Дар Паёми Пешвои миллат, муҳтарам Эмомалӣ Раҳмон ба Маҷлиси Олии кишвар соли 2017 “Соли ҷавонон” эълон гардид. Ташаббус гардидани ин иқдоми наҷиб агар аз як тараф ба рукнҳои иҷтимоӣ-демографӣ ва сиёсӣ-стратегӣ рабт дошта бошад, аз тарафи дигар ҷанбаи таърихӣ дорад. Зеро насли ҷавони кишвар ҳанӯз аз рӯзҳои аввали мустақилияти кишвар дар бунёди давлати соҳибистиқлол, демократӣ, ҳуқуқбунёд ва дунявӣ бо ташаккул ва амалӣ намудани самти махсуси фаъолият — сиёсати давлатии ҷавонон давра ба давра ҳамқадами Ҳукумати кишвар буданду ҳастанд. Ба назар чунин расид, ки дар “Соли ҷавонон” ҳисси ватандӯстию меҳанпарастӣ ва созандагии ҷавонон боз ҳам боло рафта, онҳо аз худ чун пайравони асили Пешвои муаззами миллат дарак доданд. Гузашти ин сол бо хусусиятҳои хоси худ дар хотири ҷавонон ҳазорон хотира ва таассуротро ба ёд гузошт. Аз ин рӯ, аз мусоҳибонамон, ки ҳамагӣ ҷавононанд, тавсифи таассуроташонро аз ин соли таърихӣ пурсон гаштем.

Салимзода КАРИМҶОН, роҳбари Клуби волонтёрони Кумитаи кор бо ҷавонон ва варзиши назди Ҳукумати ҷумҳурӣ:

- Боиси сарфарозист, ки бо пешниҳоди Пешвои ҷавонпарвари миллати тоҷик соли 2017 “Соли ҷавонон” эълон гардид.

“Соли ҷавонон” бароям соли музаффариятҳову комёбиҳои беназир буд. Дар ин сол Донишкадаи давлатии забонҳои Тоҷикистон ба номи Сотим Улуғзодаро хатм намуда, дар партави сиёсати ҷавонпарваронаи Асосгузори сулҳу ваҳдати миллӣ – Пешвои миллат, Презииденти Ҷумҳурии Тоҷикистон, муҳтарам Эмомалӣ Раҳмон ба хизмати давлатӣ пардохтам.

“Соли ҷавонон” соли минбари ташаббусҳои созанда, соли музаффариятҳои беназир, дастоварду маҳаки эҷоди ҳар як ҷавони равшанфикр буд. Аз ибтидо то интиҳои ин соли таърихӣ аз меҳри Ватан, эътимоду эътиқод ва ҷонфидоию сарсупурдагии ҷавонон ба ин марзу буми кишвар дарак медод.

Ҳуввияти миллӣ, ҳифзи арзишҳои миллию дастовардҳои замони соҳибистиқлолӣ, арзишҳои маънавию осори пурғановати шахсиятҳои нотакрори миллати тоҷик бо ташкили чорабиниҳои гуногуни маърифатию фарҳангӣ дар “Соли ҷавонон” барои ҳар як ҷавони кишвар намунаи олии ибрат ва сабақи нотакрори ватандорӣ буд.

Фаридаи ДАВЛАТ, донишҷӯи ДДОТ ба номи С. Айнӣ:

- Соле, ки сипарӣ мешавад, дар кулвори хотираҳои мо – ҷавонон бо хати заррин навишта хохад шуд. Зеро имсол аз ҷониби Пешвои миллат, муҳтарам Эмомалӣ Раҳмон “Соли ҷавонон” эълон гардида буд. “Соли ҷавонон” дар баробари таҷлили дигар ҷашнҳои таърихӣ ва дубора эҳёшуда дар сафҳаҳои таърихи Ватани азизамон падидаи наверо ба ёдгор гузошт.

