Чи гунае, ки аз расонаҳо ва воқеиятҳои рӯз бармеояд, солҳои охир шаҳри Душанбе ба як қатор дастовардҳо ноил гардидааст. Бахусус, ҷавонони шаҳр фаъолияти хуб нишон дода, кишвари моро аз пештара дида дар арсаи байналмилалӣ муаррифӣ намуданд. Вобаста ба дастовардҳои ҷавонон ва дигар паҳлуҳои ҳаёти онҳо дар чанд соли охир суҳбате доштем бо Шоҳзод Раҳимзода, сардори Раёсати кор бо ҷавонон ва варзиши шаҳри Душанбе, ки фишурдаашро пешкаши хонанда мегардонем.

- Соли сипаригардида барои ҷавонону варзишгарони шаҳри Душанбе чӣ гуна сол буд ва онро бо кадом дастовардҳо ҷамъбаст намудед?

- Дар асл соли сипаришуда барои ҷавонону варзишгарон соли хотирмон буд. Имсол низ чун солҳои қаблӣ ҷавонону варзишгарони пойтахт бо таваҷҷуҳи ҳамешагии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва раиси шаҳри Душанбе муҳтарам Рустами Эмомалӣ ба якчанд дастовардҳо ноил гардиданд. Имрӯзҳо ҷавонону варзишгарон дар озмуну олимпиадаҳои сатҳи байналмилалӣ иштирок намуда, сазовори ҷойҳои намоён гашта истодаанд. Мисоли он дастовардҳои варзишии варзишгарони шаҳри Душанбе аз чемпионат ва мусобиқаҳои ҷумҳуриявӣ ва осиёиву байналмилалӣ шуда метавонад, ки дар як соли охир шумораи онҳо ба 9000 медал мерасад.

- Дар пойтахти кишвар ҷиҳати рушди соҳаи варзиш ҳамеша таваҷҷуҳи махсус равона карда мешавад. Мегуфтед, ки айни ҳол дар шаҳр чӣ қадар муассисаҳои варзишӣ мавҷуданд ва дар онҳо чӣ миқдор ҷавонону наврасон ба машқу тамрин машғуланд?

- Дар пойтахти кишвар ҷиҳати рушди соҳаи варзиш аз ҷониби Мақомоти иҷроияи ҳокимияти давлатии шаҳри Душанбе ва бахусус раиси шаҳр муҳтарам Рустами Эмомалӣ ҳамеша таваҷҷуҳи махсус зоҳир мегардад. Айни ҳол дар шаҳри Душанбе 10 муассисаи давлатии мактабҳои махсуси варзишии захираҳои олимпӣ аз рӯйи 23 намуди варзиш фаъолият намуда, дар онҳо 189 нафар мураббӣ дар 324 гурӯҳ ба машқварзон тамрин медиҳанд. Шумораи машқварзон дар ин гурӯҳҳо аз миёни наврасону ҷавонон ва варзишгарони касбӣ 4998 нафарро ташкил медиҳад, ки аз ин шумора 3181 нафараш ҷавонону наврасонанд.

- Бо мақсади солимгардонӣ ва ба тарзи ҳаёти солим ҷалб намудани ҷавонону наврасон дар пойтахт соли гузашта чанд адад майдончаҳои варзишӣ сохта ба истифода дода шуданд ва имсол сохт-мони чанд адади дигар дар назар аст?

- Бо мақсади солимгардонӣ ва ҷалб намудани ҷавонону нав-расон ба варзиш аз соли 2017 то имрӯз дар пойтахти кишвар 262 майдончаи варзишӣ бо дарназардошти майдончаҳои бозии кӯдакона ва нишасти калонсолон сохта ба истифода дода шудааст. Аз ин шумора дар соли 2021 5 майдончаи варзишӣ бо тарҳи миллӣ ва ҷавобгӯ бо талаботи стандартӣ мавриди баҳрабардорӣ қарор гирифтанд. Дар соли ҷорӣ бошад, сохтмони 4 адад майдончаҳои варзишӣ дар назар аст.

