Дар шаҳри Хуҷанд ҳамоиши гирандагони Стипендияи Президенти Ҷумҳурии Тоҷикистон таҳти унвони "Ҷавонон – пайравони Пешвои миллат" баргузор гардид, ки дар он гирандагони стипендияи Президентӣ аз шаҳру ноҳияҳои Хуҷанд, Гулистон, Бӯстон, Истиқлол, Бобоҷон Ғафуров, Конибодом, Исфара, Ашт, Мастчоҳ ва Ҷаббор Расулов иштирок намуданд.

Дар ҳамоиш Сураҷ Чоршанбезода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Исмоилзода Зуфар Муртазохон, муовини раиси вилояти Суғд ва Исматзода Бахтиёр, сардори Раёсати кор бо ҷавонон ва варзиши вилояти Суғд иштирок ва суханронӣ намуданд.

Гуфта шуд, ки таъсис ва тавсеаи стипендияҳо нишонаи таваҷҷуҳи махсуси Пешвои миллат муҳтарам Эмомалӣ Раҳмон ба неруи зеҳнии ҷавонон аст. Бештар гардидани шумораи гирандагони стипендия аз 400 ба 3000 нафар ва пешниҳоди зиёдшавии ҳаҷми он аз 1 сентябри соли 2025 ба андозаи 20 фоиз далели амиқи таваҷҷуҳ ва ғамхории Пешвои миллат арзёбӣ гардид.

Дар идомаи кори ҳамоиш якчанд нафар гирандагони Стипендияи президентӣ суханронӣ намуда, барои дастгирии пайвастаи Ҳукумати Ҷумҳурии Тоҷикистон ва Пешвои миллат муҳтарам Эмомалӣ Раҳмон изҳори миннатдорӣ карданд. Онҳо иброз доштанд, ки бо дарки масъулияти бузург дар роҳи илмомӯзӣ, ватандӯстӣ ва хидмат ба ҷомеа кӯшиши бештар хоҳанд кард.

Мувофиқи омори расмӣ дар вилояти Суғд дар соли таҳсили ҷорӣ 853 нафар хонандагони аълохон ба гирифтани Стипендияи Президенти Ҷумҳурии Тоҷикистон мушарраф гардидаанд.

Субҳидин ҚОДИРОВ, “ҶТ”