Барои ояндаи хуберо доро будан, насли наврасу ҷавон ҳаматарафа дастгирӣ меёбанду шароити беҳтарини таълиму тарбия баҳрашон муҳайё мегардад ва аз ҷониби роҳбарияти олии мамлакат ба эшон ҳавасмандиҳои зиёде карда мешаванд. Яке аз чунин ҳавасмандиҳо таъсиси Стипендияи президентӣ аст. Онҳое ба гирифтани ин стипендия ноил мегарданд, ки дониши зиёд доранду малакаи хуби илмомӯзӣ. Бо назардошти ҳамин омил аз соли оянда шумораи гирандагони Стипендиияи президентӣ зиёд карда мешавад.

Носирзода Гулшанбону Сӯҳроб яке аз ҷавондухтарони фаъол ва гирандаи Стипендияи президентист. Ӯ соли 2002 дар шаҳри Душанбе ба дунё омада, айни замон хонандаи синфи 11-и муассисаи таҳсилоти миёнаи умумии №13-и шаҳри Душанбе аст.

Гулшанбону ҳангоми таҳсил бо истифода аз имкониятҳои донишомӯзӣ иштирокчии чандин озмунҳо буда, дастовардҳои зиёде низ дорад. “Иштирок дар озмунҳо ҳамеша маро барои бештар намудани донишу малака таҳрик медиҳад. То ин дам дар чандин озмунҳои мактабӣ, ноҳиявӣ, шаҳрӣ ва ҷумҳуриявӣ иштирок намудаам. Дар ин росто ғолибияти зиёде низ дорам. Аз ҷумла, ғолиби озмуни ҷумҳуриявӣ аз фанни русӣ, озмуни шаҳрии “Дастони моҳир”, олимпиадаи даври ноҳиявӣ ва шаҳрӣ аз фанни биология ва озмуни “Китобхони беҳтарин” дар ноҳияи И.Сомонӣ мебошам. Дар озмуни шаҳрии иншои беҳтарин бахшида ба ҷашни Ваҳдати миллӣ сазовори ҷойи намоён гардидаам. Инчунин барандаи озмуни Стипендияи президентӣ дар солҳои ‎2018-2019 ва 2019-2020 мебошам. Хушбахтам, ки аз соли 2020 роҳбари гирандагони Стипендияи президентӣ дар шаҳри Душанбе таъин шудаам”, - гуфт, ӯ.

Хеле хурсанд аст, ки ду маротиба гирандаи Стипендияи президентӣ асту имрӯз бошад, баробари стипендиат будан, боз роҳбари маҳфили “Стипендиатҳои ҷавон”-и шаҳри Душанберо бар уҳда дорад.

Ба забономӯзӣ шавқи беандоза дошта, онро барои ҳар нафар муҳим арзёбӣ мекунад. Ӯ гуфт: “Аз хурдӣ ба омӯзишу аз бар кардани донишҳои зарурӣ диққати ҷиддӣ медиҳам. Барои он ки ҷаҳонбиниам боз ҳам васеъ гардаду доир ба ҷаҳони имрӯза маълумоти хубтару беҳтаре дошта бошам, аз 9-солагӣ ба омӯзиши забонҳои русӣ, англисӣ ва арабӣ шурӯъ кардам. Хеле хурсандам, ки баробари забони модарӣ боз забонҳои хориҷиро меомӯзам”.

Ӯ таъкид менамояд, ки бояд тамоми ҷавонон аз имкониятҳои фароҳамгардида, самаранок истифода намоянду ҷавобан ба ғамхориҳои давлату Ҳукумат илму дониш ва касбу ҳунар омӯзанд.

- Хушбахтем, ки дар чунин сарзамини обод зиндагонӣ дорем. Барои ин имкониятҳое, ки муҳайёанду тавассути он ба комёбиҳои зиёд ноил гардидам, миннатдории самимии хешро ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баён менамоям. Ҷавобан ба ин ҳама ғамхориву дастгириҳо кӯшиш ба харҷ медиҳам, ки ҳамчун як ҷавони асили ватандӯст дониш омӯзаму саҳми арзандаи худро дар ободии ватани азизу маҳбубам гузорам. Мо-ҷавонон ҳамеша пайравони асили Пешвои миллат боқӣ монда, талош менамоем, то Тоҷикистони азизро дар арсаи ҷаҳонӣ боз ҳам бештар муаррифӣ созем, - гуфт, Гулшанбону.

Ба таъкиди ӯ имрӯз ҷавонони кишварамон бисёр фаъоланд. Чун вақте ба соҳаҳои гуногун назар менамоем, шоҳид мегардем, ки баробари дигар қишрҳои ҷомеа ҷавонон низ бо сари баланд пайи кору фаъолиятанд. Онҳо бо ҷаҳду талош ва эҳсоси худшиносиашон дар оянда метавонанд, номи Тоҷикистонро дар арсаи ҷаҳонӣ муаррифӣ намоянд.

Дар оянда орзуву нақшаҳои зиёд дорад. Ҳадафаш ин аст, ки пас аз хатми мактаби миёна ба яке аз бонуфузтарин донишгоҳи кишварамон дохил шуда, ихтисоси “Сиёсат ва идораи давлатӣ”-ро аз бар созаду оянда ҳамчун яке аз занҳои сиёсатмадор саҳми худро дар ободии кишвари хеш гузорад. Мо дар ин ҷода барояш барору комёбӣ хоҳонем.

P/S: Аз ин шумора ба баъд дар гӯшаи мазкур ҷавононе муаррифӣ мегарданд, ки гирандаи стипендияи мазкуранду бо истифода аз имкониятҳои мавҷуда пайи илмомӯзианд.