Мо – ҷавонони зодаи Истиқлол, ифтихор аз он менамоем, ки ҳамеша Сарвари давлатамон нисбати мо мароқ зоҳир менамоянд. Бинобар ин, моро лозим меояд, ки ғамхориҳои падаронаи Пешвои миллатамонро бо тамоми ҳастӣ қадр намуда, ҷавобан Истиқлолияти давлатии Ватани маҳбубамонро чун гавҳараки чашм ҳифз намоем, донишу маҳорати хешро сайқал дода, бо дилу нияти пок баҳри ободию гулгулшукуфоӣ ва муаррифии Тоҷикистони азиз дар арсаи ҷаҳон талош варзем, то Ватани азизамон то дурҳои дур, то ҷаҳон боқист, мисли имсола бо ҷавонон ҳамеша ҷавону зебо бимонад.

Муслиҳиддин БУРҲОНЗОДА, мудири шуъбаи кор бо ҷавонони Кумитаи иҷроияи ҲХДТ дар ноҳияи Шоҳмансур:

- Боиси ифтихор ва хушбахтии мост, ки маҳз бо шарофати хизматҳои ин абармард – Пешвои муаззами миллат, муҳтарам Эмомалӣ Раҳмон миллати дар гирдоби обу оташ буда аз хатари парокандашавӣ наҷот ёфт ва тоҷик аз сари нав ҳамчун миллати соҳибтамаддун ба ҷаҳониён муаррифӣ гашт. Ва маҳз барои мо – ҷавонон мояи сарбаландист, ки аз рӯзҳои нахустини соҳибистиқлолии кишвар Президенти мамлакат ба мо таваҷҷуҳу бовар доранд ва дар ҳар як вохӯрию суҳбатҳои хеш бо мардум, алалхусус дар паёмҳои ҳамасолаи хеш ба ҷомеаи кишвар дар бораи ҷавонон ва ҷалби онҳо ба илму дониш, ҳунаромӯзӣ ва корҳои ободонию созандагӣ аҳамияти ҷиддӣ медиҳанд.

Дар вохурӣ бо намояндагони кишвар 21 майи соли 2005 Президенти кишвар таъкид намуда буданд, ки “Шумо – ҷавонон барои тақдири имрӯзу ояндаи давлату миллат, рушду ободии мамлакат, дар арсаи ҷаҳон ва миёни давлатҳои мутамаддини олам мақоми шоиста ёфтани Тоҷикистони азиз масъулияти бузург бар дӯш доред”. Ин таъкидҳо аз ҳар як ҷавон масъулияти баландро дар пешрафти кишвари соҳибистиқлоламон тақозо менамояд. Зеро Президенти кишвар кӯшиш карда истодаанд, ки ҷавонон дар дохил ва хориҷ аз кишвар ба таълим фаро гирифта шаванд ва дар оянда мутахассиси хуб шуда, ба халқу миллати худ содиқона хизмат намоянд. Ҳамин аст, ки дар ҷомеаи имрӯза дар кори пешбурди соҳаҳои мухталифи иқтисоди миллӣ мавқеи ҷавонон хеле муҳим аст, чунки ин қишри ҷомеа дорои афкори тозаю нав, нерӯи муҳими пешбарандаи иқтисод буда, истифодаи васеи технологияи муосирро дар истеҳсолот метавонад ба хубӣ таъмин созад. Мавқеи фаъоли ҷавононро дар рушди Тоҷикистони азиз ба инобат гирифта Пешвои миллат, муҳтарам Эмомалӣ Раҳмон соли 2017- ро “Соли ҷавонон” эълон доштанд. Ҷавонони мо аз ин таваҷҷуҳи Пешвои миллат руҳу тавони тоза гирифта, ба Модар-Ватан хизмати содиқона намудан, марзу буми онро ҳимоя кардан ва дар ҳимояи манфиатҳои давлату миллат ҳушёр буданро қарзи фарзандии худ медонанд. Мо – ҷавонон, бахусус ҷавонони даврони Истиқлолият ифтихор мекунем, ки як давлати соҳибистиқлол ва Сарвари дилсӯзу ғамхор дорем ва дар тӯли солҳои соҳибистиқлолӣ дар кулли соҳаҳо ба пешрафти азим ноил гардидем, хонаамон обод, зиндагиамон осуда шуд. Мо вақте чашм ба олами ҳастӣ кушодем, ки халқи мо ба орзуи деринаи худ – Истиқлолияти давлатӣ расида буд. Аз ин рӯ, кулли мардуми Тоҷикистон, махсусан ҷавонон бояд ба қадри ин неъмати бебаҳо, ба қадри ҳар зарра хок ва ҳар катра обе, ки Яздони пок ба мо ато фармудааст, бирасанд ва Ватани азизамон Тоҷикистонро дӯст доранд. Ҷавонон бояд исбот намоянд, ки дар ҳақиқат ҳам ояндаи миллату давлат дар дасти онҳост.

