23-юми май зери ин унвон бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи ҷавонон дар Китобхонаи миллии Тоҷикистон форуми ҷумҳуриявӣ баргузор гардид.

Дар форуми мазкур Матлубахон Сатториён - муовини Сарвазири Ҷумҳурии Тоҷикистон, Абдулло Раҳмонзода – раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Дилрабо Мансурӣ - муовини раиси Маҷлиси намояндагони Маҷлисии Олии Ҷумҳурии Тоҷикистон, Лутфия Абдулхолиқзода - муовини вазири маориф ва илми Ҷумҳурии Тоҷикистон, Маликшо Неъматзода - раиси Иттифоқи касабаи мустақили Ҷумҳурии Тоҷикистон, Ҳилолбӣ Қурбонзода - раиси Кумитаи кор бо занон ва оилаи назди Ҳукумати Ҷумҳурии Тоҷикистон, Дилноза Аҳмадзода - муовини директори Агентии хизмати давлатии назди Президенти Ҷумҳурии Тоҷикистон ва роҳбарони вазорату идораҳои дахлдор, ректорони муассисаҳои таҳсилоти олии касбӣ, ҷоизадорони Ҷоизаи ба номи Исмоили Сомонӣ, гирандагони Стипендияи президентӣ, олимону муҳаққиқони ҷавон ва ҷавонони фаъол иштирок намуданд.

Абдулло Раҳмонзода, раиси КҶВ форумро оғоз бахшида, дар ибтидо кулли иштирокчиён ва дар симои онҳо тамоми ҷавонони кишварро ба Рӯзи ҷавонони Тоҷикистон муборакбод намуд.

Номбурда зимни суханронии хеш иброз дошт: “Солҳои охир таваҷҷуҳу ғамхориҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати насли ҷавони кишвар афзун гардида истодааст. Аз ин рӯ, ҳар як ҷавони имрӯзаро мебояд дар ҷавоб ба ғамхориҳои Сарвари давлат садоқатмандона талош намоянду дар ободкориҳои кишвар саҳмгузор бошанд”. 

Матлубахон Сатториён, муовини Сарвазири Ҷумҳурии Тоҷикистон зимни баромади хеш иброз дошт, ки баргузории форуми имрӯза дар Рӯзи ҷавонони Тоҷикистон басо рамзӣ ва пурҳикмат аст. Ӯ гуфт:

“Зеро мо дар баробари натиҷагирӣ аз соли таҷлили ҷашни бузурги 30-солагии Истиқлоли миллӣ, ки дар таърихи миллати мо бо ҳарфҳои заррин навишта шуд, ҳоло ба самти истиқбол аз ҷашнҳои бузурги 25-солагии Рӯзи Ваҳдати миллӣ ва 30-солагии баргузории Анҷумани саодати миллат – Иҷлосияи XVI Шӯрои Олии Ҷумҳурии Тоҷикистон қадам мегузорем. Натиҷагирӣ аз ин соли хуҷастарақам аз ҳамаи мо, хоса шумо - ҷавонони бонангу ори тоҷик масъулиятшиносӣ, анҷоми корҳои бузурги касбӣ ва инсониро талаб мекунад”.



Дар идома гуфта шуд, ки раванди фаъолияти соҳаҳои гуногуни хоҷагии халқи кишвар паём аз он мерасонад, ки воқеан ҷавонон дар ҳамаи арсаҳои фаъолият - сиёсат, иқтисодиёт, маорифу фарҳанг, адабиёту санъат, тиббу технология, варзиш ва монанди ин ба натиҷаҳои назаррас ноил шуда, саҳми арзандаи хешро барои расидан ба ҳадафҳои бузурги давлатӣ гузошта истодаанд.

Форуми мазкур аз ду қисмат – маросими ифтитоҳӣ ва кор дар бахшҳо иборат буд. Дар бахшҳои форум беш аз 40 мақола ва маърузаҳои олимону муҳаққиқони ҷавон шунида шуд.
Дар фарҷоми форум аз ҷониби роҳбарияти Кумитаи кор бо ҷавонон ва варзиш ба иштирокчиёни фаъол сипосномаҳо тақдим карда шуд.

Наҷиба МУРОДБЕКОВА,
Таҳмина ЮСУФОВА, “ҶТ”