ҶАВОНОН
Душанбе 18 Декабр 2017 05:56
3562

Синамои Ҳиндустонро бе ин марди хушандому ситорагарм, ки рафтору гуфтори ашрофона дорад, тасаввур кардан имконнопазир аст. Амитабҳ Баччан - ин ҳунарманди нотакрори Болливуд мисли шароби аълосифат бо гузашти солҳо боз ҳам боарзиштар мешавад.

Амитабҳ Баччан аз сарватмандтарин ва шинохтатарин ҳунармандони Болливуд маҳсуб ёфта, дороияш зиёда аз 400 миллион долларро ташкил медиҳад. Аммо ин ҳама шуҳрату дороӣ ва нуфуз барояш ба осонӣ муяссар нагардидааст. Нахуст симои зоҳирии ӯ барои филмсозон чандон мароқовар набуд, вале садояш таваҷҷуҳи онҳоро ҷалб менамуд. Ин буд, ки як муддат дар филмҳо танҳо аз овозаш истифода мекарданд.

ПАҲЛАВОНИ БЕБОК ВА ҶАНГОВАРИ ШУҶОЪ

Амитабҳ Ҳариванш Шривастав Баччан бо ҳунару маҳорати нотакрор, симои ҷаззобу лаҳну садои дилангези худ дар санъати синамои Ҳиндустон афсонаи зинда мебошад. Ӯ аз рӯзҳои аввали рӯи саҳнаи ҳунар омадан нақшҳои ба зоҳиру ботини худ мувофиқро бозида, дар дилу дидаи мухлисон барои ҳамеша маскан гирифт. Хосса нақши баҳодури бебоку ва паҳлавони шуҷоъро, ки муттакои мардуми одӣ аст, чандон самимӣ бозидааст, ки ҷавонон дар сар то сари мамлакат ва берун аз он ба тарзи либоспӯшиву роҳгардӣ, ба сухан гуфтану ҳаракатҳои чолоконааш тақлид мекунанд.

АЙЁМИ  НАВРАСӢ ВА ҶАВОНӢ

Амитабҳ Баччан 11 октябри соли 1942 дар шаҳри Оллоҳободи Ҳиндустон дар оилаи зиёӣ ба дунё омадааст. Падараш Хариванш Рай Баччан, шоир ва профессор, модараш Тейҷи Сури, аз хонаводаи ашрофзодагони бонуфуз буд. Онҳо барои таълиму тарбияи фарзанд чизеро дареғ намедоштанд. Он ҳама салобату шаҳомат ва шеваи рафтору кирдори ашрофзодаҳоро Амитабҳ аз модар ба мерос гирифтааст. Маҳз модар ба Амитабҳ сифатҳои мустақилияту нерӯмандӣ ва мушкилнописандиро омӯхтааст, чунки ба ақидаи модар фарзанди чунин оилаи бомаърифат бояд ҳатман аз хислатҳои мазкур бархӯрдор ва маълумотноку соҳибкасб бошад. Амитабҳ баъди хатми коллеҷ ба ҷустуҷӯи кор баромад, аммо кораш чандон барор нагирифт. Ба ҳар ҷое, ки муроҷиат мекард, ҷавоби рад мегирифт. Зеро ӯ ҷавони мулоимтабиату шармгине буд, ҳини суҳбат бо корфармоҳо худро гум кардаву озод сухан гуфта наметавонист. Рӯзе дар Калкутта баъди тамошои филме ӯ дарк намуд, ки хоҳиши зиёди ҳунарманди синамо шудан дорад.

СИНАМО ВА 244 АДАД НАҚШ

Ӯ ба Бомбей омада, дари ширкатҳои синаморо охурча намуд. Вале дар ҳама ҷо бо ҳар баҳона – яке бо баҳонаи лоғарӣ, дигаре бо баҳонаи гандумгун будани пӯсташ, ба ӯ ҷавоби рад медоданд. Нақши нахустинаш бо кӯмаки Индира Ганди рӯи саҳна омад. Гарчанде филм даромади кофӣ наоварда бошад ҳам, вале Амитабҳи ҷавонро ҳамчун “Беҳтарин ҳунарманди ҷавон” ба ҳамагон муаррифӣ намуд.

