Дар ноҳияи Дарвоз 850 нафар ҷавонону варзишгарон бо шиори “Ҷавонон - пайрави Пешвои миллат” аз пеши беморхонаи марказӣ то мавзеи “Таги чинор” – и ҷамоати Қалъаи Хумб роҳпаймоӣ карданд.

Бино ба иттилои мудири Бахши кор бо ҷавонон ва варзиши ноҳия Талабшо Аламов, ин иқдом аз тарафи бахш ба ифтихори Рӯзи ҷавонони мамлакат ташкил шуда, ҳамчунин баъди он ҷавонон бо раҳбарияти ноҳия вохӯрӣ намуданд.

Абдураҳмонзода Саидбурҳони Саидраҳмон, раиси ноҳияи Дарвоз аз ҷавонон даъват ба амал овард, ки умри ҷавониро ба аъмолу корҳои шоиста ва ободонии Ватан – модар равона созанд, то наслҳои дигар аз онҳо сабақ омӯзанд.

Баъди маърӯзаҳои пурмӯҳтавои ҷавонон оид ба сиёсати хирадмандонаи Пешвои миллат дар рушди иҷтимоӣ – солимии ҷавонон, нақши наслҳои имрӯзу фардо дар пойдории ваҳдату истиқлолият, таҳкими меҳанпарастӣ ва ҷалби ҷавонон ба корҳои созандагӣ, барномаи консертӣ баргузор шуд.

Дар он ҷавонони ҳунарманд, сарояндагон аз баъзе ҷамоату маҳаллаҳои ноҳия созу суруди дилнишинро пешкаши ҳозирин гардонданд.