Руҳафзо ХОЛМАДОВА, донишҷӯ, волонтёри Кумитаи кор бо ҷавонон ва варзиши назди Ҳукумати ҷумҳурӣ:

- Миннатдории самими хешро ба Пешвои муаззами миллат, муҳтарам Эмомалӣ Раҳмон мерасонам, ки як солро дар кишвар ба мо – ҷавонон бахшиданд. “Соли ҷавонон” дар замири ҳар як ҷавон ҳисси худшиносиву худогоҳии миллиро тақвият бахшид. Ҳукумати мамлакат ба ҷавонон таваҷҷуҳи зиёд дорад. Агар ба саҳифаҳои 26 соли таърихи соҳибистиқлолӣ назар кунем, хохем дид, ки ин ҳама пешравиҳо дар натиҷаи меҳнати пурсамари Пешвои муаззами миллат дар такя ба ҷавонон ва дигар табақаҳои ҷомеа ба даст омадааст.

Ҳамчун иштирокчии Паём вақте ки Пешвои муаззами миллат “Соли ҷавонон”-ро эълон намуданд, хурсандии ман ҳадду канор надошт. “Соли ҷавонон” соли пирӯзиҳост. Дар ҳақиқат, бароям бисёр соли хотирмон ва фаромӯшнашаванда буд. Бовар дорам, ки на танҳои барои ман, балки барои тамоми ҷавонони кишвар ин сол хотирмон сипарӣ гашт. “Соли ҷавонон” соли натиҷагирии кору пайкори ҷавонони кишвар дар ҷодаи бунёдкориҳо, ободонии Ватан, кӯмаку ҳамдастии гурӯҳҳо ва табақаҳои мухталифи насли ҷавон буд. Дар ин сол ба бисёр комёбиҳо ноил гаштам ва маҳз ҳамин “Соли ҷавонон” буд, ки бо сарпарастии бевоситаи президенти Федератсияи футболи Тоҷикистон, муҳтарам Рустами Эмомалӣ ва Кумитаи кор бо ҷавонон ва варзиши назди Ҳукумати ҷумҳурӣ дар Фестивали дӯстии ҷавонон ва як қатор сафарҳо ба шаҳру навоҳии кишвар иштирок кардам. Маҳз “Соли ҷавонон” имкон дод, ки соҳиби дӯстони зиёд гаштам.

“Соли ҷавонон” инак ба анҷом мерасад, вале вазифаи ҳар яки мо аз он иборат аст, ки на танҳо соли 2017-ро “Соли ҷавонон” гӯем, балки тамоми умр кӯшиш ба харҷ диҳем ва тарзе кору фаъолият намоем, ки ҳамасола дар кишвари азизамон “Соли ҷавонон” бошад. Аз ин лиҳоз, ман ҳамчун як ҷавон ҷавобан ба ғамхориҳои падарона ва ҷавонпарваронаи Пешвои миллат кӯшиш ба харҷ медиҳам, то ҳамарӯза ҳиссаи худро дар пешрафти Тоҷикистони азизамон гузорам.

