Бо ташаббуси Раёсати кор бо ҷавонон ва варзиши вилояти Суғд тренинги омӯзишӣ оиди мубориза бар зидди бемории хафнок ВНМО/БПНМ таҳти унвони “Оилаи солим - интихоби беҳтарин” дар толори мактаби № 1-и ноҳияи Спитамен баргузор гардид.

Дар тренинг 180 нафар наврасону ҷавонони ноҳия иштирок вобаста ба бемории мазкур маълумот гирифтанд. Таъкид шуд, мақсад аз баргузории тренинг баланд бардоштани сатҳи дониши наврасону ҷавонон бобати хавфи вируси бемории ВНМО/БПНМ, тарғибу ташвиқи тарзи ҳаёти солим, пешгирӣ ва коҳиш додани ин бемории сироятӣ байни ҷавонон мебошад.

Зикр гардид, ки “ВНМО вируси ғайриоддӣ аст, зеро инсон метавонад онро дар организми худ солҳои зиёд дошта бошад, вале ҳамзамон ба куллӣ солим намояд. Вале вирус тадриҷан дар дохили организм афзоиш меёбад, ҳуҷайраҳои хунро вайрон мекунад, ки онҳо унсури системаи ҳимоятгари организм мебошанд.

Ҳамзамон, дар ҷараёни рафти семинар – машварати мазкур наврасону ҷавонон вобаста ба роҳҳои бартарафсозии ин вабои аср фикру мулоҳизаронӣ намуда, барои пешгирии ҷавонон аз ҳар гуна бемориҳои сироятӣ пешниҳодҳои муфид баён карданд.