Раёсати вазорати корҳои дохилӣ дар вилоят Хатлон ва ШКД-и шаҳри Сарбанд чанде пеш дар Ҷамоати деҳоти “Гулистон”-и шаҳр бахшида ба “Соли ҷавонон” бо сокинону ҷавонони ҷамоат барои пешгирии ҷавонон аз шомилшавӣ ба ҳар гуна ҳизбу ҳаракатҳои номатлуб вохӯрӣ доир намуданд.

Алӣ Азизов, намояндаи Раёсати вазорати корҳои дохилӣ дар вилоят иброз дошт, ки ба ин кори нангин аслан онҳое даст мезананд, ки мафкураи хеле маҳдуд ва сатҳи ҷаҳонбинии паст доранд ва ин боиси амалӣ намудани ҳадафҳои ғаразноки манфиатхоҳон гардида, ҳамаи моро водор месозад, ки барои решакан намудани он дар якҷоягӣ талош намоем.

Дар ин вохӯрӣ сардори ШВКД-и шаҳри Сарбанд Нодирхон Муродов ва намояндагони мақомати иҷроияи ҳокимияти давлатии шаҳр иштирок ва суханронӣ карданд.

Сокинони ҷамоат ба масъулин пешниҳод намуданд, ки барои пешгирии шомилшавии ҷавонон ба ин зуҳуроти номатлуб, пеш аз ҳама, бунёди толорҳои варзишӣ ва курсҳои кӯтоҳмуддати касбомӯзӣ ташкил карда шаванд, то ин ки ҷавонон бе машғулият намонанд.

Умед Мирзоев, “ҶТ”