Шукрона ҲАКИМОВА, мутахассис оид ба коргузорӣ дар КВД Маркази ҷавонони шаҳри Душанбе:

- Ин солро метавонам бо чанд калима чунин унвон диҳам: “Соли тиллоии умри ман”. Боиси ифтихор ва сарфарозист, ки бо ташаббуси Пешвои муаззами миллат, муҳтарам Эмомалӣ Раҳмон соли 2017 “Соли ҷавонон” эълон гардид ва бори дигар собит шуд, ки Президенти мамлакат воқеан ҳам ба мо – ҷавонон эътмоду таваҷҷуҳи беандоза доранд. Барои мо – кулли ҷавонони кишвар соли имкониятҳо, соли амалӣ гаштани орзуҳо ва соли расидан ба қуллаҳои баландтари мақсуд буд.

Дар “Соли ҷавонон” бо сарпарастии президенти Федератсия футболи Тоҷикистон аз ҷониби Кумитаи кор бо ҷавонон ва варзиши назди Ҳукумати кишвар як қатор чорабиниҳо, аз ҷумла меҳмонии ҷавонони ҷумҳурӣ ба минтақаҳои кишвар баргузор гардид. Ман имконият пайдо кардам, ки ба тамоми минтақаҳои ҷумҳурӣ сафар намуда, аз ҷойҳои таърихиву сайёҳии Ватани маҳбубам дидан намоям. Дар ин сафарҳо бо шумори зиёди ҷавонони дигар минтақаҳои кишвар робитаи дӯстӣ барқарор намудам.

Аксари ҷавонон имконият пайдо карданд, ки дар идораҳои давлатӣ соҳиби ҷои кор гардида, дар пайравӣ аз сиёсати хирадмандонаи Пешвои миллат саҳми арзандаи худро дар пешравии давлат ва татбиқи сиёсати давлатии ҷавонон гузоранд. Аз ҷумла ман низ дар ин сол дар КВД Маркази ҷавонони шаҳри Душанбе ба сифати мутахассис оид ба коргузорӣ ба кор даромадам.

Дар “Соли ҷавонон” бо дастгирии Кумитаи кор бо ҷавонон ва варзиш имконияти ба шаҳри Маскваи Федератсия Русия сафар намудан пайдо гардид. Дар ин сафар ман дар Форуми байналмилалии волонтёри сол, ки муддати 3 рӯз идома намуд, иштирок намуда, дар он ҷо фаолияти волонтёрони ҷумҳуриро муаррифӣ намудам ва хушбахтона, дар байни давлатҳои ИДМ дар марҳилаи финалӣ соҳиби ҷоиза гаштам. Хуллас, ҳар лаҳза, ҳар дақиқа ва ҳар соати “Соли ҷавонон” барои мо ид буд.

Муҳаммади Мусо, донишҷӯи ДДФСТ ба номи М. Турсунзода:

- Асосгузори сулҳу Ваҳдати милли – Пешвои миллат Президенти Ҷумҳурии Тоҷикистон, муҳтарам Эмомалӣ Раҳмон дар ҳамаи баромадҳояш иброз медорад, ки ҷавонон ин ояндаи давлату миллат мебошанд. Ҷавононро дар руҳияи ватандӯстӣ бояд тарбия намуд, чунки ояндаи давлату миллат дар дасти ҷавонон аст. Маҳз ҳамин боварию эътиқоти Ҷаноби Олӣ нисбати ҷавонон буд, ки соли 2017-ро "Соли ҷавонон" эълон намуд.

Халқи тоҷик мудати чандин солҳо орзуи онро мекарданд, ки нафаре пайдо шуда қаҳрамонии Саидмумин Раҳимовро такрор намояд. Хушбахтона орзуи халқи тоҷик баъд аз 37 сол маҳз дар “Соли ҷавонон” амалӣ гардид. Варзишгарони тоҷик Дилшод Назаров ва Беҳрӯз Хоҷазода қаҳрамонии ҷавонпаҳлавон Саидмумин Раҳимовро бори дигар такрор намуда, парчами Ҷумҳурии Тоҷикистонро дар миқиёси ҷаҳон баланд бардоштанд. Инчунин, дар қатори дастоварди варзишгарон боз наврасони тоҷик низ дар соҳаи илму фарҳанг дар ин сол ба дастовардҳои бузург ноил гардиданд. Аз ҷумла наврасони тоҷик дар давлати Русия дар олимпиадаи зеҳни иштирок намуда сазовори ҷойҳои намоён гардиданд.