Филмҳое, ки ӯ нақш меофарид, ба туфайли ҷаззобияти мардонаи Амитабҳ шуҳрат пайдо намуданд. Мардум бо шавқи зиёд нақшҳои нав ба нави ӯро интизорӣ мекашиданд. Сурудҳои Амитабҳ Баччанро, ки дар филмҳо садо медоданд, тамоми сокинони Ҳиндустон азёд медонистанд. Ӯ нақшҳои худро чунон самимиву заминӣ мебозид, ки бинанда мафтуни ӯ гашта, ҳамроҳи қаҳрамони худ хурсандӣ мекарду ҳамроҳаш ғусса мехӯрд.

Боре ҳангоми наворгирии филми “Кули” Амитабҳ ҷароҳати ҷиддӣ бардошт ва он рӯзҳо тамоми мардуми Ҳиндустон ғусса мехӯрданду барои шифоёбии ҳунарманди дӯстдоштаашон дуо мекарданд. Нақшҳои офаридаи ӯ имрӯз зиёда аз 244 ададро ташкил медиҳанд. Соли 2016 бо иштироки Баччан ва Ҷони Депп филми ҷадиде бо номи “Шантарам” рӯи навор омад.

ТО ОХИРИН НАФАС БО СИНАМО ХОҲАМ БУД

Амитабҳ ба суоли рӯноманигорон дар хусуси он ки то кадом муддат нақшофарӣ хоҳад кард, посух дода буд, ки то нафаси охирин аз синамо дур будан намехоҳад. Ва агар дар нақшҳои асосӣ ҳам набошад, омода аст, ки дар нақшҳои дуюму сеюмдараҷа ва лаҳзавӣ бошад. Муҳим он аст, ки рӯи саҳна бошад, чунки зиндагиашро бе он тасаввур карда наметавонад.

 СИТОРАИ №1

Амитабҳ Баччан, ин ситораи №1-и Болливуд, ба қавли ҳамсараш Ҷай дар оила падар ва ҳамсари меҳрубон аст. Онҳо соҳиби як духтар – Швета ва як писар – Абхишек мебошанд. Писараш бо пайроҳаи падар рафта, имрӯз аз бонуфузтарин ва маъруфтарин ҳунармандони Болливуд аст. Соли 2011 Абхишек бо Айшвария Рай издивоҷ намуд. Швета бошад, ҳамсари Никҳила Нанди - набераи ҳунарманди машҳури Ҳиндустон Раҷ Капур мебошад.

Ҷай Бҳадури зани содиқу вафодорест, ки дар ҳама шебу фароз ва шикасту рехти зиндагӣ ҳамроҳ ва ҳамнафаси ҳамсар буд ва ҳаст. Замоне касе бовар намекард, ки чунин одамони мухталиф бо ҳам издивоҷ мекунанд. Ҷей зани ҳалиму меҳрубонест, ки ҳама гуноҳу хатои шавҳарро мебахшад.

ҲАМАРӮЗА ХУДРО ТАКМИЛ БОЯД ДОД

Як муддати муайян ворид шудан ба саҳнаи сиёсат барои Амитабҳ дарси ҳаёт гардид. Ӯ бо Раҷив Ганди робитаи қавии дӯстӣ дошт ва маҳз куштори Индира Ганди ӯро ба саҳнаи сиёсат овард. Бо ин амали худ ӯ хост садоқату ихлоси худро нисбати дӯсташ зоҳир намояд. “Сиёсат қобилияту маҳорати хоссаро тақозо менамояд” – гуфта буд ӯ дар яке аз суҳбатҳояш. - Ҳар як монеаву душворӣ шахсро қавитару эътимодноктар мегардонад. Барои муваффақ шудан шахсро мебояд, ки ҳамарӯза худро такмил диҳад. Ҳаргиз аз санҷишҳо набояд ҳаросид ва дар зиндагӣ ҳама чизи навро бояд боре санҷид”.

Эзоҳи худро нависед



Рамзҳо дар расм

соли ҷавононн

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Декабр 2017 c.