- Президенти кишвар дар Паёми хеш ба Маҷлиси Олӣ доир ба зарари телефонҳои мобилӣ ба саломатии наврасон ибрози назар намуда, таъкид карданд, ки дар ин самт назорат бояд ҷиддӣ шавад. Вобаста ба ин масъала аз ҷониби роҳбарияти шаҳр ва Раёсати кор бо ҷавонон ва варзиш чӣ тадбирҳо андешида шуд ва гузаронидани кадом чорабиниҳо дар назар аст?

- Вабаста ба ҳалли ин масъала бо қарори дахлдори раиси шаҳри Душанбе гурӯҳҳои корӣ зери роҳбарии муовинони раиси шаҳр ташкил шудааст. Тибқи ин қарори дахлдор дар ноҳияҳои шаҳр бо фаъолону аҳли ҷамоатчигӣ ва наврасону ҷавонон мулоқоту вохӯриҳо дар назар гирифта шудааст. Аз ҷониби Раёсати кор бо ҷавонон ва варзиши шаҳри Душанбе як қатор нақшаи чорабиниҳои муштарак бо мақомотҳои дахлдори шаҳр таҳия гардида, дар баробари дигар масъалаҳое, ки дар Паём баррасӣ гардиданд, мавриди омӯзиш қарор дорад. Аз ҷониби раёсат бештар бо волидони наврасону ҷавонон вохӯриҳо баргузор мегардад, ки дар ҷараёни ин вохӯриҳо ҷиҳатҳои манфии истифодаи шабакаҳои иҷтимоӣ ва зарари телефонҳои мобилӣ гуфта мешавад.

- Дар пойтахти кишвар ҳар сол чорабиниҳои гунонуни варзишии сатҳи ҷаҳонӣ гузаронида мешавад. Имсол дар шаҳр доир намудани кадом мусобиқаҳои варзишии сатҳи ҷаҳонӣ дар назар дошта шудааст ва оё ягон мусобиқаи варзишие дар нақша ҳаст, ки бори аввал баргузор карда шавад?

- Соли дуюм аст, ки бо дастгирии раиси шаҳри Душанбе муҳтарам Рустами Эмомалӣ барои рушди соҳаи варзиш ва тарғибу ташвиқи намудҳои миллии варзиш дар арсаи байналмилалӣ тадбирҳои зарурӣ руйи кор омаданд. Дар панҷ соли охир мусобиқаҳои зиёди сатҳи байналмилалӣ дар пойтахт баргузор гардиданд. Соли гузашта дар шаҳри Душанбе 3 мусобиқаи байналмилалии гӯштини миллии “Гӯштингирӣ” бахшида ба ҷашни Наврӯз, Ваҳдати миллӣ ва 30- солагии Истиқлолияти давлатӣ бо иштироки беш аз 20 давлати дунё баргузор гардид. Ҳамчунин Форуми шаҳрии варзишгарони пойтахт, Фестивали дӯстии афсарону сарбозони шаҳри Душанбе, Фестивали дӯстии ҷавонону варзишгарони пойтахт ва амсоли инҳо гузаронида шуд.

Дар назар аст, ки дар соли 2022 бахшида ба ҷашни Наврӯз дар шоҳроҳи Душанбе – Рӯдакӣ - Хуросон, Бохтар - Душанбе ва ҳамзамон дар дохили роҳҳои шаҳри Душанбе чемпионати Осиё оид ба велосипедронӣ бо иштироки 40 давлати дунё баргузор гардад. Аллакай барои баргузор гардидани ин чорабинӣ роҳбариятӣ шаҳри Душанбе дар якҷоягӣ бо Кумитаи кор бо ҷавонон ва варзиш, Кумитаи миллии олимпӣ ва Федератсияи велосипедронии Тоҷикистон тадбирҳои мушаххас андешида истодаанд.

