Имрӯз ҷавонон ҳамчун қишри фаъоли ҷомеа дар пешрафту шукуфоии ин меҳан саҳми арзанда гузошта истодаанд. Ҳамин гуна фаъолнокии ҷавонон буд, ки аз ҷониби Пешвои муаззами миллат, муҳтарам Эмомалӣ Раҳмон соли 2017 дар Ҷумҳурии Тоҷикистон “Соли ҷавонон” эълон гардид.

Акнун аз ин соли таърихӣ танҳо чанд ҳафтаи дигар боқӣ мондааст. Аз ин рӯ, аҳли эҷоди рӯзнома тасмим гирифтаанд, ки тавассути як савол: “Соли ҷавонон” ба Шумо чӣ дод?”, силсилаи назару таассуроти ҷавононро аз ин сол ба нашр расонанд.

Мансур САФАРЗОДА, раиси Ҳайати ҷавонони Агентии “Тоҷикстандарт”:

- Соли 2017 соли таърихӣ ва масъулиятшиносӣ буд. Эълон гардидани соли равон ҳамчун “Соли ҷавонон” мо – ҷавононро ҳушдор дод, ки барои иҷрои муқаддастарин ва пуршарафтарин рисолати худ – рисолати соҳибватанӣ омода бошем. Дар ин замина Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон чунин таъкид намудаанд: “Танҳо ҷавонони соҳибмаърифату боистеъдод, бонангу номус ва дорои ҷаҳонбинии муосир метавонанд ҳамчун ворисони сазовори таъриху фарҳанги миллӣ рисолати ватансозиро ба дӯш гирифта, қарзи фарзандии худро дар назди Ватан сарбаландона иҷро намоянд”.

Пурра равона намудани тамоми фаъолияти низоми давлатдорӣ дар давоми як сол барои насли ҷавон ва боз ҳам боло бардоштани мақоми насли ояндасози миллат дар ҷомеа, ҳамзамон фароҳам овардани заминаи мусоид ва муосири ҳуқуқӣ барои ҷавонон рамзи ғамхориҳои пайвастаи давлату Ҳукумат ба ин қишри ояндасози ҷомеа буд.

Мухбира МАМАДҶОНОВА, соҳибкор аз шаҳри Хуҷанд:

- Ман бо боварии комил гуфта метавонам, ки насли ҷавони Тоҷикистони соҳибистиқлол аз хушбахттарин наслҳо маҳсуб меёбанд. Зеро барои ҷавонони даврони истиқлол тамоми шароитҳои лозима фаровон буда, дарвозаи имкониятҳои зиёд ба рӯи эшон боз аст. Тавассути дастгириҳои пайвастаи Ҳукумати кишварамон ҷавонони тоҷик имрӯз дар кишварҳои зиёди олам таҳсил намуда, бо донишу кӯшиши худ парчамбардори миллати куҳанбунёди хеш гаштаанд. Эълон шудани “Соли ҷавонон” рамзи нек буда, боварии ҷавононро ба ояндаи пурсаодат ва пурифтихори Ватани азизамон дучанд мегардонад. Ҷавонони тоҷик дар кулли самтҳои хоҷагии халқ, аз ҷумла ҳаёти сиёсию иқтисодӣ, иҷтимоию фарҳангӣ саҳми босазо доранд. Дар бахши соҳибкории хурд ва миёна низ саҳми ҷавонони кишвар қобили таваҷҷуҳ ва таҳсин мебошад.

Эҳсон АБДУЛЛОЗОДА, нозири Маркази матбуоти Дастгоҳи Вазорати корҳои дохилаи Тоҷикистон:

- Дар ҳама давру замон ҷавонон нерӯе мебошанд, ки созандагиро пеш мебаранд ва давлат ба ин қишри ҷомеа ниёз дорад. Бо ташаббуси Президенти маҳбубамон соли 2017 дар қаламрави кишвар “Соли ҷавонон” эълон гардид. Эҳсос мешавад, ки ба ҷавонон ғамхориҳои зиёд зоҳир гашта, чун нишони боварӣ вазифаҳои роҳбарикунанда бар дӯши онҳо гузошта мешаванд. Дар умум, имрӯз тамоми шароит ва имконият барои таҳсилу хониш ва омӯхтани касбу ҳунар барои ҷавонони муҳайё мебошад ва мо фахр аз он дорем, ки дар чунин кишвари ободу соҳибистиқлол зиндагӣ мекунем.

