамлакат эътимоди комил доранд. Ин аст, ки имрӯз дар тамоми ҷабҳаҳои ҳаёт нақши барҷастаи ҷавонон равшан ба назар мерасад. Боиси хушнудист, ки тавассути дастгириҳои бевоситаи давлатӣ ин мақом, ин нақш дар арсаи байналмилалӣ низ эҳсос мегардад. Ширкати фаъолона ва сазовори медалу ҷойҳои намоёну ифтихорӣ гардидани варзишгарон, ғолиби озмун ва дигар чорабиниҳои байналмилалӣ гардидани толибилмони тоҷик муаррифӣ ва афзуннамоии эътибору нуфузи Тоҷикистони азиз аст.

Пешвои миллат борҳо таъкид кардаанд, ки ҷавонони ватандӯсту ватанпарвар, матину қавиирода ва далеру шуҷоъ дар ҳамаи соҳаҳои иқтисоди миллӣ ва ҳаёти ҷомеа ғайратмандона фаъолият намуда, дар пешрафти мамлакат ҳиссаи муносиб мегузоранд, барои ободиву пешрафти Ватани маҳбубамон софдилона хизмат мекунанд, марзу буми сарзамини аҷдодӣ ва амнияту оромии давлатро содиқона ҳифз менамоянд ва бо донишҳои муосири худ ҳамчун мутахассисони оянда ба хотири тараққиёти кишварамон саҳми арзишманд мегузоранд. Инчунин, онҳо дар замони соҳибистиқлолӣ дар бунёди коргоҳу корхонаҳои хурду бузург, нақбу роҳҳои муосир ва иншооти мухталифи иҷтимоиву фарҳангӣ фаъолона иштирок намуда, на танҳо пешсафи истеҳсолот, балки бо заҳмати созанда, ташаббусҳои ободгарона ва кӯшишу талошҳои пайвастаашон мақоми хешро баланд бардошта, дар радифи беҳтарин бунёдкорони Ватани азиз қарор доранд.

Ҳамзамон, таъкид кардаанд, ки Ҳукумати кишвар ба нерӯи тавонои ҷавонон эътимод дорад, пешниҳоду ибтикороти онҳоро дастгирӣ менамояд ва ҷиҳати ҳавасманд гардонидан ва муҳайё сохтани шароити хуби зиндагӣ ва таҳсил барои онҳо ҳамаи тадбирҳои заруриро роҳандозӣ мекунад.

Чун идомаи ин иқдомоти нек Пешвои миллат дар Паёми навбатии хеш ба Маҷлиси Олии мамлакат соли 2017-ро “Соли ҷавонон” эълон намуданд. Пешвои миллат таъкид намуданд: “Аксарияти аҳолии Тоҷикистонро ҷавонон ташкил медиҳанд, ки онҳо давомдиҳандаи кору фаъолияти насли калонсол, нерӯи созанда ва иқтидори воқеии пешрафти ҷомеа, хулоса, ояндаи миллат ва давлат мебошанд... Ҳукумати Тоҷикистон ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардидани онҳо имконият фароҳам меорад. Бо дарназардошти саҳми ҷавонон дар рушди ҷомеа ва иштироки фаъолонаи онҳо дар ҳаёти сиёсиву иқтисодии мамлакат пешниҳод менамоям, ки соли 2017 дар Ҷумҳурии Тоҷикистон “Соли ҷавонон” эълон карда шавад”.

Гузашта аз ин, Пешвои миллат дар Паёми хеш ба Маҷлиси Олии мамлакат доир ба зарфиятҳои инсонӣ - нерӯи зеҳнии инсон таваҷҷӯҳи хос зоҳир намуда, такмилу ташаккули онро яке аз вазифаҳои муҳим донистанд.

Ҳамзамон, Фармони Президенти Ҷумҳурии Тоҷикистон “Дар бораи Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ” низ яке аз омилҳои муҳиммест, ки ба дастгирии ҷавонони варзишгар равона гардидааст.

Яке аз муҳимтарин корҳое, ки дар ҳаёти сиёсию иҷтимоии ҷавонон метавонад тағйиротҳои ҷиддӣ ба миён орад, ин таъсиси Шӯрои миллии кор бо ҷавонон дар назди Президенти кишвар аст, зеро ин шӯро, тавре Пешвои миллат дар ҷаласаи нахустини он таъкид намуданд, ба хотири таҳким бахшидани робита миёни ҷавонон ва Президенти мамлакат бо мақсади татбиқи самараноки сиёсати давлатии ҷавонон ва мусоидат дар амалӣ намудани пешниҳоду ташаббусҳои онҳо таъсис ёфтааст.

Пешвои миллат дар суханронии хеш ба роҳбарони мақомоти дахлдор барои беҳтар гардонидани шароиту имкониятҳои ҷавонон, бунёди майдону толорҳои варзишӣ, ҷалби ҳарчи бештари онҳо ба мусобиқаҳои варзишӣ, ташвиқу тарғиби тарзи ҳаёти солим миёни ҷавонон, ҷудо кардани маблағҳои грантӣ баҳри пешбурди соҳибкории хурду миёна аз ҷониби ҷавонон, пешгирӣ намудани гаравидани ҷавонон ба созмону ҳаракатҳои тундгаро, таъсиси марказҳои касбомӯзӣ, ҷойҳои иловагии корӣ барои ҷавонон, тарбияи хизматчиёни давлатӣ аз ҳисоби ҷавонони фаъол ва ташаббускор ва дигар масъалаҳо дастуру супоришҳои мушаххас доданд.

