Дар доираи силсиламулоқотҳои Кумитаи кор бо ҷавонон ва варзиши назди Ҳукумати ҷумҳурӣ бахшида ба “Соли ҷавонон” дар қисмҳои ҳарбии шаҳри Душанбе, 4 август мулоқоти навбатӣ дар қисми ҳарбии 051057 Гвардияи милли Тоҷикистон баргузор гардид.

Амир Иброҳимов, мутахассиси пешбари Раёсати кор бо ҷавонони Кутимаи кор бо ҷавонон ва варзиш, зимни баромади хеш роҷеъ ба фаъолият ва саҳми ҷавонон дар рушди кишвар суханронӣ намуда афзуд, ки “Имрӯз мову шумо муваззаф ҳастем, ки ба хотири таҳкими Истиқлолият, Ваҳдати миллӣ ва, пеш аз ҳама, ҳимояи сарзамини аҷдодиямон Тоҷикистон масъулияти дучанд дошта бошем. Имсол, ки “Соли ҷавонон” аст, бояд ҳар ҷавон соли мазкурро бо навоварию дастовардҳо сипарӣ намояду дар рушди кишвар саҳмгузор бошад”.

Ҳамчунин, дар ҷараёни мулоқот доир ба масъалаҳои фарҳанги миллӣ, танзими анъана ва ҷашну маросимҳои миллӣ ва гаравидани баъзе аз ҷавонон ба гурӯҳҳои ифротӣ ибрози назар карда шуд.

Ёдовар мешавем, ки Кумитаи кор бо ҷавонон ва варзиши назди Ҳукумати кишвар дар доираи “Соли ҷавонон” ва иҷроиши босифати нақшачорабиниҳои муштарак барои ошноӣ пайдо намудан бо ҳаёти сарбозон силсилаи мулоқоту вохӯриҳоро вобаста ба баланд бардоштани ҳисси ватандӯстӣ, худшиносиву худогоҳӣ, нигаҳдошт ва ҳифзи марзу буми кишвар давоми моҳҳои июл, август ва сентябри соли ҷорӣ дар тамоми қисмҳои ҳарбии шаҳри Душанбе ба роҳ мондааст.

 Беҳрӯз ХОЛМУРОДОВ, “ҶТ”