Дар шаҳри Хуҷанд, санаи 19 ноябр, ҳамоиши гирандагони Стипендияи Президентӣ таҳти унвони “Ҷавонон – пайрави Пешвои миллат” доир гардид. 

Дар кори ҳамоиш раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода,раиси вилояти Суғд Раҷаббой Аҳмадзода иштирок ва суханронӣ намуданд. 

Раҷаббой Аҳмадзода, раиси вилояти Суғд, зимни суханронӣ иброз доштанд, ки “сиёсати давлатии кор бо ҷавонон дар меҳвари сиёсати Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон қарор дошта, барои татбиқи босамари сиёсати давлатии кор бо ҷавонон мо вазифадор гардидаем. Таъсиси Шӯрои кор бо ҷавонон дар назди Президенти Ҷумҳурии Тоҷикистон намунаи волои таваҷҷуҳи Пешвои миллат ба насли ҷавон буда, дар ҳудуди вилоят дар назди раиси вилоят Шӯрои маҳаллӣ фаъолият намуда истодааст, ки дар он мунтазам масъалаҳои марбут ба ҷавонон мавриди баррасӣ қарор дода мешаванд”.

Аҳтам Абдуллозода, раиси Кумитаи кор бо ҷавонон ва варзиш, зимни баромади хеш нахуст иштирокчиёни ҳамоиш ва дар симои онҳо ҷавонону варзишгарон ва сокинони вилояти Суғдро ба ифтихори Рӯзи Президенти Ҷумҳурии Тоҷикистон ва ба истифода додани агрегати якуми иншооти азими аср НБО “Роғун” сидқан ва самимона табрик намуда, иброз доштанд, ки дар замири ҳар як ҷавони кишвар Президенти Ҷумҳурии Тоҷикистон ҳамчун асосгузори давлати навини тоҷикон ва муаррифгари асили миллати тоҷик дар арсаи байналмилалӣ нақши воло доранд.

“Пешвои муаззами миллат барои Ватани мо, барои нигоҳдории сулҳу оромии кишвар, таъмини шароити зиндагии арзандаи иҷтимоии сокинони ҷумҳурӣ, насли ояндасози ҷомеа ҷидду ҷаҳд, заҳмату талошҳо ва хизматҳои басо бузурге кардаанд. Иқдомҳои наҷиб ва ғамхоронаи Пешвои муаззами миллат нисбат ба насли наврасу ҷавон аз рӯзҳои нахустини соҳибистиқлолии кишвар бараъло эҳсос гардида, ба хотири рӯҳбаланд намудани наврасону ҷавонон ва бо мақсади таъмини таҳсилоти муносиби ҷавонон як қатор имтиёзҳо, аз ҷумла Стипендияи Президенти Ҷумҳурии Тоҷикистон барои хонандагону донишҷӯёни муассисаҳои таҳсилоти миёнаи умумӣ, ибтидоӣ ва миёнаи касбӣ, ки бо баҳои аъло таҳсил ва дар корҳои ҷамъиятӣ фаъолона иштирок менамоянд, таъсис дода шудааст, ки ин боиси беҳтар шудани сифати дониш миёни ин қишри ҷомеа гардидааст. Дар асл меҳру муҳаббат, садоқату боварӣ ва эътимоди Пешвои муаззами миллат нисбат ба насли ҷавони кишвар беҳудуд аст ва ин бовариву эътимод ба шумо ҷавонони соҳибмаърифат бояд сипар бошад ва барои рушд, ҳифз ва нигоҳдошти ояндаи созанда ва дурахшони Тоҷикистони соҳибистиқлол, пайравӣ бо сиёсати пешгирифтаи хирадмандонаву дурандешонаи Пешвои миллат кӯшишу талош намоед”, – зикр намуд дар идома Аҳтам Абдуллозода.

Дар интиҳои ҳамоиш аз ҷониби санъаткорони вилояти Суғд барномаи хуби фарҳангӣ пешкаши ҳозирин гардонида шуд.