Шаҳноза БОБОХОНОВА, афсари калони Раёсати корҳо ва нашрияҳои Кумитаи ҳолатҳои фавқулодда ва мудофиаи граждании назди Ҳукумати ҷумҳурӣ:

- Дар ҷомеаи имрӯза дар кори пешбурди соҳаҳои мухталифи иқтисоди миллӣ мавқеи ҷавонон хеле муҳим аст, чунки ин қишри ҷомеа дорои афкори тозаю нав, нерӯи муҳими пешбарандаи иқтисодӣ буда, истифодаи васеи технологияи муосирро дар истеҳсолот метавонанд ба хубӣ таъмин созанд. Аз ин лиҳоз, дар Тоҷикистон, ки қисми зиёди аҳолии онро ҷавонон ташкил медиҳанд, Ҳукумати мамлакат ба ин қисми аҳолӣ диққати бештар медиҳад. Муҳтарам Президенти кишвар доимо ба дастгирии ҷавонон ва таъмини онҳо бо ҷои кор, дар асоси истифодаи технологияҳои иттилоотиву коммуникатсионӣ, бо донистани забонҳои хориҷӣ диққати махсус дода, пешниҳодҳои ҷавононро баҳри инкишофи Ватани азизамон пайваста дастгирӣ менамоянд ва бунёди шароити мусоиди кору фаъолиятро барои ҷавонон пайваста таъмин месозанд. Бинобар ҳамин ҳам дар Паёми навбатии Пешвои миллат ба Маҷлиси Олии Ҷумҳурии Тоҷикистон 22 декабри соли 2016 бори дигар таъкид гардид, ки “Ҷавонон бояд аз ҳама қишрҳои ҷомеа бештар фаъол бошанд, ташаббусҳои созанда пешниҳод намоянд, рамзҳои давлатӣ, муқаддасоти миллӣ ва дастовардҳои Истиқлолиятро ҳифз кунанд, дар ҳаёти сиёсиву иҷтимоии Тоҷикистон бо дасту дили гарм ва нерӯи бунёдгарона ширкат варзанд, амнияти давлат ва шарафу номуси ватандориро ҳимоя карда, худро аз ҳама хавфу хатарҳои номатлуби ҷаҳони муосир эмин нигоҳ доранд ва парчамбардори ин сарзамин, марзу бум ва кишвари муқаддасамон бошанд”.

Файзалӣ ҲАМЗАЛИЗОДА, сардори Нозироти андози ноҳияи Ашт:

- Ҳар як ҷавони сарбаланди тоҷик ифтихор дорад, ки Пешвои миллат, Президенти кишвар, муҳтарам муҳтарам Эмомалӣ Раҳмон соли 2017-ро “Соли ҷавонон” эълон намуданд. Ин пешниҳоди арзишманди Пешвои миллат дар ҷомеаи Тоҷикистони навин, хусусан дар байни насли ҷавони мамлакат руҳбаландӣ ба вуҷуд овард ва ҳамчун дурнамои пешбарандаи инкишофи Ватани азизамон аз ҷониби сокинон ва халқу миллатҳои ин хоки муқаддас хеле хуб пазируфта шуд. Хурсандиовар аст, ки имрӯз дар ҷомеаи мо сиёсати хирадмандонаи Президенти кишвар ҳамаҷониба дастгирӣ ёфта, тарбияи ҷавонон ва дастгирии онҳо дар самти ишғол намудани вазифаҳои роҳбарикунанда дар маркази таваҷҷуҳи Ҳукумати ҷумҳурӣ қарор дорад. Ҷавонони мо ба хотири ба боварии Пешвои миллат сазовор шудан доимо исбот мекунанд, ки дар ободонии Тоҷикистони соҳибистиқлол саҳми худро мегузоранд.

Таҳияи Мутриба ТӮЙЧИЗОДА, рӯзноманигор