Аксар вақт нафароне дар ҳаёт комёб мешаванд, ки рӯзгори қашшоқонае доранду азобу машаққати зиёдро аз сар мегузаронанд. Ҳамин тариқ, подабон ба мақоми вазирӣ мерасаду фаррош роҳбари ширкати бонуфӯз мешавад ва бехонаву бесоҳибе соҳиби миллиардҳо доллар мегардад.

ИМКОНИЯТҲОИ БЕ МАҲДУДИЯТ

Танҳо имконоте, ки бо ҷасорату матонати беҳудуд тавъам мегардад, ягон маҳдудият надорад. Шумо он чизеро ки сидқан мехоҳед, албатта ба даст оварда метавонед, танҳо нахуст мақсади худро муайяну мушаххас карда тавонистан лозим аст. Агар шумо тамоми нерӯ ва маҳорати худро барои ба даст овардани мақсуд равона созед, чизе наметавонад садди роҳи шумо гардад. Исботи дақиқ ва намунаи беҳтарини ин гуфтаҳо рӯзгори Наҷот Валло Белкосем (Наджад Валло-Белкасем) аст. Саргузашти ин духтари мусулмонтабор барои аксари оламиён ва хосса барои онҳое, ки даврони кӯдакии душвор доштанд, манбаи илҳому мояи руҳбаландӣ мебошад. Вай исбот месозад, ки вақте шахс хоҳиш дошта бошад, ӯ ҳатман ба зинаҳои баландтарини муваффақият хоҳад расид. Бо вуҷуди он ки ин кори душворест, вале ба инсонҳо, қабл аз ҳама, эътиқоду боварӣ кӯмак хоҳад расонд.

МАЙЛУ ХОҲИШҲО ВА МАЪЛУМОТ

Ин ҷо сухан дар хусуси подабоне меравад, ки ба мансаби вазири маориф расид. Ӯ соли 1977 дар Надоре ном деҳаи хурдакаки Марокко ба дунё омадааст. Наҷот Валло Белкосем дар айёми душвори хурдсолиаш дар Марокко ба чарондани бузу гӯсфандон машғул буд. Падараш касби сохтмончӣ дошт. Духтарак дар кулбаи фақиронаи волидон дар қалби кӯчаки худ орзуҳои зиёде мепарварид.

Баъдан аҳли оилаи онҳо ба Фаронса кӯчиданд ва ӯ дар он ҷо ба мактаб рафта, сипас Донишгоҳи политехникии Парижро хатм намуд.

НАҚШАҲО

Сипас ин зани мубориз ва ҳадафнок паи амалисозии нақшаҳои худ камар баст. Нахуст коре, ки ӯ анҷом дод, ба узвияти ҳизб шомил гардиданаш буд. Ӯ дар ҳайати ин ҳизб барои ҳимояи ҳуқуқҳои шаҳрвандон ва ҳамзамон алайҳи поймолкунии онҳо мубориза мебурд.

ЗАҲМАТҲОИ САНГИН ҚАДРДОНӢ ГАРДИДАНД

Наҷот ҳамеша ба сиёсат шавқу ҳаваси зиёд дошт. Новобаста аз он ки вазъи молиявии ӯ ба бисёр чизҳо имкон намедод, аммо ӯ асло руҳафтода ва ноумед намешуд. Ҳамин тариқ, бо тавсияи ҳизб ӯ дар ҳукумати маҳаллӣ мушовир таъин гардид, ки масъулияти назорати чорабиниҳои калони ҷамъиятӣ ва кор бо ҷавононро бар душ дошт.

Соли 2005 Наҷот оиладор шуд. Ҳамсараш Борис Валло ӯро дастгирӣ мекард. Соли 2008 Шӯрои генералӣ ба фаъолияти Наҷот мароқ зоҳир намуд. Ӯ дар миёни сиёсатмадорон маълуму машҳур гашта буд. Баъдан, вақте ӯро раиси Шӯрои департамент (округи маъмурӣ) дар шаҳри Рона таъин намуданд, касе фикр ҳам намекард, ки ӯ ситораи дурахшоне дар фазои сиёсати Фаронса хоҳад гашт. Таъин шудани Наҷот ба вазифаи вазири ҳифзи ҳуқуқи занҳо ва котиби матбуотии Президенти Фаронса Олланд дар ҳаёти ӯ тағйироти куллиро ба миён овард.

ҲАЁТ БЕ ТАЗЗОДҲО ВУҶУД ДОШТА НАМЕТАВОНАД

Соли 2012. Давраи рӯ ба рӯ гаштан бо мушкилоти хеле зиёд фаро расид. Далели он ки ӯ дар оилаи нодору қашшоқ ба воя расида буд, барояш монеаҳои зиёде эҷод менамуд. Вале ҳамоно муборизаҳои ӯ идома доштанд. Ӯ ҳадафи асосӣ ва ангуштнамои рақибони нажодпараст қарор гирифт. На танҳо ба кору пайкор, балки ба тарзи либоспӯшии ӯ низ эрод мегирифтанд, вале ӯ ин ҳамаро сарфи назар мекарду таслим шудан намехост, яъне, ҳадафи асосиаш як буд - мубориза ва танҳо мубориза. Ва оқибат соли 2014 ӯ вазири маорифи Фаронса таъин градид. Ӯ аз ҷавонтарин ашхоси дар чунин вазифа таъингардида ва бар замми ин нахустин зани мусулмон дар ҳайати Ҳукумати Фаронса буд.

РОҲ МУШКИЛГУЗАР БУД

Бале, роҳи паймудаи Наҷот роҳи осон набуд, аммо ӯ собит карда тавонист, ки вақте инсон дар назди худ мақсад гузоштаву ба роҳи дуруст қадам мегузорад, ҳатман ба мурод мерасад. Албатта, болоравии мансабии хеле фавқулоддаи як ҷавондухтари деҳотӣ ва бар замми ин мусулмон дар як кишвари пешрафтаи ҷаҳон ин бешак, комёбии беназир аст.

Баъди амалҳои террористӣ дар Париж Наҷот ба мубориза баҳри ҳимояи арзишҳои миллӣ бархост. Ӯ нахустин зане буд, ки дар сафи пеши муборизон қарор гирифтаву садо баланд намуд. Ва шубҳае нест, ки рамзи табаддулоти сиёсӣ дар ин мамлакат гардид.

Наҷот 250 миллион евро ҷудо намудааст, то ба ҷавонон ва тамоми омӯзгорон тарзҳои мубориза алайҳи нажодпарастиро таълим диҳад.

ШАВҚ АГАР РАҲБАР ШАВАД...

Саргузашти ин духтари мубориз бори дигар собит месозад, ки агар шахс мушкилнописанд бошаду бо шавқу завқи беандоза барои ба даст овардани мақсад талош кунад, на маҳдудиятҳои миллату нажодӣ, на баромади иҷтимоӣ, на ҷинсият ва на синну сол наметавонанд барои муваффақ гаштани шахс монеа эҷод кунанд. Ва бешак, подабон ба мақоми вазирӣ мерасаду фаррош роҳбари ширкати бонуфуз мешавад ва бехонаву бесоҳибе соҳиби миллиардҳо доллар мегардад.

Шаҳло ЭШОНОВА, “ҶТ”