- Ҳар нафар нақшаҳои ояндаи худро дораду баҳри амалӣ гардиданашон аз замони хурдсолӣ талош менамояд. Аз хурдӣ орзуи духтур шуданро дорам ва дар оянда мехоҳам, ки равонаи роҳи тиб гардида, саҳми худро дар солимии миллати азизам гузорам. Зеро имрӯз ҷомеаи ҷаҳонӣ ба табибон ниёз дорад ва мақсадам ин аст, ки дар ин соҳа мутахассиси хуб шаваму ба халқу ватанам содиқона хизмат намоям – гуфт, ҳамсуҳбати мо, Иброҳим Азизов.

Вақте имрӯз як ҷавони кишвар ба мисоли қаҳрамони мо дар зиндагӣ ҳадаф дорад ва ба кадом пеша рафтану чи гуна саҳм гузоштани худро дар роҳи рушди меҳан медонад, ин воқеан боиси дастгирист.

Иброҳим Азизов, хонандаи синфи 11-и Литсей барои хонандагони болаёқати равияи иқтисодӣ дар шаҳри Душанбе ва гирандаи Стипендияи президентӣ дар соли хониши 2019-2020 мебошад.

Ӯ ба фанҳои математика, забони англисӣ, забон ва адабиёти тоҷик шавқи беандоза дошта, тӯли таҳсил дар як қатор озмуну олимпиадаҳои ҷумҳуриявию байналмилалӣ иштироки фаъолона намудааст. Аз ҷумла, дар олимпиадаҳои байналмилалии “Kangaroo” сазовори ҷойи якум, “IMAS” сазовори ҷойи дуюм, “Owlypia” соҳиби ҷойи дуюм, “Hippo” ва “IYMC” соҳиби ҷойи ифтихорӣ гаштааст. Дар сатҳи дохилимактабӣ ҳамчун “Китобхони беҳтарин”, “Беҳтарин эссенавис” ва “Математики беҳтарин” шинохта шуда, бузургтарин дастоварди худро дар соли таҳсили 2019-2020 сазовор гаштан ба Стипендияи президентӣ медонад.

Ӯ аз изҳори хушнудӣ менамояд, ки имрӯз шароит барои илмомӯзӣ беҳтар гардидаву баробари ин ҷавонону наврасон ҳадафмандона дониш меомӯзанд. “Ҷиҳати илмомӯзӣ ҳоло дар кишвар ягон мушкилӣ набуда, рӯз то рӯз сатҳи илмомӯзиву донишомӯзии ҷавонону наврасон беҳтар мешавад. Ин аз он шаҳодат медиҳад, ки насли ҷавон дарк кардаанд, танҳо тавассути доштани дониш шахс ба мақсад мерасаду соҳиби ҳаёти хуб мегардад”, - иброз дошт ӯ.

Ба таъкиди ҳамсуҳбати мо ҷавонону наврасон бо истифода аз ин ҳама шароитҳо бояд илму дониш омӯзанд. Зеро барои ҷавонону наврасон мактабҳову марказҳои таълимӣ бо шароитҳои ҳозиразамон сохта шудааст. Насли ҷавон бояд ба қадри ин ҳама дастгириву шароитҳои фароҳамнамудаи Ҳукумат расида, баҳри баланд бардоштани номи Ватани азизи хеш, яъне Тоҷикистони соҳибистиқлол дар арсаи ҷаҳонӣ илму дониш омӯзанд.

Иброҳим доир ба таваҷҷуҳи Президенти кишвар муҳтарам Эмомалӣ Раҳмон ба насли ҷавон иброз дошт: “Ҳамчун як стипендианти президентӣ аз таваҷҷуҳи падаронаи Пешвои миллат миннатдор мебошам, ки барои мо - ҷавонону наврасон чунин имкониятҳоро фароҳам сохтаанд. Ҳама чизро Роҳбари давлат барои мо муҳайё кардаанд, танҳо иродаи илмомӯзӣ намудан лозим асту халос”.

Ӯ мегӯяд, бо чунин дастгириҳо мо насли ҷавон бо ҳамсолон дар чорабиниҳои гуногун иштирок менамоем, ки ин беҳтарин имконияти рушд бахшидани донишу малакаамон аст.

Дар интиҳои суҳбат вақте доир ба нақши ҷавонон дар пешрафти ҷомеа пурсон гардидем, гуфт: “Нақши ҷавонон дар рушди кишвар бисёр муҳим аст, зеро ояндаи кишвар маҳз дар дасти онҳост. Пешвои миллат низ ин нуктаро муҳим дониста, ба ҷавонони кишвар бовар намуда, дар ҳама баромадҳои хеш пайваста таъкид менамоянд, ки ҷавонони мо бояд имрӯз илму дониш омӯзанд. Мо-ҷавонон бояд ба ин боварии Пешвои миллат муҳтарам Эмомалӣ Раҳмон ва Ҳукумати кишвар сазовор гардида, барои рушду нумуи кишвари хеш саҳми босазои худро гузорем”.