Имрӯз, 3-юми май, зери унвони мазкур дар Китобхонаи миллии Тоҷикистон Форуми байналмилалии рушди сармояи инсонӣ доир гардид.

Форуми мазкур бо ибтикори Кумитаи кор бо ҷавонон ва варзиши назди Ҳукумати ҷумҳурӣ баргузор шуда, дар он намояндагон аз Дастгоҳи иҷроияи Президенти Ҷумҳурии Тоҷикистон, Барномаи рушди СММ дар Тоҷикистон, Вазорати меҳнат, муҳоҷират ва шуғли аҳолии Ҷумҳурии Тоҷикистон, Вазорати маориф ва илми Ҷумҳурии Тоҷикистон, Кумитаи кор бо занон ва оила ва дигар вазорату идораҳо иштироку суханронӣ намуданд.  

Аҳтам Абдуллозода, раиси Кумитаи кор бо ҷавонон ва варзиш, форумро  ифтитоҳ намуда, зимни суханронӣ таваҷҷуҳи давлату Ҳукумати кишварро нисбат ба ҷавонон хуб арзёбӣ карда, доир ба дастгириву ғамхориҳои Сарвари давлат ибрози назар намуданд. 

Дар форуми имрӯза, ки бевосита барои ба муваффақият расидани ҷавонон аҳамияти калон дошт, раиси Кумита бо мисолҳои возеҳу равшан ва далоили тасдиқшуда, аз пешравию комёбиҳои ҷавонони кишвар гуфта гузаштанд.