Ҳукумати кишвар дар сиёсати пешгирифтаи худ ба ҷавонон такя карда, ҷавононро нерӯи созанда ва пешбарандаи ҳаммаи соҳаҳои ҳаётии мамлакат меҳисобанд. Чунки, ободгару муаррифгари миллату давлат ба ҷавонон вобастагии бузӯрг дорад.

Имрӯзҳо аз ҳама таваҷҷуҳи бештар ба ҷавонон нигаронида шудааст. Чун тақдири минбадаи кишвар низ дар дасти ҷавонон аст. Мо – ҷавонон бояд ба ин боварию ғамхории Ҳукумати кишвар сазовор бошем. Аз ҳамаи имкониятҳое, ки дар даст дорем истифода намуда донишу малакаи хешро баланд бардошта дар пешрафти Ватани азизи хеш саҳмгузор бошем. Ва исбот намоем, ки "Соли ҷавонон" унвон гирифтани соли 2017 барои мо – ҷавонони Тоҷикистон зебандаву арзанда буд.

Муҳаммадҷони ФАЙЗИМАД, донишҷӯи ДДФСТ ба номи М.Турсунзода:

- Соли 2017 барои ман аз бисëр ҷиҳат муаваффақиятҳои назаррасро ба бор овард. Аввалан, мактаби миëнаро бо сари баланд хатм карда, тариқи ММТ ба Донишкадаи давлатии фарҳанг ва санъати Тоҷикистон ба номи М.Турсунзода ба таври ройгон дар шуъбаи рӯзноманигори телевизион дохил шудам. Инчунин, натиҷаи ҳамкориҳоям бо рӯзномаи "Ҷавонони Тоҷикистон" буд, ки якчанд мақолаи ҷашниву фарҳангиам дар давоми сол ба чоп расид. Ва метавон гуфт, ки ин худ нахустқадамҳоеанд дар роҳи расидан ба қуллаи мақсуд.

“Соли ҷавонон” аз бисёр ҷиҳат барои кулли ҷавонони кишвар фаромӯшнашаванда боқӣ хоҳад монд. Зеро дар ин сол дар соҳаҳои илму фарҳанг, техникаву технология, варзишу сайëҳӣ ва сиëсат пешравиҳои наву саривақтӣ ба вуҷуд омаданд, ки пешбарандаи асосии онҳо ҷавонон ба ҳисоб мераванд. Пешвои миллат ба мо – ҷавонон имкониятҳои хело бузургеро фароҳам овардааст, то ки нерӯи ояндасози миллат баҳри таҳкими дониш ва натиҷагирӣ кардан аз он тамоми имкониятҳоро дошта бошад.

Агар ба даҳсолае қабл назар андозем, ин гуна имкониятҳо барои ҷавонон қариб ки ба мушоҳида намерасиданд. Хосса, бахшидани соле маҳз барои ин қишри ҷомеа дар гӯшаи хаëли касе ҳам набуд. Ҳамин аст, ки ҳар гоҳе ҳамнишини шахсони солор мешудам такрор ба такрор афсӯс хӯрда, мегуфтанд: "Э-э-э, дар давраи мо аз куҷо ин хел имкониятҳо буд? Ҷавононро дар он вақт эътироф ҳам намекарданд. Гапи мо дар ҳеҷ ҷо қадр надошт. Шумо ҷавонони ҳозира хушбахтед".

Воқеан, мо зодагони замони истиқлолӣ, ҷавонони хушбахтем. Танҳо шоиста ва собитқадам будан, ба худи мо вобастааст. Ҳарчанд, ки “Соли ҷавонон” ба анҷом расид, лек ҳамоно масъулият ба дӯши мо дӯчанд аст. Зеро соли 2017 соли созандаю тақдирсоз ва дар айни замон оғози оғозҳо буд.