ҶАВОНОН
Сешанбе 31 Март 2020 04:05
6602
Хушбахтии сокинони кишвар аз тинҷиву оромӣ, ваҳдати сартосарӣ, осоиштагиву оромӣ ва фароҳам будани шароити созгори зиндагӣ сарчашма гирифта, ҳар давлате, ки дорои чунин неъматҳои бебаҳост, мардуми он бешак хушбахтанд. Ҷумҳурии Тоҷикистон низ пас аз соҳибихтиёр эълон гардиданаш, зери роҳбарии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамеша талош бар он дорад, то оромию осудагӣ доимо пойбарҷо бошаду мардуми ин меҳан сарбаландона умр ба сар баранд.

Дар воқеъ, ҷавонон ҳамчун ояндагони ин меҳан ва миллат аз солҳои аввали соҳибистиқлолӣ дар баробари дигар қишрҳои ҷомеа дар маркази диққати Ҳукумати кишвар, махсусан Президенти кишвар муҳтарам Эмомалӣ Раҳмон буда, ҷиҳати рушд ва инкишофи ҳаматарафаи қишри ҷавон тамоми имконот ва шароитҳои мусоид фароҳам гардидааст. Агар гӯем, кулли пешравию дастовардҳои ҷавонон натиҷаи сиёсати хирадмандони Пешвои миллат аст, хато нахоҳем кард. Зеро дар ҳар суханронии хеш Президенти кишвар нақши ҷавононро дар рушди кишвар муҳим арзёбӣ менамоянду онҳоро пайваста ба омӯхтани илмҳои замонавӣ ва аз бар кардани касбу ҳунар ҳидоят месозанд.

Боиси ифтихори ҳар яки мост, ки бо назардошти саҳми арзандаи Пешвои миллат, дар ташаккули давлатдории навини кишвар, эҳёи давлати миллӣ, таъмини сулҳу ваҳдат ва баланд бардоштани нуфузу эътибори Тоҷикистон дар арсаи байналмилалӣ аз соли 2016 инҷониб 16 ноябр дар мамлакат ҳамчун Рӯзи Президенти Ҷумҳурии Тоҷикистон таҷлил карда мешавад. Ва инак соли чорум аст, ки мардуми шарафманди кишвар Рӯзи Президентро бо шукӯҳ ҷашн мегиранд.

Париваш Пулотова, яке аз ҷавононест, ки Рӯзи Президентро бо ифтихор таҷлил менамояд. Ӯ зимни суҳбат гуфт: “Нақши Президенти кишвар дар пойдории истиқлолият ва суботу амният бағоят калон аст. Ӯ дар вақти бесарусомониҳои ибтидои соҳибистиқлолӣ девори устувори миллат шуд ва тавонист, ки пеши роҳи нооромиҳоро гирад. Пешвои миллат мунодии сулҳу ваҳдат, варзишпарвару ҷавонпарвар ва сарвари ғамхору ростпайкор мебошад. Имрӯзҳо ҷавонон Пешвои миллатро идеали худ медонанд ва хоҳанд донист. Онҳо имрӯз мекӯшанд, то сиёсати хирадмандонаи Пешвои миллатро дастгирӣ намоянд. Ҳамаи ғамхориву дастгириҳо нисбат ба насли наврасу ҷавонон аз таваҷҷуҳи наҷиби Пешвои миллат шаҳодат медиҳад”.

Воқеан, таҷлил гардидани Рӯзи Президент барои ҳар як сокини кишвар, махсусан ҷавонон боиси ифтихор ва сарфарозист. Зеро Пешвои миллат дар дилхоҳ вохӯриҳояшон бо ин қишри фаъоли ҷомеа роҷеъ ба ҳаёт ва нақши ҷавонон дар рушду нумуи соҳаҳои гуногуни хоҷагии халқи мамлакат баромад намуда, онҳоро ояндаи давлату миллат номидаанд. Тавре Президенти ҷумҳурӣ қайд намудаанд: “Мо аз он қаноатмандем, ки имрӯз ҷавонони мо бо азму иродаи қавӣ ва бо завқи баланд илму донишҳои муосирро аз худ намуда, дар соҳаҳои гуногуни ҳаёти давлату ҷомеа ва ба хотири рушди кишвари маҳбубамон саъю талоши фаъолона доранд. Мо ба ҷавонони кишвар ҳамчун неруи фаъолу боғайрат, ташаббускору созанда эътимоди зиёд дорем ва дар раванди бунёди ҷомеаи демократӣ ва ободу пешрафта ба онҳо такя мекунем”.

Ба ҷавонони кишвар эътимод намудани Роҳбари давлат ва дар пешрафту тараққиёти давлат такя намудан ба онҳо худ баёнгари он аст, ки роҳбарияти олии мамлакат дар симои ҳар ҷавони ин сарзамин ояндаи миллатро мебинанд.

Ҳукумати кишвар барои он ки имрӯз ҷавонону наврасон хондаву соҳиби илмҳои замонавӣ гарданд, соҳибкасбу мутахассиси варзида шаванд ва дар маҷмӯъ роҳи дурусти зиндагиро интихоб намоянду саҳмгузори пешрафти меҳан бошанд, кулли имконоти заруриро фароҳам овардаанд.

