Ба муносибати Рӯзи ҷавонони Тоҷикистон дар шаҳри Хоруғ роҳпаймоии зиёда аз 5600 нафар ҷавонону наврасон таҳти унвони "Ҷавонон — пайрави Пешвои миллат" баргузор гардид.

Ҳамчунин ҷавононро муовини сардори Раёсати кор бо ҷавонон ва варзиши вилоят Сураҷ Чоршанбиев, мудирони Бахши кор бо ҷавонон ва варзиши шаҳру Шуъбаи кор бо ҷавонони назди Донишгоҳи давлатии Хоруғ ба номи М. Назаршоев Имомёрбек Имомёрбеков ва Юсуф Асадбеков ҳамроҳӣ карданд.

Иштирокчиён бо Парчами давлатӣ, шиору овезаҳо таҳти унвони "Пешвои миллат — рамзи иттиҳоду сарҷамъи ва саодату осудагии мо ҷавонон", "Ваҳдату истиқлолият парчами пирӯзиҳои мост", "Пешвои мо ифтихори мост!" аз варзишгоҳи марказӣ то майдони Исмоили Сомонӣ роҳ паймуданд.

Дар Боғи парчам муовини раиси ВМКБ Гулдаста Орумбекзода ва Сураҷ Чоршанбиев ҳозиринро ба муносибати Рӯзи ҷавонон табрику таҳният гуфта, ба ҷавонон дар ин санаи муҳим ояндаи нек ва бурдбориҳои бардавом таманно намуданд.

Баъдан бо иштироки ҳофизони маъруфи вилоят Зиёрати Саидик, Аҳмади Саидик ва дигар сарояндагони ҷавон, дӯстдорони рақсу суруд барномаи хотирмони фарҳангӣ доир гашт.