23-юми июл дар толори калони Муассисаи давлатии таълимии "Донишгоҳи давлатии Хуҷанд ба номи академик Бобоҷон Ғафуров" ҷаласаи ҷамъбастии фаъолияти шашмоҳаи Раёсати кор бо ҷавонон ва варзиши вилояти Суғд баргузор гардида, дар кори он муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Назарзода Ризо Шодӣ иштирок намуданд.

Каримзода Мирзоқосим, сардори Раёсати кор бо ҷавонон ва варзиши вилояти Суғд ҷаласаро ифтитоҳ намуда, зикр кард, ки давоми шаш моҳи соли равон ҷавонони вилоят дар партави дастгирву ғамхориҳои пайватаи Ҳукумати Ҷумҳурии Тоҷикистон таҳти роҳбарии Пешвои муаззами миллат муҳтарам Эмомалӣ Раҳмон ҷиҳати шукуфоии Ватани азизамон ва боло бурдани обрӯи он дар арсаи байналмилалӣ корҳои муайянро ба сомон расониданд.

Таъкид гардид, ки аз ҷониби раёсат ва бахшҳои кор бо ҷавонон ва варзиши шаҳру ноҳияҳои вилоят дар ҳамкорӣ бо соҳибкорони хайрхоҳи ватанӣ дар вилоят давоми шаш моҳи соли равон ба 179 нафар ҷавонони маъюб ва камбизоат кумакҳои молӣ расонида шуда, 620 нафар ҷавонони ниёзманд ва аскарони қисмҳои низомӣ ба маблағи 131 300 сомонӣ аёдат карда шуданд.

Дар самти варзиш гуфта шуд, ки аз ҳисоби ғолибон ва ҷоизадорони мусобиқаҳо дастаи мунтахаби вилоят муайян гардида, дар 28 мусобиқаҳои ҷумҳуриявӣ ва чемпионатҳои Ҷумҳурии Тоҷикистон дар ҳайати 904 нафар иштирок намуданд ва ба гирифтани 332 медали тилло, 137 медали нуқра ва 173 медали биринҷӣ мушарраф гардиданд. Бо мақсади дарёфти таъмини иштироки васеи варзишгарони дастаи мунтахаб дар мусобиқаҳои байналмилалӣ бо иштироки 23 варзишгар ба 8 чорабиниҳо сафарбар гардида, дар натиҷа ба хазинаи варзишии вилоят 14 медал, аз ҷумла 2 тилло, 5 нуқра ва 7 биринҷӣ ворид намуданд.

Сипас, аз ҷониби муовини якуми раиси Кумитаи кор бо ҷавонон ва варзиши назди Ҳукумати кишвар Назарзода Ризо Шодӣ фаъолияти шашмоҳаи раёсат ва бахшҳои он дар шаҳру ноҳияҳои вилоят таҳлил карда шуда, барои рафъи мушкилиҳои соҳа супоришҳои мушаххас дода шуданд.