ҶАВОНОН
Ҷумъа 19 Апрел 2024 07:06
Ё “Дар ҷустуҷӯи хушбахтӣ”
Вақте Крис Гарднер ҳамроҳи писари хурдсолаш дар рӯи фарши ҳоҷатхонаи ҷамъиятӣ мехобид, ҳаргиз тасаввур карда наметавонист, ки чунин шеваи рӯзгори ӯ замоне мавзӯи асосии филми машҳури Ҳолливуд мегардад.
Дар ҷустуҷӯи хушбахтӣ
Дар оғози солҳои 80-уми асри гузашта Гарднери 27-сола ҳамроҳи писари худ, ки ҳанӯз сесола нашуда буд, муддати се сол бе хонаву дар ва бе сарпаноҳ, бе макони зисти доимӣ дар кӯчаҳои Сан-Франсиско, Калифорния сарсону овора мегашт. Гарднер дар ширкате ба ҳайси коромӯз кор карда, музди ночизе мегирифт, ки барои ҳуҷраеро ба иҷора гирифтан низ кифоят намекард.
Баъди муноқишаҳои оилавӣ завҷааш ӯро тарк карду ӯ ҳамроҳи писарчаи хурдсолаш танҳо монд ва ҳар ҷо ки рост меомад, шабро рӯз мекард. Ӯро ғайр аз ҳоҷатхона гоҳ дар истгоҳи роҳи оҳан медиданду гоҳ дар боғи истироҳатӣ ва гоҳе дар калисову гоҳе дар таги мизи кории сардораш. Ҳамкорон баъзан аз сари раҳму шафқат ба ӯву писараш кӯмак мекарданд, аммо он ба пуррагӣ барои боғчаи бачаҳо ва дигар эҳтиёҷоти писараш масраф мегардид. Новобаста аз ин ҳама мушкилот, корҳои Крис дар ҷои кор бомуваффақият ҷараён доштанд. Ӯ дар фурӯши саҳмияҳо ва облигатсияҳо қобилият ва маҳорати хубу нотакрор нишон медод. Ин буд, ки баъди коромӯзӣ ӯро дар ширкати Dean Witter Reynolds (DWR ) ба таври доимӣ ба кор қабул намуданд. Ва оқибат Крис хонаеро ба иҷора гирифту мартабааш зина ба зина боло мерафт. Соли 1987 Крис Гарднер ширкати маблағгузории хусусии худро бо номи Gardner Rich таъсис дод.
Ҳолливуд
Имрӯз моликияти Гарднери 62-сола зиёда аз 60 миллион долларро ташкил медиҳад. Ӯ дар аксар кишварҳои олам ташкилотҳои зиёди хайрия дораду ба ашхоси бехонумон ва бесарпаноҳ кӯмак мерасонад. Китоби ӯ бо унвони “Дар ҷустуҷӯи хушбахтӣ” дар як муддати кӯтоҳ ҳамчун намунаи осори гаронарзиш маълуму машҳур гардид. Вақте ҳолномаи ӯ дар бораи мушкилоти рӯзгори гузашта, даврони коромӯзӣ дар DWR ба доираи васеи хонандагон муаррифӣ гардид, корманди масъули Ҳолливуд ба ӯ таклиф намуд, то аз рӯи асараш филм офаранд.
Соли 2006 филме бо чунин ном ба навор гирифта шуд. Уилл Смит, ки нақши Крис Гарднерро мебозид, барои иҷрои беҳтарин нақши мардона соҳиби ҷоизаи “Оскар” гардид. “Намехоҳам чизеро тағйир бидиҳам, - мегӯяд Крис. - Дар кӯдакӣ ман хеле азоб кашидам ва ин ба хотири он буд, ки фарзандони ман азоб накашанд. Вақте панҷсола будам, аҳд карда будам, ки фарзандони ман бояд аз гузаштаи ман ба хубӣ огоҳ бошанд”.
Модар – манбаи илҳом
Крис дар шаҳри Милуоки, Висконсин ба дунё омада, падарашро дар ёд надошт. Ӯ ҳамроҳи модар ва падарандараш, ки шахси дағалу майзадае буд, дар муҳити фақру нодорӣ ба воя расид. Як муддат ӯ дар хонаи кӯдакон буд, чунки модарашро барои қасди куштори шавҳар карданаш ба ҳабс гирифтанд. Новобаста аз душвориҳои даврони кӯдакӣ Крис модарашро манбаи илҳоми худ меҳисобад. Аз ёддоштҳои Гарднер: “Модарам ҳамеша ин суханҳоро такрор мекард: “Писарам, ту шахси бузург мешавӣ ва ту ба ҳама кор қодир ҳастӣ”. Ман ба ӯ бовар мекардам”.