Дар ҳақиқат, мо тавассути симову садо ва матбуоти даврӣ шоҳиди ҳол ҳастем, ки ин бандҳои сиёсати давлатии ҷавонон ба таври васеъ татбиқ мешаванд. Фароҳам овардани шароити мусоиди таҳсил дар дохил ва хориҷи кишвар, дастгирии ҳамаҷонибаи наврасону ҷавонони соҳибистеъдод, ба истифода додани шудани варзишгоҳҳо дар ҳама минтақаҳои кишвар, иштироки фаъоли ҷавонон дар мусобиқаҳои байналмилалӣ, дар сатҳи мақомоти баландпояи давлатӣ дастгирӣ ёфтани пешниҳоду ташаббусҳои ҷавонон, ба вазифаҳои масъули давлатӣ таъин гардидани онҳо аз ҷумлаи чунин тадбирҳо ба шумор мераванд.

Дар зарфи 26 соли Истиқлолияти давлатӣ яке аз дастовардҳои муҳим ин ташаккул ёфтани механизми ҳавасмандӣ ва дастгирии олимони ҷавон дар соҳаи илму техника мебошад, ки он бо дастгирии бевоситаи Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар шакли бо Ҷоизаи ба номи Исмоили Сомонӣ сазовор гардонидани олимони ҷавон, ки корҳои беҳтаринро дар соҳаи илму техника анҷом додаанд, инъикос меёбад. Ҳамзамон, Ҷоизаи Кумитаи кор бо ҷавонон ва варзиш дар соҳаи адабиёт, рӯзноманигорӣ, санъат, меъморӣ, ихтироъкорӣ ва барномасозӣ (компютерӣ/ технологияҳои иттилоотӣ) арзи вуҷуд дорад, ки ғолибони он бо диплом ва маблағи Ҷоиза қадрдонӣ карда мешаванд.

Шоистаи таъкид аст, ки дар Тоҷикистони соҳибистиқлол бо эътироф ва тасдиқи ҳуқуқи ҳар кас ба озодии виҷдон ва озодии пайравӣ ба дин, инчунин баробарии ҳама дар назди қонун, новобаста аз муносибат ба дин ва эътиқод, дар асоси он ки Ҷумҳурии Тоҷикистон давлати дунявӣ аст, бо арзи эҳтиром ва таҳаммул ба тамоми дину мазҳабҳо, бо эътирофи нақши махсуси мазҳаби ҳанафии дини Ислом дар инкишофи фарҳанги миллӣ ва ҳаёти маънавии халқи Тоҷикистон Қонуни Ҷумҳурии Тоҷикистон “Дар бораи озодии виҷдон ва иттиҳодияҳои динӣ” қабул гардидааст, ки ба ҳар кас озодии эътиқодро ҳамчун ҳуқуқи конститутсионӣ кафолат медиҳад.

Мутаассифона, бо вуҷуди мавҷудияти ин гуна имкониятҳо ва шароити мусоиди пайравӣ аз эътиқоди аҷдодӣ (Исломи ноб) боз пайдо шудаанд ҷавонони гумроҳе, ки ба ҷои истифодаи нерӯи созанда ва эҷодкоронаи хеш ба нафъи давлату миллат бинобар пастии сатҳи маърифат ва огоҳӣ пайрави ҷараёнҳои ифротгарою тундрав гардида, ҳаёти хешро месӯзонанд.

Мо – ҷавонон бояд ҳамеша барои иҷрои вазифаҳои мушаххаси дар наздамон гузошташуда омода бошем, зеро ободу зебо нигоҳ доштани кишвар ва ба наслҳои баъдӣ ба мерос гузоштани мулки мутамаддину пешрафта масъулияти бузург дошта, ҳар фарди бедордил, бахусус ҷавононро водор менамояд, ки ба хотири таҳкими Истиқлолияти давлатӣ, Ваҳдати миллӣ, сулҳу субот ва густариши худшиносиву худогоҳӣ ҳамеша кӯшишу талош намоянд.

Таъкидан изҳор медорем, ки пайгирии ташаббусҳои созандаи Сарвари давлат, дастгирии фаъолияти пурсамари Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва иштироки фаъолона дар онҳо, ки нишони барҷастаи таваҷҷуҳи хос ва талош баҳри муаррифии дастовардҳои беназири Тоҷикистони соҳибистиқлол, руҳбаланд намудани ҷавонони муваффақ, кӯшишҳои беандоза баҳри рушди варзишу туризм, роҳнамоии ҷавонони соҳибзавқу эҷодкор мебошад, вазифаи ҳар яки мо – ҷавонони хушиқболи даврони Истиқлол аст.

Хушдил РАҲИМҶОНОВ, номзади илмҳои филологӣ

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.