Ҷавонон низ бо дарки ин ҳама дастгириҳо дар ҳар соҳае ҷаҳду талош бар он доранд, то фаъолияти хуб дошта бошанду дар пешрафти давлати худ саҳмгузор гарданд. Ҷаҳду талоши ҷавонон аст, ки имрӯз тибқи маълумоти оморӣ дар мамлакат беш аз 44 фоизи хизматчиёни давлатиро ҷавонони то 35 - сола ташкил медиҳанд.

Барои он ки фаъолияти ҷавонон дар самтҳои гуногун танзим шавад, аз ибтидои Истиқлолияти давлатӣ қарору қонунҳои зиёде дар самти ҷавонон қабул гардидаанд, ки ҳамаи он дар маҷмӯъ барои татбиқи самараноки сиёсати давлатии ҷавонон заминаи мусоид фароҳам оварда, мавқеи ҷавононро дар ҷамъият боз ҳам устувор гардонид.

Фароҳам будани шароитҳои мусоиди илмомӯзист, ки солҳои охир ширкати хонандагони ҷумҳурӣ дар олимпиадаҳои сатҳи ҷаҳонӣ бештар гардида, дастовардҳо низ дар ин самт чашмрасанд. Агар соли 2016 хонандагони тоҷик аз олимпиадаҳои байналмилалӣ 133 медал – 21 тилло, 33 нуқра ва 79 биринҷӣ ба даст оварда бошанд, пас дар соли 2017, ки соли бобарор унвон мешавад, хонандагони тоҷик дар 26 олимпиадаҳои байналмилалӣ иштирок намуда, 165 медал, аз ҷумла 34 тилло, 57 нуқра ва 74 биринҷӣ ба даст оварда, Парчами давлатро дар арсаи ҷаҳонӣ баланд бардоштанд. Бино ба таъкиди Манучеҳр Ҳабибзода, мудири бахши таълимӣ-методии Маркази ҷумҳуриявии дарёфт ва рушди истеъдодҳои назди Вазорати маориф ва илми кишвар, дар 9 моҳи соли 2019 бошад, 376 хонандаи тоҷик дар 25 олимпиадаи байналмилалӣ иштирок намуда, соҳиби 207 медал, 49 медали тилло, 56 нуқра ва 102 биринҷӣ гардидаанд. Инчунин дар ин давра дар олимпиадаҳои ҷумҳуриявӣ хонандагони кишвар 654 медал, аз ҷумла 123 тилло, 203 нуқра ва 325 биринҷӣ ба даст овардаанд, ки ин ҳама натиҷаи дастгириҳои пайвастаи Ҳукумати мамлакат мебошад.

Мавлуда Давлатмамадова, бонуи ихтироъкор натиҷаи дастовард-ҳои худро дар роҳи илму ихтироот аз дастгириҳои Роҳбари давлат медонанд. “Имрӯзҳо шукронаи Истиқлолияти давлатамон мекунем, ки бо дастгирии Пешвои миллат муҳтарам Эмомалӣ Раҳмон мо-бонувони тоҷик дар тамоми соҳаҳо кору фаъолият дорем. Аз ҷумла дар соҳаи илму ихтироот. Маҳз дастгирӣ ва ғамхории Роҳбари давлат буд, ки ҳамчун ҷавонзани ихтироъкор дар чандин озмунҳои ҷаҳонӣ иштирок намуда, тавассути дониши хеш ва ихтирооти худ Парчами кишварамро баланд бардоштам. Ҳар он чизе, ки дар соҳаи илму ихтироот ба даст овардаам, кулли он натиҷаи ғамхорӣ ва дастгирии Роҳбарияти олии мамлакат аст. Ваъда медиҳам, ки дар оянда низ тавассути дониши хеш ҷаҳду талош менамоям, то дар соҳаи худ ба дастовардҳои нав ноил гардаму тавассути он кишвари хешро дар арсаи ҷаҳонӣ муаррифӣ созам”, - иброз дошт М. Давлатмамадова.

Воқеан, кулли дастовардҳои ҷавонон дар соҳаҳои гуногун маҳз бо дастгирии Ҳукумати кишвар дар зери роҳбарии Президенти мамлакат мебошад. Нуктаи зерини Пешвои миллатро ҷавонон бояд сармашқи кори худ қарор диҳанду бо аз бар кардани илму донишҳои муосир дар рушди минбаъдаи кишвар саҳми худро гузоранд, ки фармудаанд: “Ҷавонони мо бояд дарк намоянд, ки Ватани муқаддасамонро ба ҷуз худи мо каси дигар обод нахоҳад кард... Ҷавонони мо вазифадоранд, ки бо истифода аз имкониятҳои фароҳамовардаи давлату Ҳукумати кишвар ҳарчи бештар ба омӯхтани илму дониш ва касбу ҳунар машғул бошанд, то ки фардои Ватан ва ояндаи миллатро ободу осуда гардонида тавонанд”.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
24 25 26 27 28 29 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Март 2020 c.