Воқеаи фараҳбахш
Муваффақият ба осонӣ ба даст наомад. Крис баъди хатми мактаби миёна 4 сол дар сафи Қувваҳои ҳарбӣ-ҳавоии ИМА хизмат намуд. Соли 1974 ӯ ба Сан-Франсиско кӯчида, чанд муддат ба фурӯши доруворӣ машғул буд. Рӯзе дар назди ӯ мошини гаронбаҳое таваққуф намуд ва Крис аз соҳиби он суол кард, ки чӣ гуна барои рӯзгузаронӣ маблағ пайдо мекунад? Он мард Боб Бриджес, тоҷири муваффақе буд, ки шиносоӣ бо ӯ дар ҳаёти Крис тағйироти куллиро ба миён овард. Маҳз бо тавсияи он тоҷир ӯро дар ширкати DWR ба ҳайси коромӯз ба кор қабул карданд.
Қадр кардани ҳаёт
Соли 2012, баъди 6 соли ба намоиш гузошта шудани филм доир ба зиндагиномаи Гарднер ҳаёти ӯ боз куллан тағйир ёфт: ҳамсараш дар синни 55-солагӣ бар асари бемории саратон фавтид. Ин барояш талафоти бузурге буд ва ӯ тасмим гирифт, ки мавқеи худро дигар месозад. Ӯ дигар на сармоядори муваффақ, балки як адиб, як нависандаест, ки дар як сол зиёда аз 200 рӯзи худро ба сайру саёҳати дунё бахшида, дар бештар аз 50 кишвари олам дар назди шунавандаҳои сершумор баромад мекунад.
Гарднер мегӯяд, таҷриба он ақидаро рад мекунад, ки гӯё одамон парварда ва тарбиятёфтаи он муҳите мебошанд, ки он ҷо ба воя расидаанд. “Агар чунин мебуд, ман имрӯз бояд як фарди бесаводу беҷуръат, нокому майзадае мебудам”, - мегӯяд ӯ. Аммо Гарднер муътакид бар он аст, ки интихобаш дуруст аст ва омили асосии муваффақ шуданашро муҳаббати модар ва дастгирии дӯстонаш меҳисобад.
Шаҳло Эшонова
Вақте Крис Гарднер ҳамроҳи писари хурдсолаш дар рӯи фарши ҳоҷатхонаи ҷамъиятӣ мехобид, ҳаргиз тасаввур карда наметавонист, ки чунин шеваи рӯзгори ӯ замоне мавзӯи асосии филми машҳури Ҳолливуд мегардад.
Дар ҷустуҷӯи хушбахтӣ
Дар оғози солҳои 80-уми асри гузашта Гарднери 27-сола ҳамроҳи писари худ, ки ҳанӯз сесола нашуда буд, муддати се сол бе хонаву дар ва бе сарпаноҳ, бе макони зисти доимӣ дар кӯчаҳои Сан-Франсиско, Калифорния сарсону овора мегашт. Гарднер дар ширкате ба ҳайси коромӯз кор карда, музди ночизе мегирифт, ки барои ҳуҷраеро ба иҷора гирифтан низ кифоят намекард.
Баъди муноқишаҳои оилавӣ завҷааш ӯро тарк карду ӯ ҳамроҳи писарчаи хурдсолаш танҳо монд ва ҳар ҷо ки рост меомад, шабро рӯз мекард. Ӯро ғайр аз ҳоҷатхона гоҳ дар истгоҳи роҳи оҳан медиданду гоҳ дар боғи истироҳатӣ ва гоҳе дар калисову гоҳе дар таги мизи кории сардораш. Ҳамкорон баъзан аз сари раҳму шафқат ба ӯву писараш кӯмак мекарданд, аммо он ба пуррагӣ барои боғчаи бачаҳо ва дигар эҳтиёҷоти писараш масраф мегардид. Новобаста аз ин ҳама мушкилот, корҳои Крис дар ҷои кор бомуваффақият ҷараён доштанд. Ӯ дар фурӯши саҳмияҳо ва облигатсияҳо қобилият ва маҳорати хубу нотакрор нишон медод. Ин буд, ки баъди коромӯзӣ ӯро дар ширкати Dean Witter Reynolds (DWR ) ба таври доимӣ ба кор қабул намуданд. Ва оқибат Крис хонаеро ба иҷора гирифту мартабааш зина ба зина боло мерафт. Соли 1987 Крис Гарднер ширкати маблағгузории хусусии худро бо номи Gardner Rich таъсис дод.
