Як гурӯҳ ҷавонон шаҳри Душанбе ба лагери омузишӣ-таълимии “Зимчуруд” ба ноҳияи Варзоб сафарбар карда шуданд.

Ҷавонон 19 август дар дар боғи Устод Рӯдакӣ ҷамъ омада, бо шиори “Ҳамқадами замонем” ба истироҳатгоҳи “Зимчуруд” раҳсипор гаштанд.

Ин иқдом бо ташаббуси мақомоти иҷроияи ҳокимияти давлатии шаҳри Душанбе дар якҷоягӣ бо Кумитаи кор бо ҷавонон ва варзиши назди Ҳукумати ҷумҳурӣ бо дастгирии сарпарасти “Соли ҷавонон”, президенти Федератсияи футболи Тоҷикистон, муҳтарам Рустами Эмомалӣ бахшида ба 26-солагии Истиқлолияти давлатӣ ва “Соли ҷавонон” сурат гирифтааст.

Истироҳати ҷавонони фаъол бо суханронии сардори Раёсати кор бо ҷавонон ва варзиши шаҳри Душанбе Иброҳим Мирзозода оғоз гардид. Ӯ ҷавонони фаъолро ба ҳамдилию ҳамбастагӣ даъват намуда, аз иштирокчиёни лагер хоҳиш намуд, ки дар ҷавоб ба ғамхориҳои Роҳбарияти кишвар ва сарпарасти “Соли ҷавонон” ба Ватану модар хизмати содиқонаю софдилона намоянд.

Ҷавонони фаъол низ дар навбати худ ваъда доданд, ки дар баробари ин ҳама дастгириҳои пайвастаи Пешвои муаззами миллат, муҳтарам Эмомалӣ Раҳмон мекӯшанд, ки ҳама маҳорат ва донишҳои дар лагери мазкур азхуд намудаашонро баҳри боз ҳам ободу зебо гардонидани кишвар равона месозанд.

Ҷавонон дар истироҳатгоҳи мазкур муддати 4 рӯз ба фароғату омузиш фаро гирифта мешаванд.

Хуршед МАВЛОН, “ҶТ”