Дар доираи силсилачорабиниҳо бахшида ба “Соли ҷавонон” ва Рӯзи ҷавонон – 23 май раиси ноҳияи Шоҳмансур Низом Ҳакимзода ва сардори Раёсати ҷавонон, варзиш ва сайёҳии шаҳри Душанбе Иброҳим Мирзоев бо ҷавонон ва фаъолони ноҳияи Шоҳмансур мулоқот анҷом доданд.

Низом Ҳакимзода, раиси ноҳияи Шоҳмансур, ҳозиринро бо “Соли ҷавонон” ва Рӯзи ҷавонони Тоҷикистон табрик намуда иброз дошт, ки “Дар Пайёми имсола Пешвои миллат, муҳтарам Эмомалӣ Раҳмон таъкид карда буданд, ки “Мо бо ҷавонони созандаи худ ифтихор менамоем, чунки ҷавонони даврони соҳибистиқлоли ватанамон имрӯз бо нангу номуси миллӣ ва бо эҳсоси баланди ватнадорӣ дар рушди Тоҷикистони азиз саҳми арзанда мегузоранд ва ба Ватан - Модар содиқона хизмат менамоянд”. Бо ҳамин мақсад аз ҷониби роҳбари муаззами кишвар соли 2017 “Соли ҷавонон” эълон гардид. Боиси хурсандист, ки имрӯз беш аз 57 ҷавони ноҳияи Шоҳмансур дар макотиби олии байналмилалӣ таҳсил намудаистодаанд ва варзишгарони ноҳия дар тамоми мусобиқаҳои ватанию ҷаҳонӣ ширкат намуда, Парчами кишвари азизамонро баланд мебардоранд.
Имсол дар маъракаи даъвати ҷавонон ба хизмати ҳарбӣ 50 фисад ҷавонони ноҳия бо хоҳиши худ ва бо дуои падару модарон ба хизмати ҳарбӣ рафтанд. Аз байни 154 даъватшуда 22 нафарашон хатмкардаҳои донишкадаҳои олӣ мебошанд. Ин як нишонаи ватандӯстии ҷавонон мебошад. Мо, албатта, бо дастовардҳои ҷавонони кишвари соҳибистиқлоламон ифтихор менамоем”.

Дар чор моҳи соли ҷорӣ аз тарафи Бахши ҷавонон, варзиш ва сайёҳии ноҳияи мазкур озмуни “Меҳрномаи Душанбе”, “Рассоми беҳтарин таҳти унвони “Тоҷикистон - кишвари афсункор”, “Ровии ҷавон” байни донишҷӯёни коллеҷу литсейҳо ва муассисаҳои таҳсилоти миёнаи умумӣ баргузор гардид.
Раиси ноҳия дар ҷамъбасти чорабинӣ ғолибони озмун ва фаъолони ноҳияро бо ифтихорномаву туҳфаҳои хотиравӣ қадрдонӣ намуд.

Шаҳбози АСОМИДДИН, “ҶТ”