Имрӯз дар идомаи чорабиниҳо бо иштирокчиёни Фестивали ҷумҳуриявии "Дӯстии ҷавонон" дар шаҳри Роғун, ҳамчунин бахшида ба 29-умин солгарди Рӯзи Ваҳдати миллӣ бо иштироки ҷавонон роҳпаймоӣ баргузор гардид.

Дар ин чорабинии ватандӯстона иштирокчиёни фестивал ва ҷавонони фаъоли шаҳр иштирок намуда, аз назди Парчами миллӣ то Осорхонаи шаҳр роҳ паймуданд.

Сипас, иштирокчиёни фестивал " аз осорхонаи шаҳри Роғун боздид намуда, бо таъриху фарҳанг, осори гузаштагон ва мероси ниёгон шинос шуданд. Ин боздид барои ҷавонон имкони хубе фароҳам овард, то донишу маърифати худро дар бораи таърихи пурғановати як гӯшаи диёр ғанӣ гардонанд.

М. МУҚАДАМОВА, “ҶТ”