2 июли соли ҷорӣ мулоқоти сеюми масъулини Кумитаи кор бо ҷавонон ва варзиши назди Ҳукумати кишвар дар қисми ҳарбии 051064-и Гвардияи миллии Тоҷикистон, воқеъ дар ноҳияи Синои пойтахт доир гардид.

Зимни вохӯри корманди Кумита Амир Иброҳимов сарбозону афсаронро бо “Соли ҷавонон” табрик намуда изҳор дошт, ки мо бояд андеша кунем, ки Сарфармондеҳи Олии Қувваҳои Мусаллаҳи кишвар, муҳтарам Эмомалӣ Раҳмон соли 2017-ро ба кадом хотир “Соли ҷавонон” эълон намуданд?

- “Соли ҷавонон”-соли ташаббусҳо, соли ихтироот, соли кашфиёт, соли ҳосил кардани илму дониш, касбу ҳанар ва хизмати софдилонаю содиқона ба марзу бумамон мебошад. Аз мулоқоту суханрониҳои Пешвои миллат инро бояд хулоса намуд, ки имрӯз ба ҳаёти сарбозону афсарон диққати махсус дода мешавад. Аз ин рӯ, месазад, ки баҳри сазовор будан ба боварии Роҳбарияти кишвар, тамоми қувваю тавон, ақлу идрок ва дониши худро баҳри ҳифзи ҳамаҷонибаи Ватан-модар равона созем”, - афзуд номбурда.

Ҳамчунин, дар рафти мулоқот масъулин доир ба ифротгароию бегнонапарастӣ, тарғиби либоси миллӣ, амалишавии Қонуни Ҷумҳурии Тоҷикистон “Дар бораи танзими анъана ва ҷашну маросимҳои миллӣ” ва дигар мавзӯҳои мубрам бо афсарону сарбозон суҳбат намудаанд.

Ёдовар мешавем, ки Кумитаи ҷавонон ва варзиши назди Ҳукумати ҷумҳурӣ дар доираи “Соли ҷавонон” барои ошноӣ пайдо намудан бо ҳаёти сарбозон силсилаи мулоқоту вохӯриҳоро вобаста ба баланд бардоштани ҳисси ватандӯстӣ, худшиносию худогоҳӣ, нигаҳдошт ва ҳифзи марзу буми кишвар давоми моҳҳои июл, август ва сентябри соли ҷорӣ дар тамоми қисмҳои ҳарбии шаҳри Душанбе ба роҳ мондааст.

Хуршед МАВЛОН, “ҶТ”