Таҳти унвони мазкур 16 феврал бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ташкилоти ҷамъиятии “Пайравони Пешвои миллат” дар толори Литсейи ҳарбии Вазорати мудофиаи кишвар ҳамоиши сиёсиву фарҳангӣ бахшида ба 30 – солагии Қувваҳои Мусаллаҳи мамлакат баргузор гардид.

Дар он Парвиз Собирзода, муовини раиси Кумитаи кор бо ҷавонон ва варзиш, Зарнигор Раҷабзода, муовини раиси ташкилоти ҷамъиятии “Пайравони Пешвои миллат”, Абдурашид Ҳотамиён, полковник, сардори шуъбаи кор бо ҷавонони Раёсат оид ба корҳои сиёсӣ – тарбиявии Вазорати мудофиа, Муҳиддин Каримзода, генерал-майор, сардори Литсейи ҳарбии Вазорати мудофиа, афсарону сарбозон ва як қатор ҷавонони фаъол ширкат варзиданд.

Пас аз садо додани Суруди миллӣ Парвиз Собирзода баромад намуда, дар ибтидо ҳамаи иштирокчиёнро ба муносибати 30 – солагии таъсисёбии Қувваҳои Мусаллаҳ муборакбод гуфт.

“Артиши миллӣ кафили суботи сиёсиву иҷтимоии мамлакат буда, яке аз рукнҳои аввалини сиёсати давлатдорӣ ва кафолати сулҳу субот ва оромии ҷомеа ба шумор меравад. Имсол аз таъсисёбии Артиши миллӣ 30 сол пур мешавад. Шумо ҷавонони саодатманди даврони истиқлол огоҳ ҳастед, ки Тоҷикистон аз рӯзҳои аввали ба даст овардани соҳибихтиёрӣ ба чӣ мушкилиҳо рӯ ба рӯ шуд. Дар чунин вазъи мураккаб маҳз бо талошҳои Сарфармондеҳи Олии Қувваҳои Мусаллаҳ, генерали артиш, муҳтарам Эмомалӣ Раҳмон ба хотири ҳифзи арзишҳои миллӣ ва оромии ҷомеа Артиши миллӣ таъсис гардид”, - иброз дошт Парвиз Собирзода.

Сипас, аз ҷониби муовини раиси Кумита бахшида ба 30 – солагии таъсисёбии Қувваҳои Мусаллаҳ ба роҳбарияти литсейи мазкур, намояндаи Вазорати мудофиа ва як қатор афсарон ва ҷавонон сипосномаҳо супорида шуда, барномаи фарҳангӣ анҷомбахши ҳамоиш гардид.

Т. ЮСУФӢ, “ҶТ”