Ҳолливуд
Имрӯз моликияти Гарднери 62-сола зиёда аз 60 миллион долларро ташкил медиҳад. Ӯ дар аксар кишварҳои олам ташкилотҳои зиёди хайрия дораду ба ашхоси бехонумон ва бесарпаноҳ кӯмак мерасонад. Китоби ӯ бо унвони “Дар ҷустуҷӯи хушбахтӣ” дар як муддати кӯтоҳ ҳамчун намунаи осори гаронарзиш маълуму машҳур гардид. Вақте ҳолномаи ӯ дар бораи мушкилоти рӯзгори гузашта, даврони коромӯзӣ дар DWR ба доираи васеи хонандагон муаррифӣ гардид, корманди масъули Ҳолливуд ба ӯ таклиф намуд, то аз рӯи асараш филм офаранд.
Соли 2006 филме бо чунин ном ба навор гирифта шуд. Уилл Смит, ки нақши Крис Гарднерро мебозид, барои иҷрои беҳтарин нақши мардона соҳиби ҷоизаи “Оскар” гардид. “Намехоҳам чизеро тағйир бидиҳам, - мегӯяд Крис. - Дар кӯдакӣ ман хеле азоб кашидам ва ин ба хотири он буд, ки фарзандони ман азоб накашанд. Вақте панҷсола будам, аҳд карда будам, ки фарзандони ман бояд аз гузаштаи ман ба хубӣ огоҳ бошанд”.
Модар – манбаи илҳом
Крис дар шаҳри Милуоки, Висконсин ба дунё омада, падарашро дар ёд надошт. Ӯ ҳамроҳи модар ва падарандараш, ки шахси дағалу майзадае буд, дар муҳити фақру нодорӣ ба воя расид. Як муддат ӯ дар хонаи кӯдакон буд, чунки модарашро барои қасди куштори шавҳар карданаш ба ҳабс гирифтанд. Новобаста аз душвориҳои даврони кӯдакӣ Крис модарашро манбаи илҳоми худ меҳисобад. Аз ёддоштҳои Гарднер: “Модарам ҳамеша ин суханҳоро такрор мекард: “Писарам, ту шахси бузург мешавӣ ва ту ба ҳама кор қодир ҳастӣ”. Ман ба ӯ бовар мекардам”.
Воқеаи фараҳбахш
Муваффақият ба осонӣ ба даст наомад. Крис баъди хатми мактаби миёна 4 сол дар сафи Қувваҳои ҳарбӣ-ҳавоии ИМА хизмат намуд. Соли 1974 ӯ ба Сан-Франсиско кӯчида, чанд муддат ба фурӯши доруворӣ машғул буд. Рӯзе дар назди ӯ мошини гаронбаҳое таваққуф намуд ва Крис аз соҳиби он суол кард, ки чӣ гуна барои рӯзгузаронӣ маблағ пайдо мекунад? Он мард Боб Бриджес, тоҷири муваффақе буд, ки шиносоӣ бо ӯ дар ҳаёти Крис тағйироти куллиро ба миён овард. Маҳз бо тавсияи он тоҷир ӯро дар ширкати DWR ба ҳайси коромӯз ба кор қабул карданд.
Қадр кардани ҳаёт
Соли 2012, баъди 6 соли ба намоиш гузошта шудани филм доир ба зиндагиномаи Гарднер ҳаёти ӯ боз куллан тағйир ёфт: ҳамсараш дар синни 55-солагӣ бар асари бемории саратон фавтид. Ин барояш талафоти бузурге буд ва ӯ тасмим гирифт, ки мавқеи худро дигар месозад. Ӯ дигар на сармоядори муваффақ, балки як адиб, як нависандаест, ки дар як сол зиёда аз 200 рӯзи худро ба сайру саёҳати дунё бахшида, дар бештар аз 50 кишвари олам дар назди шунавандаҳои сершумор баромад мекунад.
Гарднер мегӯяд, таҷриба он ақидаро рад мекунад, ки гӯё одамон парварда ва тарбиятёфтаи он муҳите мебошанд, ки он ҷо ба воя расидаанд. “Агар чунин мебуд, ман имрӯз бояд як фарди бесаводу беҷуръат, нокому майзадае мебудам”, - мегӯяд ӯ. Аммо Гарднер муътакид бар он аст, ки интихобаш дуруст аст ва омили асосии муваффақ шуданашро муҳаббати модар ва дастгирии дӯстонаш меҳисобад.
Шаҳло Эшонова
Хабарҳои дигар
Рӯзнома
Эзоҳи худро нависед