- Асоситарин мушкилоти ҷавонони пойтахт аз нигоҳи шумо кадом аст?

- Фикр мекунам, ки ҷавонони имрӯза агар худ талош кунанд, мушкил надоранд. Он шароит ва имконоте, ки имрӯз барои ҷавонон муҳайё шудааст, бо истифодаи дурусти вақт ва талошмандӣ ҳар ҷавон метавонад, муваффақ шавад. Ягона мушкилиро ман дар худи ҷавонон мебинам, ки баъзан ҳолатҳо даст ба ҷинояту ҷинояткорӣ мезананду барои ояндаи хеш талош намекунанд.

- Ҷавононро фардои дурахшони меҳан мегӯянд. Дар шаҳр ҷиҳати рушди неруи зеҳниву ҷисмонии онҳо чӣ тадбирҳо рӯйи даст гирифта шудааст?

- Ба хотири саводнок гардонидани ҷавонону наврасон дар шаҳр аз ҷониби мақомоти дахлдор чораҳои муҳим рӯи кор меоянд. Ба хотири огоҳ будани падару модар аз таълиму тарбияи фарзандон дар муассисаҳои таҳсилоти миёнаи умумии дохили шаҳр барноми “E-DONISH” роҳандозӣ шудааст. Ин тадбир барои боз ҳам беҳтар гардидани неруи зеҳнии наврасон андешида шудааст. Инчунин аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон якчанд маҳфилҳои илмию амалӣ баргузор мегардад.

- Ҷиҳати пешгирии ҷавонон аз роҳҳои нодуруст ва коҳиши ҷинояткорӣ миёни онҳо дар шаҳр чӣ гуна чорабиниҳо гузаронида мешавад?

- Тибқи нақша - чоробиниҳо Кумитаи кор бо ҷавонон ва варзиш дар якҷоягӣ бо мақомоти ҳифзи ҳуқуқ ва сохторҳои иҷтимоӣ дар шаҳри Душанбе дар соли 2021, 339 чорабинӣ бо фарогири 68 ҳазору 147 нафар доир кард, ки нисбат ба соли 2020 152 чорабинӣ зиёд мебошад. Дар чорабиниҳо аксаран ҷавонон ба варзиш, китобхонӣ ва забондонӣ ҷалб карда мешаванд.

- Роҳбарияти шаҳри Душанбе ва Раёсати кор бо ҷавонон ва варзиши шаҳр дар оянда барои ҳалли мушкилоти ҷавонону варзишгарони шаҳр ва ба корҳои ободонию созандагӣ ҷалб намудани онҳо чӣ нақшаҳо доранд?

- Ҳар тадбире, ки имрӯз аз ҷониби Ҳукумати кишвар роҳандозӣ мегардад, маҳз ба хотири ояндаи хуби ҷавонону наврасон мебошад. Чун ба ҳамагон маълум аст, ки Президенти кишвар муҳтарам Эмомалӣ Раҳмон ба ҷавонони кишвар таваҷҷуҳи махсус зоҳир мекунанд, то дар оянда номбардори кишвар ва миллати тоҷик бошанд. Ҳар як ҷавоне, ки имрӯз худшиносу худогоҳ ва ватандӯст аст, худро пайрави Пешвои муаззами миллат меномад.

Барои боз ҳам беҳтар кардани шароити ҷавонону варзишгарон аз ҷониби роҳбариятӣ шаҳри Душанбе дар ҳамбастагӣ бо Раёсати кор бо ҷавонон ва варзиши шаҳр барои ҷавонон ва варзишгарон тамоми тадбирҳоро роҳандозӣ намуда, барои иштироки варзишгарон дар мусобиқаҳои байналмилалӣ чораҳои зарурӣ андешида мешаванд.